കോട്ടയം: *ആശാവർക്കർമാരുടെ ആവശ്യങ്ങൾ അനുഭാവപൂർവ്വം പരിഹരിച്ച് പ്രത്യാശ പകരണമെന്ന് ഈസ്റ്റർ ദിന സന്ദേശത്തിൽ മലങ്കര ഓർത്തഡോക്സ് സഭയുടെ പരമാധ്യക്ഷനും മലങ്കര മെത്രാപ്പോലീത്തയുമായ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ പറഞ്ഞു.
ആശാവർക്കർമാർ രണ്ട് മാസത്തിലധികമായി സമരം ചെയ്യുന്നു. ആശാവർക്കർമാർ വീട്ടമ്മമാരാണ്. നൂറ് രൂപയെങ്കിലും കൂട്ടിക്കിട്ടാൻ അവർ ആഗ്രഹിക്കുന്നു.
അതിനെതിരെ മുഖം തിരിക്കുന്ന സർക്കാരിന്റെ നടപടി പുന:പരിശോധിക്കണം. ദുരിതങ്ങളിൽ കഴിയുന്നവർക്ക് ക്രിസ്തുവിന്റെ ഉയർപ്പ് പ്രത്യാശയേകണം. ഗാസയിലും, യുക്രെയ്നിലും ജനം ഭീതിയോടെ കഴിയുന്നു. അനേകായിരം നിർദോഷികൾ കൊല്ലപ്പെടുന്നു. യുദ്ധങ്ങൾ അവസാനിച്ച് സമാധാനം സ്ഥാപിക്കപ്പെടാൻ പ്രാർത്ഥിക്കണം.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
*മലയോര കർഷകരും, തീരദേശജനതയും ദുരിതങ്ങളുടെ തടവറയിലെന്ന് പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാബാവാ* പറഞ്ഞു. മലയോരജനതയും ആദിവാസിസമൂഹവും വന്യമൃഗങ്ങളുടെ തടവറയിലാണ്. വനം വകുപ്പ് പരിശ്രമിച്ചാൽ മാത്രമേ ആ ജനതയ്ക്ക് സമാധാനവും പ്രത്യാശയും ലഭിക്കൂ. മുനമ്പം വിഷയം മൂലം കേരളത്തിൽ മതങ്ങൾ തമ്മിൽ സ്പർധ വർധിക്കാനുള്ള സാഹചര്യം ഉണ്ടാകുന്നു. നമ്മുടെ ഗ്രാമങ്ങളിൽ എത്രയോ മതങ്ങൾ സൗഹാർദ്ദത്തോടെ കഴിയുന്നു. ആ സൗഹാർദ്ദ അന്തരീക്ഷത്തിൽ ഭിന്നതയുണ്ടാക്കുന്നത് പൈശാചിക പ്രവൃത്തിയാണ്. മുനമ്പത്തെ ജനതയ്ക്ക് പ്രത്യാശയുണ്ടാകണം. സർക്കാർ അവരുടെ പ്രശ്നം പരിഹരിക്കണമെന്നും അദ്ദേഹം പറഞ്ഞു.
*മലങ്കരസഭയിൽ സമാധാനം ഉണ്ടാകണമെന്ന് ഓർത്തഡോക്സ് സഭാധ്യക്ഷൻ.*
സ്നേഹത്തോടെ സമാധാനം പുനസ്ഥാപിക്കാൻ കഴിയുമെന്നാണ് പ്രത്യാശിക്കുന്നത്. മുൻകാലങ്ങളിൽ സമാധാനം സംജാതമായപോലെ വീണ്ടും ഒരുമിക്കാൻ മലങ്കരസഭയ്ക്ക് കഴിയണം.
*കേരളത്തിൽ ആത്മഹത്യകൾ വർധിക്കുന്നു.*
മാതാപിതാക്കൾ കുഞ്ഞുങ്ങളുമായി ആത്മഹത്യ ചെയ്യുന്ന സംഭവങ്ങൾ വേദനാജനകമാണ്. പ്രതിസന്ധികളിൽപ്പെടുന്നവർക്ക് കൈത്താങ്ങേകി ജീവിതത്തിലേക്ക് മടക്കിക്കൊണ്ടുവരണം.