പാല: ജില്ലാ പഞ്ചായത്ത് കിടങ്ങൂര്‍ ഡിവിഷന്റെ പരിധിയിലുള്ള കിടങ്ങൂര്‍, മുത്തോലി, കൊഴുവനാല്‍, അകലക്കുന്നം, എലിക്കുളം, മീനച്ചില്‍ പഞ്ചായത്തുകളിലെ 58 പഞ്ചായത്തുവാര്‍ഡുകളിലെ 74 അംഗന്‍വാടികളില്‍ സ്മാര്‍ട്ട് ടി.വി. നല്കുന്ന പദ്ധതിക്ക് 10 ലക്ഷം രൂപ അനുവദിച്ചതായി ജില്ലാ പഞ്ചായത്ത് മെമ്പര്‍ ജോസ്‌മോന്‍ മുണ്ടയ്ക്കല്‍ അറിയിച്ചു. ജില്ലാ പഞ്ചായത്തിന്റെ 2025-26 പദ്ധതിയില്‍ ഉള്‍പ്പെടുത്തിയാണ് തുക അനുവദിച്ചത്.
74 അംഗന്‍വാടികളിലെത്തുന്ന എണ്ണൂറില്‍പ്പരം കുട്ടികളുടെ സന്തോഷത്തിനും അവരുടെ ബൗദ്ധികവളര്‍ച്ചയ്ക്കാവശ്യമായ ചെറുകഥകള്‍, പാട്ട്, ചെറുപ്രഭാഷണങ്ങള്‍, കുട്ടികള്‍ക്ക് സന്തോഷകരമായ മറ്റിതര പ്രോഗ്രാമുകളും സ്മാര്‍ട്ട് ടി.വി.യിലൂടെ അംഗന്‍വാടികളിലിരുന്ന് കുട്ടികള്‍ക്ക് ആസ്വദിക്കുന്നതിനുള്ള അവസരം ഈ പദ്ധതി പ്രകാരം ഉണ്ടാകുന്നതാണ്.
അംഗന്‍വാടികുട്ടികള്‍ക്കായി ജില്ലാ വനിത-ശിശു വികസന വകുപ്പ് തയ്യാര്‍ ചെയ്തിരിക്കുന്ന 30 ഇനങ്ങള്‍ അടങ്ങുന്ന പാഠ്യപദ്ധതി മൊഡ്യൂള്‍ സ്മാര്‍ട്ട് ടി.വി.യിലൂടെ കുട്ടികളെ പരിശീലിപ്പിക്കുന്നതിനുള്ള അവസരമുണ്ടാക്കുന്നതാണ്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
കൂടാതെ അംഗന്‍വാടികളുടെ ഗുണഭോക്താക്കളായ കൗമാരപ്രായക്കാരായ പെണ്‍കുട്ടികള്‍, അമ്മമാര്‍, മറ്റ് വിവിധ വിഭാഗത്തില്‍പ്പെട്ട ആളുകള്‍ക്കും പ്രയോജനപ്രദമാകത്തക്കവിധത്തിലുള്ള മദ്യം, മയക്കുമരുന്ന് എന്നിവയ്‌ക്കെതിരെയും മറ്റ് സാമൂഹ്യതിന്മകള്‍ക്കെതിരെയുമുള്ള ബോധവത്ക്കരണ ക്ലാസുകളും പ്രഭാഷണങ്ങളും സമൂഹത്തിലെ നന്മയുടെ വിവിധ മോഡലുകള്‍ മനസ്സിലാക്കുന്നതിനും സ്മാര്‍ട്ട് ടി.വി. പ്രയോജനപ്പെടുത്തുന്നതാണ്. ഇപ്രകാരമുള്ള എല്ലാ പ്രവര്‍ത്തനങ്ങളും നടത്തുന്നതിലേക്കായി പ്രത്യേകം വിഭാവനം ചെയ്ത് തയ്യാറാക്കുന്ന പെന്‍ഡ്രൈവ് എല്ലാ അംഗന്‍വാടികളിലും നല്‍കുന്നതാണ്.
