എറണാകുളം:എറണാകുളം നോർത്ത് റെയില്‍വേ സ്‌റ്റേഷനിലെ പ്ലാറ്റ്ഫോമില്‍ സുരക്ഷാ ജീവനക്കാരെ മറികടന്ന് യാത്രക്കാർക്കിടയിലൂടെ ആഡംബര ബൈക്ക് അതിവേഗത്തില്‍ ഓടിച്ച്‌ യുവാവ്.റെയില്‍വേ പൊലീസും ആർ.പി.എഫ് ഉദ്യോഗസ്ഥരും പിന്തുടർന്നെങ്കിലും ബൈക്ക് ഉപേക്ഷിച്ച്‌ യുവാവ് കടന്നു. രണ്ടാം പ്ലാറ്റ്ഫോമിൽ ഇന്നലെ പുലർച്ചെ 4.40നായിരുന്നു സംഭവം. ബൈക്കോടിച്ച പെരുമ്പാവൂർ മുടിക്കല്‍ സ്വദേശി അജ്മലിനായി റെയില്‍വേ പൊലീസ് തെരച്ചില്‍ തുടങ്ങി. ഇയാള്‍ ഒളിവിലാണ്.നാലു ലക്ഷം രൂപ വിലയുള്ള ജി 310ആർ മോഡല്‍ ബി.എം.ഡബ്‌ള്യു ബൈക്ക് കസ്റ്റഡിയിലെടുത്തു. ഇത് കാക്കനാട് പടമുഗളിലെ ഇ.വി.എം എന്ന സ്ഥാപനത്തില്‍ നിന്ന് മൂന്നുദിവസം മുൻപ് ഇയാള്‍ വാടകയ്‌ക്ക് എടുത്തതാണെന്ന് കണ്ടെത്തി.
മണിക്കൂറിന് 65 രൂപ മുതലാണ് വാടക.പൂനെ-കന്യാകുമാരി എക്സ്‌പ്രസ് കടന്നുപോയതിന് തൊട്ടുപിന്നാലെയായിരുന്നു യുവാവിന്റെ പരാക്രമം. നിരവധി യാത്രക്കാർ ആ സമയം പ്ലാറ്റ്‌ഫോമിലുണ്ടായിരുന്നു. മറ്റൊരു ട്രെയിൻ ഈ സമയം സ്റ്റേഷനിലേക്ക് കടന്നുവരുന്നുണ്ടായിരുന്നു. സ്റ്റേഷന്റെ കിഴക്കുഭാഗത്ത് യാത്രക്കാർക്ക് കയറാനും ഇറങ്ങാനും വേണ്ടിയുള്ള ചെറിയ വിടവിലൂടെയാണ് ഇയാള്‍ ബൈക്കുമായി പ്ളാറ്റ്ഫോമിലേക്ക് കടന്നത്.സുരക്ഷാ ജീവനക്കാരി തടഞ്ഞെങ്കിലും നിറുത്തിയില്ല. അതോടെ പൊലീസുകാർ ബൈക്കിന് പിന്നാലെ ഓടി. പ്ളാറ്റ്ഫോം അവസാനിക്കുന്നിടത്ത് എത്തിയതോടെ താക്കോല്‍ ഉൗരിയെടുത്ത് ബൈക്ക് ഉപേക്ഷിച്ച്‌ യുവാവ് രക്ഷപ്പെട്ടു. ബൈക്ക് വാടകയ്ക്കെടുത്ത സ്ഥാപനത്തില്‍ നല്‍കിയ തിരിച്ചറിയല്‍ രേഖകളില്‍ നിന്നാണ് യുവാവിനെ തിരിച്ചറിഞ്ഞത്. ഇയാള്‍ ലഹരിക്കേസിലെ പ്രതിയാണെന്ന് സൂചനയുണ്ട്.അന്വേഷണം അട്ടിമറി സാദ്ധ്യതയിലേക്കുംസംഭവത്തില്‍ അട്ടിമറി സാദ്ധ്യത തള്ളാതെയാണ് റെയില്‍വേ പൊലീസ് അന്വേഷണം. ചുവന്ന നിറത്തിലുള്ള ഒരു ബാഗും അജ്മലിന്റെ പക്കലുണ്ടായിരുന്നു. മറ്റെന്തെങ്കിലും ഉദ്ദേശ്യത്തോടെയാണോ പ്ലാറ്റ്ഫോമിലേക്ക് ഇയാള്‍ ബൈക്കുമായി എത്തിയതെന്നാണ് അന്വേഷിക്കുന്നത്. ഇയാളെ പിടികൂടി ചോദ്യം ചെയ്താലെ കാരണം വ്യക്തമാകൂ. പ്ളാറ്റ്‌ഫോമിലെ സുരക്ഷാ വീഴ്ചയും അന്വേഷിക്കുന്നുണ്ട്.