മുക്കു പണ്ടം പകരം വെച്ച് ജ്വലറികളിൽ നിന്നും സ്വർണം കവർന്നിരുന്നത് മേഴ്‌സിയ്ക്ക് നിത്യത്തൊഴിൽ ;കോട്ടയത്തും പത്തനംതിട്ടയിലും സമാന കേസുകൾ

തിരുവല്ല : മുക്കു പണ്ടം പകരം വെച്ച് ജ്വലറികളിൽ നിന്നും സ്വർണ്ണക്കവർച്ച നടത്തി വന്നിരുന്ന 55 കാരി അറസ്റ്റിലായി.

പത്തനംതിട്ട കുമ്പളം പൊയ്കയിൽ ചെങ്ങറമുക്ക് പുലിമല നിരമേൽ വീട്ടിൽ മേഴ്സി മാത്യു ( ലിസി ) ആണ് തിരുവല്ല പോലീസിന്റെ പിടിയിലായത് .

തിരുവല്ല എസ് സി എസ് ജംഗ്ഷന് സമീപം പ്രവർത്തിക്കുന്ന എസ് പി ജ്വല്ലറിയിൽ നടത്തിയ കവർച്ചാ ശ്രമത്തിനിടെയാണ് മേഴ്സി പിടിയിലായത്.

ആഭരണം വാങ്ങാനെന്ന വ്യാജേന ജ്വലറികളിൽ എത്തി ആഭരണങ്ങൾക്ക് പകരമായി ഏകദേശം അതേ തൂക്കം വരുന്ന മുക്ക് പണ്ടങ്ങൾ വച്ച് സ്വർണം കവരുന്നതാണ് ഇവരുടെ രീതി.

വ്യാജ മോതിരം പകരം വെച്ച് സ്വർണ്ണ മോതിരം കവരാനുള്ള ശ്രമത്തിനിടെയാണ് ഇവർ പിടിയിലായത് .

ഇക്കഴിഞ്ഞ ഡിസംബർ മാസത്തിൽ മേഴ്സി ഇതേ ജ്വലറിയിൽ സമാനമായ തട്ടിപ്പ് നടത്തിയിരുന്നു.

സ്വർണത്തിൽ കുറവ് കണ്ടതിനെ തുടർന്ന് ജ്വലറിയിലെ സി സി ടി വി പരിശോധിച്ചതിൽ നിന്നും മേഴ്സിയെ തിരിച്ചറിഞ്ഞിരുന്നു. ചെറിയ അളവ്
സ്വർണം മാത്രം നഷ്ടപ്പെട്ടതിനാൽ ജ്വലറി ഉടമ അന്ന് പരാതി നൽകിയിരുന്നില്ല.

തുടർന്ന് വെള്ളിയാഴ്ച ഉച്ചയോടെ വീണ്ടും എത്തി സ്വർണം തട്ടാനുള്ള ശ്രമത്തിനിടെയാണ് ഇവർ പിടിയിലായത്.

കോട്ടയം ഈസ്റ്റ് പോലീസ് സ്റ്റേഷനിൽ മേഴ്സിക്കെതിരെ സമാനമായ കേസ് നിലവിലുണ്ടെന്ന് പോലീസ് പറഞ്ഞു.