വിജയപുരം പഞ്ചായത്ത് പ്രസിഡന്റിന്റെ മകൻ ബംഗളൂരുവിൽ ലിഫ്റ്റിൽ നിന്ന് വീണ് മരിച്ച സംഭവം; മൃതദേഹം പോസ്റ്റ് മോർട്ടം ചെയ്യുന്നതിനിടെ കാണാതായ സഹോദരനായി തിരച്ചിൽ തുടരുന്നു; ആശങ്കയോടെ ബന്ധുക്കൾ

കോട്ടയം: വിജയപുരം പഞ്ചായത്ത് പ്രസിഡന്റിന്റെ മകന്റെ നിര്യാണത്തിൽ നാട് വിറങ്ങലിച്ചു നിൽക്കെ ഞെട്ടലായി മൂത്ത സഹോദരന്റെ തിരോധാനം..! ബാംഗ്ലൂരിൽ ലിഫ്റ്റ് നന്നാക്കുന്നതിനിടെ കെട്ടിടത്തിന്റെ മുകളിൽ നിന്ന് വീണ് മരിച്ച നിലയിൽ കണ്ടെത്തിയ വിജയപുരം ഗ്രാമ പഞ്ചായത്ത് പ്രസിഡന്റ് കോട്ടയം വടവാതൂർ വള്ളോംപറമ്പിൽ
വി.ടി സോമൻ കുട്ടിയുടെ മകൻ ശരൺ ജി. സോമന്റെ (26) പോസ്റ്റ് മോർട്ടം നടപടികൾക്കിടെയാണ് ശരണിന്റെ മൂത്ത സഹോദരനെ ബംഗളൂരുവിൽ വച്ച് കാണാതായത്.

ബാംഗ്ലൂരിൽ ലിഫ്റ്റ് ടെക്‌നീഷ്യനായി ജോലി ചെയ്തു വരികയായിരുന്നു ശരൺ. ജോലി സംബന്ധമായി കെട്ടിടത്തിന്റെ എട്ടാം നിലയിൽ ലിഫ്റ്റ് നന്നാക്കുന്നതിനിടെ അബദ്ധത്തിൽ താഴേക്ക് വീണാണ് ദാരുണമായ അന്ത്യം സംഭവിച്ചത്. ഞായറാഴ്ച്ച വൈകുന്നേരം 5.40 ഓടെയാണ് അപകടം.

വിവരം അറിഞ്ഞ് ബന്ധുക്കൾ ബാംഗ്ലൂരിലേക്ക് പുറപ്പെട്ടിട്ടു.
പോസ്റ്റ് മാർട്ടത്തിന് ശേഷം തിങ്കളാഴ്ച മൃതദേഹം ബന്ധുക്കൾ നാട്ടിലെത്തിക്കുകയും ചെയ്തു. ഇതിനിടെ ബംഗളൂരുവിൽ പോസ്റ്റ് മോർട്ടം നടപടികൾ പുരോഗമിക്കുന്നതിനിടെയാണ് സഹോദരൻ ശരത്ത് വി.സോമനെ കാണാതായത്. പോസ്റ്റ് മോർട്ടം നടപടികൾ പുരോഗമിക്കുന്നതിനിടെ കാറിനുള്ളിലിരിക്കുകയായിരുന്നു ശരത്ത്. ഈ സമയത്ത് ബന്ധുക്കളെല്ലാവരും ഒപ്പമുണ്ടായിരുന്നു. പോസ്റ്റ് മോർട്ടത്തിനു ശേഷം ബന്ധുക്കൾ മൃതദേഹം ഏറ്റുവാങ്ങുന്നതിനായി പോയി. ഇതിന് ശേഷം ബന്ധുക്കൾ തിരികെ മടങ്ങിയെത്തിയപ്പോൾ ശരത്തിനെ കാണാതാകുകയായിരുന്നു. തുടർന്നു പ്രദേശത്ത് അന്വേഷണം നടത്തിയെങ്കിലും ഇയാളെ കണ്ടെത്താൻ സാധിച്ചില്ല. തുടർന്നു ബന്ധുക്കൾ മൃതദേഹവുമായി നാട്ടിലേയ്ക്കു മടങ്ങി. ആദ്യം സ്വിച്ച് ഓഫ് ചെയ്തു വച്ചിരുന്ന ഫോൺ പിന്നീട് ഓൺ ചെയ്‌തെങ്കിലും കൃത്യമായ ലൊക്കേഷൻ ലഭിച്ചിട്ടില്ല. മരിച്ച ശരണിന്റെ മൃതദേഹം ജനുവരി 11 ബുധനാഴ്ച നടക്കും.
മാതാവ് പൊന്നമ്മ കെ.പി, (കെ എസ് എഫ് ഇ മണർകാട്)
സഹോദരങ്ങൾ: ശരത്ത് വി. സോമൻ, ശ്യാം വി. സോമൻ, ശ്രാവൺ വി. സോമൻ (ഇരട്ട സഹോദരൻ).