കോട്ടയം : കോട്ടയം എം സി റോഡിൽ കാരിത്താസ് ആശുപത്രി ജംഗ്ഷനിൽ അമിതവേഗത്തിൽ എത്തിയ ബൈക്ക് കാറിൽ ഇടിച്ച് രണ്ട് യുവാക്കൾക്ക് പരിക്ക്. പരിക്കേറ്റ യുവാക്കളെ കോട്ടയം കാരിത്താസ് ആശുപത്രിയിൽ പ്രവേശിപ്പിച്ചു. ഇരുവരുടെയും പരിക്ക് ഗുരുതരമാണെന്നാണ് ലഭിക്കുന്ന വിവരം. ബുധനാഴ്ച വൈകിട്ട് ആറരയ്ക്ക് ശേഷം എം സി റോഡിൽ കാരിത്താസ് ആശുപത്രി ജംഗ്ഷനിൽ ആയിരുന്നു അപകടം.
ഏറ്റുമാനൂർ ഭാഗത്ത് നിന്നും അമിതവേഗത്തിൽ എത്തിയ ബൈക്ക്, നിയന്ത്രണം നഷ്ടമായി എതിർ ദിശയിൽ നിന്നും എത്തിയ കാറിൽ ഇടിക്കുകയായിരുന്നു. കോട്ടയം ഭാഗത്തുനിന്നും എത്തിയ കാർ കിടങ്ങൂർ ഭാഗത്തേക്ക് പോകുന്നതിനായി കാരിത്താസ് ആശുപത്രിയുടെ മുന്നിലൂടെയുള്ള ഓൾഡ് എം സി റോഡിലൂടെ തിരിയുകയായിരുന്നു. ഇൻഡിക്കേറ്റർ ഇട്ട് തിരിഞ്ഞ കാറിൽ അമിത വേഗത്തിൽ എത്തിയ ബൈക്ക് ഇടിച്ച് കയറുകയായിരുന്നു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ഓടിക്കൂടിയ നാട്ടുകാരും അപകട വിവരമറിഞ്ഞ് എത്തിയ ഹൈവേ പോലീസ് സംഘവും ചേർന്നാണ് പരിക്കേറ്റ യുവാക്കളെ കോട്ടയം കാരിത്താസ് ആശുപത്രിയിൽ എത്തിച്ചത്. അപകടത്തെ തുടർന്ന് കോട്ടയം എംസി റോഡിൽ ഗതാഗതക്കുരുക്കും ഉണ്ടായി.
