കോട്ടയം ജില്ലയിൽ പെരുമഴ; പാലായിലും കടുത്തുരുത്തിയിലും കോട്ടയം നഗരത്തിലും പലയിടത്തും വെള്ളക്കെട്ട്; കുറവിലങ്ങാട് ടൗണിൽ ജല നിരപ്പ് ക്രമാതീതമായി ഉയർന്നു

കോട്ടയം ജില്ലയിലെ വിവിധ
പ്രദേശങ്ങളിൽ നിന്നും
ജാഗ്രതാ ലൈവ് റിപ്പോർട്ടർമാർ
സമയം – വൈകിട്ട് 05.30

കോട്ടയം: കോട്ടയം ജില്ലയിലെ വിവിധ സ്ഥലങ്ങളിൽ ഉച്ചയ്ക്ക് ശേഷം കനത്ത മഴ തുടരുന്നു. ജില്ലയിൽ പാലാ, കടുത്തുരുത്തി, കുറവിലങ്ങാട്, ചങ്ങനാശേരി, കോട്ടയം നഗരം എന്നിവിടങ്ങളിലെല്ലാം കനത്ത മഴ തുടരുകയാണ്. മഴ ശക്തമായ നിലയിൽ തുടർന്നതോടെ റോഡിൽ പലയിടത്തും വെള്ളക്കെട്ട് ഉണ്ടായിട്ടുണ്ട്. കുറവിലങ്ങാട് ടൗണിൽ ഈ മഴയിലും റോഡിൽ വെള്ളംകെട്ടി നിന്നു. ജില്ലയിൽ പല സ്ഥലത്തും മഴ കനക്കുന്നത് അപകട ഭീതി ഉർത്തിയിട്ടുണ്ട്.

ചൊവ്വാഴ്ച രാവിലെ കാലാ വസ്ഥ നിരീക്ഷണ വിഭാഗം നൽകിയ മുന്നറിയിപ്പ് നിർദേശത്തിൽ കനത്ത മഴയില്ലെന്നായിരുന്നു അറിയിച്ചിരുന്നത്. എന്നാൽ, മഴ ശക്തമായതോടെ ജില്ലയിൽ പല മേഖലകളിലും വെള്ളക്കെട്ട് ശക്തമായിട്ടുണ്ട്. പാലായിൽ ഉച്ച മുതൽ ആരംഭിച്ച കനത്ത മഴയിൽ പാലാ – ഏറ്റുമാനൂർ റോഡിൽ പലയിടത്തും വെള്ളക്കെട്ട് ഉണ്ടായിട്ടുണ്ട്. കുറവിലങ്ങാട് നഗരത്തിൽ വൻ വെള്ളക്കെട്ടാണ് ഉണ്ടായത്. ഇത് ഗുരുതരമായ ഗതാഗതക്കുരുക്കിന് ഇടയാക്കിയിട്ടുണ്ട്. ഈ സാഹചര്യത്തിൽ റോഡിൽ ഗതാഗതം തടസപ്പെട്ടിട്ടുണ്ട്.

കുറവിലങ്ങാട് ടൗണിൽ മുൻപും സമാന രീതിയിൽ വെള്ളപ്പൊക്കം ഉണ്ടായിട്ടുണ്ട്. കഴിഞ്ഞ തവണയുണ്ടായ കനത്ത മഴയിലും കുറവിലങ്ങാട് പ്രദേശത്ത് വൻ വെള്ളക്കെട്ട് ഉണ്ടായിരുന്നു. അശാസ്ത്രീയമായ റോഡ് നിർമ്മാണമാണ് ഇവിടെ വെള്ളക്കെട്ട് വർദ്ധിപ്പിച്ചതെന്ന് ആരോപണം ഉയർന്നിട്ടുണ്ട്. ഈ സാഹചര്യത്തിൽ അതീവ ജാഗ്രതാ നിർദേശവും നൽകിയിട്ടുണ്ട്. കോട്ടയം നഗരത്തിൽ പെയ്ത കനത്ത മഴയിൽ റോഡിൽ കുഴികൾ രൂപപ്പെട്ടിട്ടുണ്ട്. ഇതും വെള്ളക്കെട്ടിന് ഇടയാക്കിയിട്ടുണ്ട്.