അജ്‌മാൻ : തിരുവിതാംകൂർ രാജകുടുംബാംഗം അശ്വതി തിരുനാള്‍ ഗൗരിലക്ഷ്മി ഭായി രചിച്ച “ഹിസ്റ്ററി ലിബറേറ്റഡ്: ശ്രീചിത്രഗാഥ’ എന്ന വിഖ്യാത പുസ്തകത്തിന് പാലാ അൽഫോൻസാ കോളജ് ഇംഗ്ലീഷ് വിഭാഗം മുൻ മേധാവി ഡോ. മിനി ജോൺ തയ്യാറാക്കിയ മലയാള പരിഭാഷ ‘ചരിത്രം വെളിച്ചത്തിലേക്ക്: ശ്രീചിത്രഗാഥ’ ഗൾഫ് എഡീഷൻ തുംബൈ മെഡിസിറ്റി ക്യാമ്പസിൽ യു.എ.ഇ മുൻ പരിസ്ഥിതി മന്ത്രി ഡോ. മുഹമ്മദ് സയിദ് അൽ കിണ്ടി പ്രകാശനം ചെയ്‌തു. യു.എ.ഇ – ലെ പ്രമുഖ സാമൂഹ്യ പ്രവർത്തകനും വ്യവസായിയുമായ എൻ. മുരളീധര പണിക്കർക്ക് നൽകിയാണ് പുസ്‌തകം പ്രകാശനം ചെയ്‌തത്. അറേബ്യൻ ജനതയുമായി നൂറ്റാണ്ടുകൾ സ്നേഹ സൗഹൃദം പങ്കിട്ടതിന്റെ പാരമ്പര്യമുള്ള തിരുവിതാംകൂർ രാജവംശത്തിന്‍റെ ചരിത്രം വിശ്വസംസ്‌കൃതിയ്ക്ക് മാതൃകയാണെന്നും, ലോകരാഷ്ട്രങ്ങളിലെ ഭരണാധികാരികൾക്ക് പ്രചോദനം നൽകുന്നതാണെന്നും ഡോ. മുഹമ്മദ് സയിദ് അൽ കിണ്ടി പറഞ്ഞു. പടയോട്ടങ്ങളിലൂടെ രാഷ്ട്രങ്ങൾ പടുത്തുയർത്തിയ ഭരണാധികാരികളെ ലോകം പിഴുതെറിഞ്ഞപ്പോൾ, പ്രജാക്ഷേമവത്സരായി ഈശ്വര സന്നിധിയിൽ സ്വജീവിതം സമർപ്പിച്ചു ഭരണം നടത്തിയ തിരുവിതാംകൂർ രാജവംശത്തിന് ആഗോള സമൂഹം നൽകുന്ന സ്‌നേഹാദരവുകൾ ശ്രദ്ധേയമാണ്.
തിരുവിതാംകൂർ രാജവംശത്തിന്‍റെ ചടങ്ങുകളിൽ പങ്കെടുത്ത് അവർ നൽകിയ സ്‌നേഹാദരവുകൾ സ്വീകരിച്ച സന്ദർഭങ്ങൾ ജീവിതത്തിലെ മറക്കാനാവാത്ത ഓർമ്മകളാണെന്നും അദ്ദേഹം പറഞ്ഞു. ഡോ. മിനി ജോൺ പരിഭാഷപ്പെടുത്തിയ ചരിത്രം വെളിച്ചത്തിലേക്ക്: ശ്രീചിത്രഗാഥ യുടെ ഉള്ളടക്കം തിരുവിതാംകൂർ രാജകുടുംബാംഗം അശ്വതി തിരുനാള്‍ ഗൗരിലക്ഷ്മി ഭായി വിശദീകരിച്ചു. തിരുവിതാംകൂറിന്‍റെ അവസാനത്തെ ഭരണാധികാരി ശ്രീചിത്തിര തിരുനാൾ മഹാരാജാവിനു നേരെയുണ്ടായ വധ ശ്രമങ്ങൾ, ക്ഷേത്ര പ്രവേശന വിളംബരം, ജനഹിതം അറിയാൻ രൂപീകരിച്ച പ്രജാസഭ, അധികാരത്തിന്‍റെ ഇടനാഴികകളിലെ സംഘർഷങ്ങൾ, ‘ഭാരതത്തിന്‍റെ അശോകൻ’ എന്ന് ഗാന്ധിജി വിശേഷിപ്പിച്ച ശ്രീചിത്തിര തിരുനാൾ മഹാരാജാവിന്‍റെ ജീവിതാന്ത്യം വരെയുള്ള ചരിത്രം സവിസ്തരം പ്രതിപാദിക്കുന്ന പുസ്തകത്തിന് പ്രവാസി മലയാളി സമൂഹം നൽകുന്ന സ്വീകാര്യത പ്രചോദനം നൽകുന്നുവെന്ന് അശ്വതി തിരുനാള്‍ ഗൗരിലക്ഷ്മി ഭായി പറഞ്ഞു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
തിരുവിതാംകൂർ ഹെറിറ്റേജ് ഗാർഡൻസ് ചെയർമാൻ ഡയസ് ഇടിക്കുളയുടെ അദ്ധ്യക്ഷതയിൽ ചേർന്ന യോഗത്തിൽ ഡോ. ഔഗേൻ മാർ കുറിയാക്കോസ് മെത്രാപ്പോലീത്താ, എൻ. മുരളീധര പണിക്കർ, ഷീലാ പോൾ, WMC മിഡിൽ ഈസ്റ്റ് റീജിയൺ പ്രസിഡണ്ട് ഷൈൻ ചന്ദ്രസേനൻ, സുരേഷ് ബാബു, അനിൽ വാര്യർ എന്നിവർ പ്രസംഗിച്ചു. യു.എ.ഇ – ലെ വിദ്യാഭ്യാസ മേഖലയിൽ ദീർഘകാലമായി സേവനം അനുഷ്ഠിക്കുന്ന ഡോ. അബ്ദുൾ മജീദിന് പുരസ്‌കാരം നൽകി ചടങ്ങിൽ ആദരിച്ചു. യു.എ.ഇ – ലെ വിവിധ പ്രവാസി സംഘടനകളുടെ (സേവനം -യു.എ.ഇ, എൻ.എസ്. എസ് അജ്‌മാൻ, ക്ഷത്രീയ ക്ഷേമ സഭ, ചെട്ടികുളങ്ങര അമ്മ പ്രവാസി സേവാസമിതി, അനന്തപുരി പ്രവാസി കൂട്ടായ്‌മ, മാർ ക്രിസോസ്‌റ്റം ഫൌണ്ടേഷൻ) പ്രതിനിധികൾക്ക് അശ്വതി തിരുനാള്‍ ഗൗരിലക്ഷ്മി ഭായി കൈയൊപ്പിട്ട പുസ്തകങ്ങൾ നൽകി.