കോഴിക്കോട്: കോഴിക്കോട് പണിക്കർ റോഡില്‍ ഓട്ടോ ഡ്രൈവറായ ശ്രീകാന്തിനെ വെട്ടിക്കൊന്ന കേസില്‍ പ്രതി അറസ്റ്റില്‍. വെള്ളയില്‍ സ്വദേശി ധനീഷ് ആണ് അറസ്റ്റിലായത്. ഇന്നലെ വൈകുന്നേരം വീട്ടില്‍ വച്ച്‌ കസ്റ്റഡിയില്‍ എടുക്കുകയായിരുന്നു. കൊലപാതകത്തിന് തലേദിവസം ശ്രീകാന്തിൻ്റെ കാർ കത്തിച്ചതും പ്രതി ധനീഷാണ്. പ്രതിയുടെ അമ്മയോട് ശ്രീകാന്ത് അപമര്യാദയായി പെരുമാറിയതാണ് വൈരാഗ്യത്തിന് കാരണമെന്നാണ് സൂചന. നേരത്തെ കൊലപാതക കേസില്‍ പ്രതിയായ ആളാണ് കൊല്ലപ്പെട്ട ശ്രീകാന്ത്. ഇന്നലെ പുലർച്ചയാണ് സംഭവം.
വീടിനു സമീപത്തെ പണിക്കർ റോഡില്‍ വച്ചാണ് 47 കാരനായ ശ്രീകാന്ത് കൊല്ലപ്പെട്ടത്. രാവിലെ ക്ഷേത്രത്തിലേക്ക് പോകുകയായിരുന്ന സ്ത്രീകളാണ് ആദ്യം കണ്ടത്. തുടർന്ന് നാട്ടുകാരെ വിവരമറിയിച്ചു. കഴിഞ്ഞദിവസം ശ്രീകാന്തിന്റെ കാർ ചിലർ തീ വെച്ച്‌ നശിപ്പിച്ചിരുന്നു. കൊലപാതകം നടത്തിയ ധനേഷ് തന്നെയാണ് ഇതിന് പിന്നിലെന്നും പൊലീസ് വ്യക്തമാക്കി. ഇതില്‍ പോലീസ് അന്വേഷണം തുടരുന്നതിനിടെയിലാണ് കൊലപാതകം. കുണ്ടുപറമ്ബ് പ്രഭാകരൻ വധക്കേസിലെ പ്രതിയാണ് ശ്രീകാന്ത്. സിസിടിവി ദൃശ്യങ്ങള്‍ കേന്ദ്രീകരിച്ചാണ് പൊലീസ് അന്വേഷണം ഊർജ്ജിതമാക്കിയത്.