കോട്ടയം: എരുമേലിയെ സ്വകാര്യ സ്ഥാപനത്തിലെ ജീവനക്കാരന്റെ മാല മോഷ്ടിക്കാൻ ശ്രമിച്ച കേസിൽ രണ്ടു പ്രതികൾ പിടിയിൽ. എരുമേലി ആറ്റാത്തറയിൽ വീട്ടിൽ മുഹമ്മദ് ഇബ്രാഹിം മകൻ മുനീർ (32), എരുമേലി നെല്ലിത്താനം വീട്ടിൽ അബ്ദുൽ റഫീഖ് മകൻ മുബാറക്ക് എ റഫീഖ് (24) എന്നിവരെയാണ് എരുമേലി പോലീസ് അറസ്റ്റ് ചെയ്തത്. ഇവർ ഇന്നലെ വൈകുന്നേരം എരുമേലിയിൽ ഉള്ള സ്വകാര്യ പണമിടപാട് സ്ഥാപനത്തിലെ ജീവനക്കാരനായ വിനീഷ് എന്നയാളുടെ മാലയാണ് മോഷ്ടിക്കാൻ ശ്രമിച്ചത്.
പ്രതികൾ രണ്ടുപേരും ചേർന്ന് ഇയാൾ ജോലി ചെയ്യുന്ന സ്ഥാപനത്തിലേക്ക് വൈകുന്നേരത്തോടു കൂടി പണമിടപാട് നടത്തുന്നതിന് എന്ന വ്യാജേന ചെല്ലുകയും കൗണ്ടറിൽ ഇരുന്ന വിനീഷിന്റെ കയ്യിൽ ബലമായി പിടിച്ചതിനു ശേഷം മാല പൊട്ടിച്ചെടുക്കാൻ ശ്രമിക്കുകയും ചെയ്തു. തുടർന്ന് വിനീഷ് ഒച്ചവെക്കുകയും ബഹളം കേട്ട് കൂടെയുള്ള സഹപ്രവർത്തകർ വന്നപ്പോഴേക്കും പ്രതികൾ സ്ഥാപനത്തിൽ നിന്നും ഇറങ്ങിയോടി കാറിൽ കയറി കടന്നുകളയുകയുമായിരുന്നു. ഇയാളുടെ പരാതിയുടെ അടിസ്ഥാനത്തിൽ ജില്ലാ പോലീസ് മേധാവി കെ കാർത്തിക്കിന്റെ നേതൃത്വത്തിലുള്ള അന്വേഷണസംഘം പ്രതികൾ ഇരുവരെയും മണിക്കൂറുകൾക്കകം തന്നെ പിടികൂടുകയായിരുന്നു. പ്രതികളിൽ ഒരാളായ മുബാറക്കിന് എരുമേലി സ്റ്റേഷനിൽ തന്നെ വധശ്രമം,അടിപിടി തുടങ്ങി ഏഴ് കേസുകളും ,മുനീറിന് എരുമേലി,വെച്ചൂച്ചിറ ,തൃക്കാക്കര, എന്നീ സ്റ്റേഷനുകളിലും കേസുകൾ നിലവിലുണ്ട് . എരുമേലി സ്റ്റേഷൻ ഹൗസ് ഓഫിസർ ഇൻസ്‌പെക്ടർ അനിൽ കുമാർ, എസ്.ഐ. മാരായ അനീഷ് എം.എസ്, അസീസ് , സുരേഷ് ബാബു, എ.എസ്.ഐ രാജേഷ്, സി.പി.ഓ മനോജ് കുമാർ എന്നിവരാണ് അന്വേഷണ സംഘത്തിലുണ്ടായിരുന്നത്.
