ചെന്നൈ: ഐപിഎല്ലില് സഞ്ജു സാംസണിന്റെ വെടിക്കെട്ട് സെഞ്ച്വറിയുടെ ആവേശത്തില് ചെന്നൈ സൂപ്പർ കിംഗ്സ് ഇന്ന് കൊല്ക്കത്ത നൈറ്റ് റൈഡേഴ്സിനെ നേരിടാനിറങ്ങുന്നു. തുടർ തോല്വികള്ക്ക് ശേഷം സഞ്ജുവിന്റെ സെഞ്ചുറി കരുത്തില് ഡല്ഹിക്കെതിരെ നേടിയ തകർപ്പൻ ജയം സിഎസ്കെയ്ക്ക് വലിയ ആത്മവിശ്വാസമാണ് നല്കുന്നത്. മറുവശത്ത്, കളിച്ച മത്സരങ്ങളിലെല്ലാം പരാജയപ്പെട്ട് പോയിന്റ് പട്ടികയില് അവസാന സ്ഥാനത്തുള്ള കൊല്ക്കത്ത സീസണിലെ ആദ്യ ജയം തേടിയാണ് ചെപ്പോക്കിലിറങ്ങുന്നത്.
ചെപ്പോക്കിലെ കറുത്ത കളി മണ്ണില് തീർത്ത പിച്ചില് മറ്റൊരു ബാറ്റിംഗ് പൂരമാണ് ആരാധകര് പ്രതീക്ഷിക്കുന്നത്. സിഎസ്കെ ജേഴ്സിയില് തന്റെ ആദ്യ സെഞ്ച്വറി കുറിച്ച സഞ്ജു സാംസണ് ഇന്നും ബാറ്റിംഗില് വെടിക്കെട്ട് തുടരുമോ എന്ന് ആരാധകർ ഉറ്റുനോക്കുന്നു. കൊല്ക്കത്തയുടെ സുനില് നരെയ്നെതിരെ സഞ്ജുവിന് അത്ര മികച്ച റെക്കോർഡല്ല ഉള്ളത്. അതുകൊണ്ട് തന്നെ സഞ്ജുവിനെ തുടക്കത്തിലെ പൂട്ടാൻ കൊല്ക്കത്ത പവര് പ്ലേയില് തന്നെ നരെയ്നെ പരീക്ഷിച്ചേക്കുമെന്നാണ് കരുതുന്നത്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
കഴിഞ്ഞ മത്സരങ്ങളിലേതുപോലെ പേസർമാർക്ക് പിച്ചില് നിന്ന് തുടക്കത്തില് നേരിയ സഹായം ലഭിച്ചേക്കാം. നേര്ക്കുനേര് പോരാട്ടങ്ങളില് ചെന്നൈക്ക് വ്യക്തമായ ആധിപത്യമുണ്ട്. ആകെ 31 മത്സരങ്ങള് കളിച്ചതില് ചെന്നൈ 20 കളികള് ജയിച്ചപ്പോള് കൊല്ക്കത്ത ജയിച്ചത് 11 എണ്ണത്തില് മാത്രമാണ്. എന്നാല് 2022-ന് ശേഷമുള്ള കണക്കുകള് പരിശോധിച്ചാല് ഇരു ടീമുകളും 3-3 എന്ന നിലയില് തുല്യശക്തികളാണ്.
കഴിഞ്ഞ മത്സരത്തിലേതുപോലെ ടോസ് നേടിയാല് ആദ്യം ബാറ്റ് ചെയ്യാന് തന്നെയാകും ചെന്നൈ നായകന് റുതുരാജ് ഗെയ്ക്വാദിന്റെ തീരുമാനം. ചെന്നൈ നിരയില് എം.എസ്. ധോണി ഇന്നും കളിച്ചേക്കില്ലെന്നാണ് സൂചന. നായകന് റുതുരാജിന്റെ മോശം ഫോമാണ് ചെന്നൈയുടെ പ്രധാന തലവേദന. കൊല്ക്കത്തക്കായി സുനില് നരെയ്ൻ ഓപ്പണറായി തിരിച്ചെത്തിയേക്കുമെന്നാണ് കരുതുന്നത്. പരിക്കിലായിരുന്ന മതീഷ പതിരണ ഫിറ്റ്നസ് വീണ്ടെടുത്തെങ്കിലും ചെന്നൈക്കെതിരെ ഇന്ന് കളിക്കുമോ എന്നത് സംശയമാണ്.
ചെന്നൈ സൂപ്പര് കിംഗ്സ് സാധ്യതാ ടീം: റുതുരാജ് ഗെയ്ക്വാദ് (ക്യാപ്റ്റൻ), സഞ്ജു സാംസണ് , ആയുഷ് മാത്രെ, സർഫറാസ് ഖാൻ, ഡെവാള്ഡ് ബ്രെവിസ്, ശിവം ദുബെ, ജാമി ഓവർട്ടണ്, അക്കീല് ഹൊസൈൻ, നൂർ അഹമ്മദ്, ഖലീല് അഹമ്മദ്, അൻഷുല് കംബോജ്, ഗുർജപ്നീത് സിംഗ്.
കൊല്ക്കത്ത നൈറ്റ് റൈഡേഴ്സ് സാധ്യതാ ടീം: ഫിൻ അല്ലൻ, സുനില് നരെയ്ൻ, അംഗ്രിഷ് രഘുവംശി, കാമറൂണ് ഗ്രീൻ, വെങ്കിടേഷ് അയ്യർ, റിങ്കു സിംഗ്, ആന്ദ്രെ റസല്, വരുണ് ചക്രവർത്തി/അനു കൂല് റോയ്, വൈഭവ് അറോറ, ചേതൻ സക്കരിയ.