കോട്ടയം: എംസി റോഡിൽ സംക്രാന്തി നീലിമംഗലം പെട്രോൾ പമ്പിനു മുന്നിൽ വാഹനങ്ങളുടെ കൂട്ടയിടി. നിയന്ത്രണം നഷ്ടമായ ഓട്ടോറിക്ഷ ഒരു ബുള്ളറ്റിലും ആക്ടീവാ സ്‌കൂട്ടറിലും ഇടിച്ചു ഇടിയുടെ ആഘാതത്തിൽ സ്‌കൂട്ടർ യാത്രക്കാരായ മൂന്നു പേർക്ക് പരിക്കേറ്റു. പരിക്കേറ്റവരിൽ ഒരു രണ്ടുവയസുകാരനും ഉൾപ്പെട്ടിട്ടുണ്ട്. ശനിയാഴ്ച ഉച്ചയ്ക്ക് മൂന്നരയോടെ എംസി റോഡിൽ നീലിമംഗലം ഭാഗത്തായിരുന്നു അപകടം.
പെട്രോൾ പമ്പിൽ നിന്നും ഇന്ധനം നിറച്ച ശേഷം പുറത്തേയ്ക്ക് എത്തുകയായിരുന്നു ബുള്ളറ്റ് ബൈക്ക്. ഈ സമയം കോട്ടയം ഭാഗത്തു നിന്നും എത്തിയ ഓട്ടോറിക്ഷ നിയന്ത്രണം നഷ്ടമായി ബുള്ളറ്റിൽ ഇടിച്ചു. ഇടിയുടെ ആഘാതത്തിൽ നിയന്ത്രണം നഷ്ടമായ ഓട്ടോറിക്ഷ റോഡിൽ മറിഞ്ഞു. മറിഞ്ഞ് ഉരുണ്ട ഓട്ടോറിക്ഷ ഏറ്റുമാനൂർ ഭാഗത്തു നിന്നും എത്തിയ കുടുംബം സഞ്ചരിച്ച ആക്ടീവയിൽ ഇടിച്ചു. ഇടിയുടെ ആഘാതത്തിൽ റോഡിൽ വീണ കുടുംബത്തിന് സാരമായി പരിക്കേറ്റു. ഇവരെ നാട്ടുകാർ ചേർന്ന് കോട്ടയം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല.
