പനച്ചിക്കാട്: പനച്ചിക്കാട് സര്‍വ്വീസ് സഹകരണ ബാങ്ക് ഇനി സൗരോര്‍ജ്ജ തിളക്കത്തില്‍. തുടര്‍ച്ചയായ ലാഭത്തിലൂടെ പ്രവര്‍ത്തിക്കുന്ന പനച്ചിക്കാട് ബാങ്ക് പുതിയ നേട്ടത്തിന്റെ പടവുകള്‍ കൂടി കയറുകയാണ്. ബാങ്ക് ഹെഡാഫീസും ഒപ്പം ആറ് ബ്രാഞ്ചുകളും ഇനി സൗരോ‍ര്‍ജ്ജപ്രഭയില്‍ തിളങ്ങുന്നതിന്റെ നേട്ടം കൂടി പങ്കുവയ്ക്കാനൊരുങ്ങുകയാണ് ഭരണസമിതി. 40 കിലോവാട്ട് ശേഷിയുള്ള സോളാര്‍ നിലയത്തിന്റെ നിര്‍മ്മാണം പൂര്‍ത്തിയായി കഴിഞ്ഞു. ബാങ്കിന്റെ പരുത്തുംപാറയിലെ ഹെഡാഫീസിന് മുകളിലാണ് പ്ലാന്റ് സ്ഥാപിച്ചിരിക്കുന്നത്. ബാങ്കിന്റെ നീക്കിയിരിപ്പായ കെട്ടിട നിര്‍മ്മാണ ഫണ്ടില്‍ നിന്നും 22 ലക്ഷം രൂപ ചിലവഴിച്ചാണ് പ്ലാന്റ് സ്ഥാപിച്ചിരിക്കുന്നത്.
നിര്‍മ്മാണം പൂര്‍ത്തിയായതോടെ ബാങ്കിന്റെയും ആറ് ശാഖകളുടെയും മറ്റ് അനുബന്ധ സ്ഥാപനങ്ങളുടെയും ഊര്‍ജ്ജാവശ്യം മുഴുവനും ഇതില്‍ നിന്നും നിറവേറ്റാനാവും. മാത്രമല്ല, മിച്ചം വരുന്ന വൈദ്യുതി കെഎസ്ഇബിയുടെ ഗ്രിഡിലേക്ക് നല്‍കുന്നതിലൂടെ ലാഭം കൈവരിക്കാനാവും. കഴിഞ്ഞ രണ്ടാഴ്ചയോളമായി ട്രയല്‍ എന്ന നിലയില്‍ സോളാറിലാണ് ബാങ്കിന്റെ പ്രവര്‍ത്തനങ്ങള്‍ നടക്കുന്നത്. ജില്ലയിലെ സഹകരണ സ്ഥാപനങ്ങള്‍ക്കെല്ലാം മാതൃകയായ പദ്ധതിയുടെ പ്രവര്‍ത്തനോദ്ഘാടനം നാളെ നടക്കും. വൈകുന്നേരം 3ന് ബാങ്ക് ഓഡിറ്റോറിയത്തില്‍ ചേരുന്ന സമ്മേളനം കെഎസ്ഇബി ജനറേഷന്‍ ചീഫ് എഞ്ചിനീയര്‍ ജമിലി വി സി ഉദ്ഘാടനം ചെയ്യും. പരിപാടിയുടെഭാഗമായി അംഗത്വ സമാശ്വാസ ധനസഹായ നിധിയുടെ വിതരണവും നടക്കും.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
കോട്ടയം സര്‍ക്കിള്‍ സഹകരണ യൂണിയന്‍ ചെയര്‍മാന്‍ കെ എം രാധാകൃഷ്ണന്‍ ധനസഹായ വിതരണം നിര്‍വ്വഹിക്കും. ബാങ്ക് പ്രസിഡന്റ് കെ ജെ അനില്‍കുമാര്‍ അദ്ധ്യക്ഷത വഹിക്കും. വൈസ് പ്രസിഡന്റ് ജി ജയകുമാര്‍ സ്വാഗതം ആശംസിക്കും. ഡയറക്ടര്‍ ബോര്‍ഡ് അംഗം കെ എസ് സജീവ് റിപ്പോര്‍ട്ട് അവതരിപ്പിക്കും. പഞ്ചായത്ത് പ്രസിഡന്റ് ആനി മാമന്‍, കെഎസ്ഇബി റിട്ട ഡെപ്യൂട്ടി ചീഫ് എഞ്ചനീയര്‍ എബി കുര്യാക്കോസ്, സഹകരണ വകുപ്പ് അസി. രജിസ്ട്രാര്‍ ഉണ്ണികൃഷ്ണന്‍ നായര്‍ കെ പി, മുന്‍ ബാങ്ക് പ്രസിഡന്റ് പി കെ മോഹനന്‍, സര്‍ക്കിള്‍ സഹകരണ യൂണിയന്‍ ഭരണസമിതി അംഗം അഡ്വ സന്തോഷ് കേശവനാഥ്, വ്യാപാരി വ്യവസായി ഏകോപന സമിതി പ്രസിഡന്റ് വിശ്വംഭരന്‍ നായര്‍ എന്നിവര്‍ പങ്കെടുക്കും. സെക്രട്ടറി പ്രേമു ഐപ്പ് കൃതജ്ഞത രേഖപ്പെടുത്തും.