കോട്ടയം: കെ.കെ റോഡിൽ പാമ്പാടി ആർ.ഐ.ടിയ്ക്കു സമീപം സമ്മർസാൻഡ് ബാറിനു മുന്നിൽ ബൈക്കുകൾ കൂട്ടിയിടിച്ചുണ്ടായ അപകടത്തിൽ ഒരാൾ മരിച്ചു. ബൈക്ക് യാത്രക്കാരനായ ഒരാളുടെ നില അതീവ ഗുരുതരമായി തുടരുന്നു. ബൈക്ക് യാത്രക്കാരനായ കോത്തല സ്വദേശി അച്ചു അനിലാ(19)ണ് മരിച്ചത്. ഇയാൾക്കൊപ്പം യാത്ര ചെയ്തിരുന്ന രഞ്ജിത്തിന്റെ നില ഗുരുതരമായി തുടരുന്നു. അപകടത്തിൽ പരിക്കേറ്റ നിഖിൽ, ജിജി എന്നിവരും കോട്ടയം മെഡിക്കൽ കോളേജ് ആശുപത്രിയിൽ ചികിത്സയിൽ കഴിയുകയാണ്.
ബുധനാഴ്ച വൈകിട്ട് 08.15 ഓടെയായിരുന്നു അപകടം. പാമ്പാടി ഭാഗത്തു നിന്നും കോട്ടയം ഭാഗത്തേയ്ക്കു വരികയായിരുന്നു യുവാക്കൾ സഞ്ചരിച്ച ബൈക്ക്. ഈ സമയം എതിർ ദിശയിൽ നിന്നും എത്തിയ ബൈക്കുമായി ഇവർ സഞ്ചരിച്ച ബൈക്ക് കൂട്ടയിടിച്ചു. ഇടിയുടെ ആഘാതത്തിൽ യുവാക്കൾ റോഡിൽ തെറിച്ചു വീണു. ഓടിക്കൂടിയ നാട്ടുകാർ ചേർന്നാണ് പരിക്കേറ്റവരെ ആശുപത്രിയിൽ പ്രവേശിപ്പിച്ചത്. അപകടത്തെ തുടർന്ന് കെ.കെ റോഡിൽ ഗതാഗത തടസവും ഉണ്ടായി. അപകടത്തിൽ പരിക്കേറ്റ അച്ചു മെഡിക്കൽ കോളേജ് ആശുപത്രിയിൽ ചികിത്സയിൽ കഴിയുന്നതിനിടെയാണ് മരിച്ചത്. സംഭവത്തിൽ പാമ്പാടി പൊലീസ് കേസെടുത്തു.
