‘കടിഞ്ഞൂലുകളുടെ സംഹാരം’; യെമനെതിരെ ഇസ്രായേൽ യുദ്ധമന്ത്രിയുടെ ഭീഷണി

യെമൻ ∶ യെമൻ തലസ്ഥാനമായ സന്ആയിലെ വൈദ്യുതി നിലയങ്ങളും ഇന്ധന ഡിപ്പോകളും ലക്ഷ്യമിട്ട് നടത്തിയ ഇസ്രായേലി വ്യോമാക്രമണത്തിന് പിന്നാലെ, യുദ്ധമന്ത്രി ഇസ്രായേൽ കാറ്റ്‌സ് ഭയാനകമായ ഭീഷണി പുറപ്പെടുവിച്ചു. “കടിഞ്ഞൂലുകളുടെ സംഹാരം” എന്ന ബൈബിളിലെ പരാമർശം ഉദ്ധരിച്ച് കുട്ടികളടക്കമുള്ള സാധാരണക്കാരെയാണ് ഇനി ലക്ഷ്യമിടുന്നതെന്ന സൂചനയാണ് കാറ്റ്‌സ് നൽകിയത്.ആക്രമണത്തെ തുടർന്ന് സന്ആയിലെ വലിയ മേഖലകൾ ഇരുട്ടിലായി. സാധാരണ ജനങ്ങൾ താമസിക്കുന്ന പ്രദേശങ്ങളിൽ തീയും പുകയും ഉയരുന്ന ദൃശ്യങ്ങൾ പുറത്തുവന്നിട്ടുണ്ട്.

ഗസയിൽ നടത്തുന്ന വംശഹത്യയെ ന്യായീകരിക്കാൻ ഇസ്രായേൽ നേതാക്കൾ ആവർത്തിച്ച് ഉപയോഗിക്കുന്ന മതപരമായ ദൃശ്യാഭാസങ്ങളുമായി ഇതിന് സാമ്യമുണ്ടെന്നാണ് അന്താരാഷ്ട്ര നിരീക്ഷകർ ചൂണ്ടിക്കാണിക്കുന്നത്.ഗസയിൽ ഇതുവരെ 62,000ത്തിലധികം ഫലസ്തീനികളെയാണ് ഇസ്രായേൽ കൊന്നൊടുക്കിയത്. ഇപ്പോൾ യുദ്ധം യെമനിലേക്കും വ്യാപിപ്പിക്കാനാണ് നീക്കം. സിവിലിയൻ അടിസ്ഥാന സൗകര്യങ്ങളെയും ഉപജീവന മാർഗങ്ങളെയും ലക്ഷ്യമിട്ട് ആക്രമണം നടത്തുമെന്ന് കാറ്റ്‌സിന്റെ പ്രസ്താവന വ്യക്തമാക്കുന്നു. കുട്ടികളാണ് അവരുടെ പ്രധാന ലക്ഷ്യമെന്ന് സൂചന നൽകുന്ന പ്രസ്താവന മനുഷ്യാവകാശ സംഘടനകളുടെ പ്രതിഷേധത്തിന് ഇടയാക്കിയിട്ടുണ്ട്.

ബൈബിളിലെ ‘കടിഞ്ഞൂലുകളുടെ സംഹാരം’

എബ്രായ ബൈബിളിലെയും ക്രിസ്ത്യാനികളുടെ പഴയ നിയമത്തിലെയും പുറപ്പാട് പുസ്തകത്തിലാണ് “കടിഞ്ഞൂലുകളുടെ സംഹാരം” പരാമർശിക്കപ്പെടുന്നത്. ഫറോവിന്റെ ചെറുത്തുനിൽപ്പിനോട് പ്രതികരിച്ച് ഈജിപ്തിലെ എല്ലാ കടിഞ്ഞൂൽ കുട്ടികളുടെയും മരണത്തിന് കാരണമായ ദിവ്യവിധിയായിരുന്നു അത്. എന്നാൽ, ഇസ്രായേൽ ഇപ്പോൾ ആ രൂപകം ഗസയിലെയും യെമനിലെയും സാധാരണ ജനങ്ങൾക്കെതിരെ നടത്തിയ കൂട്ടക്കൊലകൾക്ക് രാഷ്ട്രീയ.മതപരമായ ന്യായീകരണമായി ഉപയോഗിക്കുന്നു.

അന്താരാഷ്ട്ര പ്രതിഷേധം

ഗസയിൽ നടന്നുകൊണ്ടിരിക്കുന്ന ആക്രമണങ്ങളെ “വംശഹത്യ” എന്ന് വിശേഷിപ്പിച്ച ഐക്യരാഷ്ട്രസഭ വിദഗ്ധരും അന്താരാഷ്ട്ര നിയമ വിദഗ്ധരും കാറ്റ്‌സിന്റെ പ്രസ്താവനയെ ശക്തമായി അപലപിച്ചു.ഇസ്രായേൽ നേതാക്കളുടെ മതപരമായ ഭാഷ, വംശീയ ഉന്മൂലനത്തിന്‍റെ വ്യക്തമായ തെളിവാണ് എന്നും വിമർശകർ മുന്നറിയിപ്പ് നൽകി.

അതേസമയം, അമേരിക്ക ഉൾപ്പെടെ പാശ്ചാത്യരാജ്യങ്ങൾ നൽകുന്ന സൈനികവും നയതന്ത്രപരവുമായ പിന്തുണ കാരണം ഇസ്രായേലിനെതിരെ അന്താരാഷ്ട്ര തലത്തിൽ ശക്തമായ നടപടികൾ ഒന്നും ഉണ്ടാകുന്നില്ല. ഇതാണ് ഇത്തരം വിവാദ പ്രസ്താവനകൾക്കും ക്രൂരമായ ആക്രമണങ്ങൾക്കും ഇസ്രായേൽ നേതൃത്വം കൂടുതൽ ധൈര്യപ്പെടുന്നതിന് കാരണമാകുന്നത്.