സോക്‌സ് നാം പലരും ഉപയോഗിയ്ക്കുന്ന ഒന്നാണ്. ഷൂസും ചെരിപ്പുമിടുമ്പോള്‍ കാലിനെ സംരക്ഷിയ്ക്കാനും കാലിന് ചൂട് നല്‍കാനും വൃത്തിയുടെ പേരിലുമെല്ലാം സോക്‌സ് ധരിയ്ക്കുന്നവരുണ്ട്. കുഞ്ഞുങ്ങളുടെ കാലില്‍ സോക്‌സിടുന്നത് സര്‍വസാധാരണയുമാണ്. ചെറിയ കുട്ടികള്‍ മാത്രമല്ല, മുതിര്‍ന്നവരും സോക്‌സ് ധരിയ്ക്കുന്നവരുണ്ട്. ചിലരാകട്ടെ, രാത്രിയില്‍ കിടക്കും നേരത്ത് സോക്‌സ് ധരിയ്ക്കുന്നത് സാധാരണയാണ്. ഇത് വാസ്തവത്തില്‍ നല്ലതോ അതോ ദോഷമോ, അറിയാം.
സോക്‌സ് ധരിയ്ക്കുന്നത് പെട്ടെന്ന് ഉറങ്ങാന്‍ സഹായിച്ചേക്കാം. ഇതിന് കാരണമായി പറയുന്നത്. സോക്‌സിടുമ്പോള്‍ ശരീരത്തിലെ താപനില ബാലന്‍സ് ചെയ്യപ്പെടുന്നു. ഇതാണ് നല്ല ഉറക്കത്തിന് സഹായിക്കുന്നത്. വാസോഡിലേഷന്‍ എന്ന പ്രക്രിയയാണ് ഇതിന് സഹായിക്കുന്നത്. ഇതിലൂടെ രക്തധമനികള്‍ വികസിയ്ക്കുകയും ഇതിലൂടെയുള്ള രക്തപ്രവാഹം വര്‍ദ്ധിയ്ക്കുകയുമാണ് ചെയ്യുന്നത്. ഇതിലൂടെ ശരീരത്തിന് ചൂടുല്‍പാദിപ്പിയ്ക്കാന്‍ സാധിയ്ക്കുന്നു. ഇത് ശരീരത്തിലെ ചൂട് ബാലന്‍സ് ചെയ്ത് നല്ല ഉറക്കത്തിന് സഹായിക്കുന്നു. നല്ല തണുപ്പുള്ളപ്പോള്‍ സോക്‌സിട്ടാല്‍ തണുപ്പു കുറയുന്നതിന് കാരണം ഇതാണ്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
രക്തക്കുഴലുകളെ ചൂടാക്കി
റൈനോഡ്‌സ് ഡിസീസ് പോലുള്ള ചില രോഗങ്ങളുള്ളവരുണ്ട്. ഇവര്‍ക്ക് വിരലുകളും മറ്റും കോച്ചിപ്പിടിയ്ക്കുന്ന അവസ്ഥയുണ്ടാകാറുണ്ട്. നിറംമാറ്റവുമുണ്ടാകും. രക്തക്കുഴലുകളെ ചൂടാക്കി നിര്‍ത്തുന്നതിനാല്‍ തന്നെ ഇത്തരം പ്രശ്‌നങ്ങളുള്ളവര്‍ക്ക് സോക്‌സ് ധരിച്ചുറങ്ങുന്നത് നല്ലതാണ്. മാത്രമല്ല, മോയിസ്ചറൈസര്‍ പുരട്ടി സോക്‌സിട്ട് ഉറങ്ങുന്നത് പാദം മൃദുവാകാനും ഉപ്പുറ്റി വിണ്ടു കീറുന്നത് തടയാനും നല്ലതാണ്.
സോക്‌സിട്ട് ഉറങ്ങുന്നതിന് ദോഷങ്ങളുമുണ്ട്. ഇത് ചിലപ്പോള്‍ കൂടുതല്‍ ചൂടുണ്ടാക്കും. പ്രത്യേകിച്ചും സോക്‌സ് കോട്ടനല്ലെങ്കിലും കട്ടി കൂടുതലാണെങ്കിലും. ഇത് കൂടുതല്‍ വിയര്‍പ്പുണ്ടാക്കും. ഉറക്കത്തിന് തടസം നില്‍ക്കും. ചര്‍മത്തിന് ഇത് അസ്വസ്ഥതയുണ്ടാക്കുകയും ചെയ്യും. മാത്രമല്ല, ഇതുപോലെ ധരിയ്ക്കുന്ന സോക്‌സ് വൃത്തിയുള്ളതല്ലെങ്കില്‍ സെല്ലുലൈറ്റിസ്, അത്‌ലെറ്റ്‌സ് ഫുട്ട് പോലുള്ള പല പ്രശ്‌നങ്ങള്‍ക്കും ഇത് വഴിയൊരുക്കും.
വല്ലാതെ ഇറുകിയ സോക്‌സ് ഉറങ്ങുമ്പോള്‍ ധരിയ്ക്കുന്നത് രക്തപ്രവാഹം തടസപ്പെടുത്തും. ഇത് കാലുകളില്‍ നീരുണ്ടാക്കുന്ന എഡിമ പോലുള്ള പ്രശ്‌നങ്ങളുണ്ടാക്കും. ഇതിനാല്‍ രാത്രി കിടക്കുമ്പോള്‍ സോക്‌സ് ധരിയ്ക്കുകയാണെങ്കില്‍ മൃദുവായ കോട്ടന്‍ സോക്‌സ് ധരിയ്ക്കാന്‍ ശ്രദ്ധിയ്ക്കുക. അധികം ടൈറ്റായ സോക്‌സ് ധരിയ്ക്കരുത്. സോക്‌സ് ധരിച്ചാലും അധികം പ്രഷര്‍ കാലിന് അനുഭവപ്പെടരുത്.
