കോട്ടയം: എം.സി റോഡിൽ മറിയപ്പള്ളിയിൽ വാഹനാപകടം. നിയന്ത്രണം നഷ്ടമായ കാർ സ്വകാര്യ ബസിലും കെഎസ്ആർടിസി ബസിലും ഇടിച്ചു. അപകടത്തെ തുടർന്ന് കാറിന്റെ മുൻ ചക്രങ്ങൾ ഇളകി തെറിച്ചെങ്കിലും. അപകടം ഒഴിവായി. ചങ്ങനാശേരിയിലേയ്ക്കു പോകുകയായിരുന്ന വൈക്കം സ്വദേശികളാണ് കാറിലുണ്ടായിരുന്നത്. വ്യാഴാഴ്ച രാവിലെ 11 മണിയോടെ എം.സി റോഡിൽ മറിയപ്പള്ളി ഭാഗത്തായിരുന്നു അപകടം.
കോട്ടയം ഭാഗത്തു നിന്നും ചങ്ങനാശേരി ഭാഗത്തേയ്ക്കു പോകുകയായിരുന്നു കാർ. ഈ സമയം എതിർ ദിശയിൽ നിന്നും കെഎസ്ആർടിസി ബസും സ്വകാര്യ ബസും എത്തുകയായിരുന്നു. മറ്റൊരു വാഹനത്തെ മറികടക്കാൻ ശ്രമിക്കുന്നതിനിടെ നിയന്ത്രണം നഷ്ടമായ കാർ സ്വകാര്യ ബസിലും കെ.എസ്.ആർ.ടിസിയിലും ഇടിക്കുകയായിരുന്നു. ഇടിയുടെ ആഘാതത്തിൽ കാറിന്റെ വശങ്ങളും, മുൻ ഭാഗവും തകർന്നു. ഇതേ തുടർന്നു കെഎസ്ആർടിസി ബസ് റോഡിനു നടുവിൽ തന്നെ നിർത്തിയിട്ടത് ഗതാഗതക്കുരുക്കിനും ഇടയാക്കി. അപകടത്തിൽ ആർക്കും പരിക്കേറ്റിട്ടില്ല. സംഭവം അറിഞ്ഞ് പൊലീസ് കൺട്രോൾ റൂം സംഘവും സ്ഥലത്ത് എത്തിയിരുന്നതായി നാട്ടുകാർ പറഞ്ഞു.
