പത്തനംതിട്ട: ശബരിമല തീർത്ഥാടകർ സഞ്ചരിച്ച വാഹനം പത്തനംതിട്ട ളാഹയിൽ മറിഞ്ഞുണ്ടായ അപകടത്തിൽ നാൽപ്പതു തീർത്ഥാടകർക്ക് പരിക്കേറ്റു. അപകടത്തിൽപ്പെട്ട ഒരു കുട്ടിയുടെ നില ഗുരുതരമാണ്. ശനിയാഴ്ച രാവിലെ 8.40 നാണ് പത്തനംതിട്ട ളാഹയിൽ ശബരിമല തീർത്ഥാടകർ സഞ്ചരിച്ച ബസ് നിയന്ത്രണം വിട്ട് റോഡിനു കുറുകെ മറിഞ്ഞത്. അപകടത്തിൽ ബസിനുള്ളിൽ പത്തു തീർത്ഥാടകർ കുടുങ്ങിക്കിടന്നിരുന്നു. മോട്ടോർ വാഹന വകുപ്പ് ഉദ്യോഗസ്ഥരും ഇവിടെ എത്തിയ പൊലീസ് സംഘവും ചേർന്നാണ് ഇവരെ രക്ഷിച്ചത്. പരിക്കേറ്റവരെ പത്തനംതിട്ട ജനറൽ ആശുപത്രിയിൽ പ്രവേശിപ്പിച്ചു. അപകടത്തിൽ പരിക്കേറ്റ ഒരാളുടെ നില ഗുരുതരമായി തുടരുന്നു. അപകടത്തെ തുടർന്നു റോഡിൽ മറിഞ്ഞു കിടന്ന സ്വകാര്യ ബസ് നീക്കം ചെയ്യാനുള്ള നടപടികൾ ആരംഭിച്ചിട്ടുണ്ട്. ക്രെയിൻ ഉപയോഗിച്ച് ബസ് ഉയർത്തി മാറ്റാനാണ് നീക്കം നടക്കുന്നത്.
Advertisements
