ജയ്പൂർ: ഇന്ത്യ-പാകിസ്ഥാൻ സംഘർഷത്തിന് പിന്നാലെ രാജസ്ഥാനിലെ ജയ്പൂരിലെ കടകൾ പ്രശസ്തമായ ‘മൈസൂർ പാക്ക്’ ഉൾപ്പെടെ വിവിധ മധുരപലഹാരങ്ങളുടെ പേര് മാറ്റി. എല്ലാ മധുരപലഹാരങ്ങളുടെയും പേരുകളിൽ നിന്ന് ‘പാക്ക്’ എന്ന വാക്ക് നീക്കം ചെയ്ത് ‘ശ്രീ’ എന്ന് ചേർത്തതായി വ്യാപാരികൾ പറഞ്ഞു.
‘ഞങ്ങളുടെ മധുരപലഹാരങ്ങളുടെ പേരുകളിൽ നിന്ന് ‘പാക്ക്’ എന്ന വാക്ക് ഞങ്ങൾ നീക്കം ചെയ്തു. ‘മോത്തി പാക്കിനെ’ ‘മോത്തി ശ്രീ’ എന്നും ‘ഗോണ്ട് പാക്കിനെ’ ‘ഗോണ്ട് ശ്രീ’ എന്നും ‘മൈസൂർ പാക്കിനെ’ ‘മൈസൂർ ശ്രീ’ എന്നും ഞങ്ങൾ പുനർനാമകരണം ചെയ്തു,’- ഒരു കടയുടമ മാധ്യമങ്ങളോട് പറഞ്ഞു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
മധുരപലഹാരത്തിന്റെ പേരിൽ ‘ശ്രീ’ പോലുള്ള ഒരു ഇന്ത്യൻ പദം കേൾക്കുന്നത് സമാധാനവും സംതൃപ്തിയും നൽകുന്നുവെന്ന് പലരും പറയുന്നുണ്ട്. രാജസ്ഥാൻ സംസ്ഥാനം മുഴുവൻ പേര് മാറ്റുന്നതിനെക്കുറിച്ചും പരമ്പരാഗത മധുരപലഹാര നാമങ്ങളിൽ ‘പാക്’ എന്നതിന് പകരം ‘ശ്രീ’ അല്ലെങ്കിൽ ‘ഭാരത്’ എന്ന പേര് ഉപയോഗിക്കുന്നതിനെക്കുറിച്ചും ഇപ്പോൾ ചർച്ചകൾ നടക്കുന്നുണ്ട്. ജയ്പൂരിലെ നിരവധി പ്രശസ്ത മധുരപലഹാര നിർമ്മാതാക്കളും കാറ്ററിംഗ് സേവന ദാതാക്കളും ഈ സംരംഭത്തെ പിന്തുണച്ച് മുന്നോട്ട് വന്നിട്ടുണ്ട്. താമസിയാതെ അവരും തങ്ങളുടെ മധുരപലഹാരങ്ങൾക്ക് കൂടുതൽ ദേശസ്നേഹപരമായ പേരുകൾ നൽകുമെന്ന് പ്രസ്താവിച്ചു.
പരമ്പരാഗതമായി, മൈസൂർ പാക്ക് പോലുള്ള ഐക്കണിക് മധുരപലഹാരങ്ങളിൽ, ‘പാക്’ എന്ന വാക്ക് പാചക സമയത്ത് ഉപയോഗിക്കുന്ന പഞ്ചസാര സിറപ്പുമായി (കന്നഡയിൽ പാക് എന്ന് വിളിക്കുന്നു) ബന്ധപ്പെട്ടിരിക്കുന്നു. സംസ്‌കൃതത്തിൽ, ‘പക’ എന്നാൽ ”പാചകം ചെയ്യുക” എന്നാണ് അർത്ഥമാക്കുന്നത്. കർണാടകയിലെ മൈസൂരിൽ (ഇപ്പോൾ മൈസൂരൂ) നിന്നാണ് മൈസൂർ പാക്ക് എന്ന പേര് വന്നത്.
കഴിഞ്ഞ മാസം ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തെത്തുടർന്ന് ഇന്ത്യയും പാകിസ്ഥാനും തമ്മിലുള്ള വർദ്ധിച്ചുവരുന്ന സംഘർഷങ്ങളുടെ പശ്ചാത്തലത്തിലാണ് ഈ നീക്കം. ഏപ്രിൽ 22ന് നടന്ന ഭീകരാക്രമണത്തിൽ 26 പേരാണ് മരിച്ചത്. ഇതിന് തിരിച്ചടിയെന്നോണം ഓപ്പറേഷൻ സിന്ദൂർ എന്ന പേരിൽ പാകിസ്ഥാനിലെയും പാക് അധിനിവേശ കശ്മീരിലിയെും ഭീകര ക്യാമ്പുകൾ ഇന്ത്യ ആക്രമിച്ച് തകർത്തു.