കൊച്ചിയിൽ പൊലീസിനെ കുഴക്കിയ കോപ്പർ സ്ട്രിപ്പ് മോഷണം; 21കാരൻ ഒടുവിൽ പിടിയിൽ

കൊച്ചി:കൊച്ചിയിലെ കോപ്പർ സ്ട്രിപ്പ് മോഷണ പരമ്പരയ്ക്ക് പിന്നിലെ പ്രതിയെ പൊലീസ് പിടികൂടി. അസം നാഗാവോൺ സ്വദേശിയായ നബി ഹുസൈൻ (21) ആണ് പാലാരിവട്ടം പൊലീസിൻ്റെ പിടിയിലായത്.എറണാകുളം വൈറ്റില ചളിക്കവട്ടത്തിലെ പ്രമുഖ വസ്ത്രവ്യാപാര ശാലയിലാണ് വലിയ തോതിലുള്ള മോഷണം നടന്നത്. ഇവിടെ നിന്നും ഏകദേശം 100 കിലോയോളം തൂക്കം വരുന്ന, ഒരു ലക്ഷത്തിലധികം രൂപ വിലവരുന്ന കോപ്പർ സ്ട്രിപ്പുകളാണ് പ്രതി തട്ടിയെടുത്തത്. കഴിഞ്ഞ ഓഗസ്റ്റ് മാസത്തിലാണ് സംഭവം നടന്നത്.സ്ഥാപനത്തിലെ മാനേജർ നൽകിയ പരാതിയുടെ അടിസ്ഥാനത്തിൽ പൊലീസ് നടത്തിയ അന്വേഷണത്തിൽ, പ്രതി ഒറ്റയ്ക്കാണ് മോഷണം നടത്തിയതെന്ന് സിസിടിവി ദൃശ്യങ്ങൾ വ്യക്തമാക്കുന്നു.

മുൻപും മോഷണങ്ങളിൽ പങ്കാളി

നഗരത്തിലെ വിവിധ ഫ്ലാറ്റുകളിലും ബഹുനില കെട്ടിടങ്ങളിലും എർത്തിംഗിനായി സ്ഥാപിച്ചിരുന്ന കോപ്പർ സ്ട്രിപ്പുകളും ഇയാൾ നേരത്തെ മോഷ്ടിച്ചിട്ടുണ്ടെന്ന് പൊലീസ് വ്യക്തമാക്കി. നഗരത്തിലെ 300ഓളം സിസിടിവി ദൃശ്യങ്ങൾ പരിശോധിച്ച ശേഷമാണ് പ്രതിയുടെ തിരിച്ചറിവ് നടത്തിയത്.ആദ്യം പെരുമ്പാവൂരിൽ ആയിരുന്നു താമസം. പിന്നീട് ആലുവ കമ്പനി പടിയിലേക്ക് താമസം മാറ്റിയ പ്രതി, നഗരത്തിൽ നിന്ന് ആക്രി സാധനങ്ങൾ ശേഖരിക്കുന്ന ജോലി ചെയ്യുന്നുണ്ടായിരുന്നു. ഈ വഴി ഉപയോഗിച്ച് സ്ഥലങ്ങൾ നിരീക്ഷിച്ച ശേഷമാണ് രാത്രി സമയങ്ങളിൽ മോഷണം നടത്തിയത്.

മോഷണ രീതി

കെട്ടിടങ്ങളുടെ പവർ യൂണിറ്റുകളിൽ നിന്നും എർത്തിംഗിനായി സ്ഥാപിച്ചിരുന്ന കോപ്പർ സ്ട്രിപ്പുകൾ, ബാഗിൽ കരുതിയിരുന്ന ടൂളുകൾ ഉപയോഗിച്ച് അഴിച്ച് ബാഗിലാക്കി കടത്തുകയായിരുന്നു. വസ്ത്രവ്യാപാര സ്ഥാപനത്തിൽ നിന്നുമുള്ള മോഷണം പല ഘട്ടങ്ങളിലായാണ് നടന്നത്. ഇതിന്റെ ഒരു ഭാഗം പൊലീസ് കണ്ടെത്തിയിട്ടുണ്ട്.

പ്രത്യേക സംഘം രൂപീകരിച്ചു

എറണാകുളം എസിപി പി. രാജ്‌കുമാറിന്റെ നിർദേശ പ്രകാരം പാലാരിവട്ടം ഇൻസ്പെക്ടർ രൂപേഷ് കെ.ആർ.ന്റെ നേതൃത്വത്തിൽ പ്രത്യേക സംഘം അന്വേഷണം നടത്തി പ്രതിയെ പിടികൂടുകയായിരുന്നു. സംഘം സബ്ബ് ഇൻസ്പെക്ടർമാരായ മിഥുൻ മോഹൻ, സാബു എസ്., എ.എസ്.ഐ മാരായ ഇഗ്നേഷ്യസ് പി.എ., ഷാനിവാസ് ടി.എം. എന്നിവരെയും മറ്റു പൊലീസുകാരെയും ഉൾപ്പെടുത്തി.കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.