കേബിള്‍ കണക്ഷനില്ലാതെ പെന്‍ഡ്രൈവില്‍ തയ്യാറാക്കി നല്കുന്ന പ്രോഗ്രാമുകള്‍ മാത്രമായിരിക്കും സ്മാര്‍ട്ട് ടി.വി.യിലൂടെ പ്രദര്‍ശിപ്പിക്കുന്നത്. 74 അംഗന്‍വാടികളിലെ ഗുണഭോക്താക്കളായ കുട്ടികളും മുതിര്‍ന്നവരും അടങ്ങുന്ന രണ്ടായിരത്തില്‍പ്പരം ആളുകള്‍ക്ക് സ്മാര്‍ട്ട് ടി.വി.യിലൂടെ പ്രത്യേകം വിഭാവനം ചെയ്യുന്ന വിവിധ പ്രോഗ്രാമുകളുടെ പ്രയോജനം ലഭ്യമാകും. എല്ലാ വര്‍ഷവും പെന്‍ഡ്രൈവില്‍ പ്രോഗ്രാമുകളില്‍ കാലാനുശ്രുതമായ പരിഷ്‌കാരവും നടത്തുന്നതാണ്. പാമ്പാടി, ളാലം ബ്ലോക്കുകളിലെ സി.ഡി.പി.ഒ.മാരും 6 പഞ്ചായത്തുകളിലെയും പഞ്ചായത്ത് പ്രസിഡന്റുമാരും ജനപ്രതിനിധികളും ഐ.സി.ഡി.എസ്.
സൂപ്പര്‍വൈസര്‍മാരും സമയാസമയങ്ങളില്‍ ഈ പ്രോജക്ടിന്റെ നിരീക്ഷണം നടത്തുന്നതാണ്.
കിടങ്ങൂര്‍ പഞ്ചായത്തിലെ 15 വാര്‍ഡുകളിലായുള്ള 21 അംഗന്‍വാടികളിലും മുത്തോലി പഞ്ചായത്തിലെ 13 വാര്‍ഡുകളിലുള്ള 17 അംഗന്‍വാടികളിലും കൊഴുവനാല്‍ പഞ്ചായത്തിലെ 13 വാര്‍ഡുകളിലുള്ള 16 അംഗന്‍വാടികളിലും അകലക്കുന്നം പഞ്ചായത്തിലെ 1,2,3,8,9,10,11 വാര്‍ഡുകളിലുള്ള 10 അംഗന്‍വാടികളിലും എലിക്കുളം പഞ്ചായത്തിലെ 1,2,3,15,16 വാര്‍ഡുകളിലുള്ള 6 അംഗന്‍വാടികളിലും മീനച്ചില്‍ പഞ്ചായത്തിലെ 10,12 വാര്‍ഡുകളിലുള്ള 4 അംഗന്‍വാടികളിലുമായാണ് 74 സ്മാര്‍ട്ട് ടി.വി. നല്കുന്നത്.
32 ഇഞ്ചിന്റെ എല്‍.ഇ.ഡി. സ്മാര്‍ട്ട് ടി.വി.യാണ് എല്ലാ അംഗന്‍വാടികള്‍ക്കും നല്കുന്നത്. ജില്ലാ വനിതാ-ശിശുക്ഷേമ ആഫീസര്‍ നിര്‍വ്വഹണ ഉദ്യോഗസ്ഥയായ ഈ പ്രോജക്ട് നടപ്പിലാക്കി സെപ്റ്റംബര്‍ ആദ്യവാരം എല്ലാ അംഗന്‍വാടികളിലും തിരുവോണസമ്മാനമായി സ്മാര്‍ട്ട് ടി.വി. എത്തിക്കുന്നതാണെന്ന് ജില്ലാ പഞ്ചായത്ത് മെമ്പര്‍ ജോസ്‌മോന്‍ മുണ്ടയ്ക്കല്‍ അറിയിച്ചു.