മുഖ്യമന്ത്രിയും മന്ത്രിമാരും ഇന്ന് ലണ്ടനിൽ; ലോകകേരള സഭയുടെ ഭാഗമായുള്ള പരിപാടികളിൽ പങ്കെടുക്കും

ലണ്ടൻ: യൂറോപ്യൻ പര്യടനത്തിന്റെ ഭാഗമായി മുഖ്യമന്ത്രി പിണറായി വിജയനും മന്ത്രിമാരും ഇന്ന് ലണ്ടനിൽ സന്ദർശനം നടത്തുകയാണ്. ലോക കേരള സഭയുടെ ഭാഗമായുളള യൂറോപ്പ് -യു.കെ മേഖലാസമ്മേളനം ഇന്ന് ലണ്ടനിൽ നടക്കും. ലണ്ടനിലെ സെന്റ് ജെയിംസ് കോർട്ട് ഹോട്ടലിൽ ചേരുന്ന മേഖലാ സമ്മേളനം രാവിലെ 9ന് ( ഇന്ത്യൻ സമയം ഉച്ചയ്ക്ക് 1.30 ന്) മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. കഴിഞ്ഞ ജൂണിൽ തിരുവനന്തപുരത്ത് ചേർന്ന മൂന്നാം ലോക കേരള സഭയിൽ ഉയർന്ന നിർദ്ദേശങ്ങൾ നടപ്പിലാക്കുന്നതിനോടൊപ്പം ലോക കേരള സഭയുടെ പ്രവർത്തനങ്ങൾ വിപുലപ്പെടുത്തുന്നതും ലക്ഷ്യമിട്ടാണ് സമ്മേളനം ചേരുന്നത്.

യൂറോപ്യൻ മേഖലയിലെ ലോക കേരള സഭാ അംഗങ്ങളും, വിവിധ തൊഴിൽ മേഖലയിൽ നിന്നുളള ക്ഷണിക്കപ്പെട്ട അതിഥികളും സമ്മേളനത്തിൽ പങ്കെടുക്കും. സാമൂഹിക സാംസ്‌കാരിക രാഷ്ട്രീയ മേഖലകളിൽ കഴിവ് തെളിയിച്ച മലയാളികളും വിദ്യാർത്ഥി പ്രതിനിധികൾ, ആരോഗ്യ പ്രവർത്തകർ തുടങ്ങിയവരും ക്ഷണിതാക്കളാണ്.

നവകേരള നിർമ്മാണം പ്രതീക്ഷകളും സാദ്ധ്യതകളും പ്രവാസികളുടെ പങ്കും, വെജ്ഞാനിക സമൂഹ നിർമ്മിതിയും പ്രവാസ ലോകവും, ലോക കേരള സഭ പ്രവാസി സമൂഹവും സംഘടനകളും, യൂറോപ്യൻ കുടിയേറ്റം അനുഭവങ്ങളും വെല്ലുവിളികളും എന്നീ നാല് വിഷയങ്ങളിൽ സമ്മേളനത്തിൽ ചർച്ചകൾ നടക്കും.
ആസൂത്രണ ബോർഡ് വൈസ് ചെയർമാൻ പ്രൊഫ. വി.കെ. രാമചന്ദ്രൻ, നോർക്ക റൂട്ട്‌സ് റെസിഡന്റ് വൈസ് ചെയർമാൻ പി. ശ്രീരാമകൃഷ്ണൻ, സംസ്ഥാന ആസൂത്രണ ബോർഡ് അംഗം ഡോ.കെ.രവി രാമൻ, നോർക്ക റൂട്ട്‌സ് ഡയറക്ടർ ഡോ.എം.അനിരുദ്ധൻ, എന്നിവർ യഥാക്രമം ചർച്ചകൾക്ക് നേതൃത്വം നൽകും.

മേഖല സമ്മേളനത്തോടനുബന്ധിച്ച് വിപുലമായ പ്രവാസി മലയാളി സമ്മേളനവും സംഘടിപ്പിക്കുന്നുണ്ട്. വൈകുന്നേരം നാലിന് (ഇന്ത്യൻ സമയം രാത്രി 8.30ന് )നടക്കുന്ന പ്രവാസി പൊതുസമ്മേളനം മുഖ്യമന്ത്രിയും മറ്റു മന്ത്രിമാരും അഭിസംബോധന ചെയ്യും. മുഖ്യമന്ത്രിയെ കൂടാതെ മന്ത്രിമാരായ പി. രാജീവ്, വി. ശിവൻകുട്ടി, വീണാ ജോർജ്ജ് , നോർക്ക പ്രിൻസിപ്പൽ സെക്രട്ടറി സുമൻ ബില്ല, ഡൽഹിയിലെ സർക്കാർ ഒ.എസ്.ഡി വേണു രാജാമണി,നോർക്ക റൂട്ട്‌സ് വൈസ് ചെയർമാൻ എം. എ യൂസഫലി, ഡയറക്ടർമാരായ രവി പിളള, ആസാദ് മൂപ്പൻ, ഒ. വി മുസ്തഫ, സി.വി റപ്പായി, ജെ.കെ മേനോൻ, സി.ഇ.ഒ. കെ. ഹരികൃഷ്ണൻ നമ്ബൂതിരി, ജനറൽ മാനേജർ അജിത്ത് കോളശ്ശരി എന്നിവരും സമ്മേളനത്തിൽ പങ്കെടുക്കും.

ലോക കേരള സഭയുടെ നേതൃത്വത്തിൽ പ്രവാസി സഹകരണവും ഇടപെടലുകളും വർധിപ്പിക്കുവാൻ ലക്ഷ്യമിട്ടാണ് മേഖലാ സമ്മേളനങ്ങൾ ചേരുന്നത്. പ്രവാസികളുടെ പൊതുവായ പ്രശ്നങ്ങൾക്ക് പുറമേ വ്യത്യസ്ത ഭൂവിഭാഗങ്ങളിലുള്ളവരുടെ പ്രശ്ങ്ങൾകൂടി കേൾക്കാനും
പരിഹരിക്കാനും ലക്ഷ്യം വച്ചു കൊണ്ടാണ് മേഖലാ സമ്മേളനങ്ങൾ സംഘടിപ്പിക്കാൻ സർക്കാർ തീരുമാനമെടുത്തത്. രണ്ടാമത്തെ സമ്മേളനമാണ് ലണ്ടനിൽ നടക്കുന്നത്. ആദ്യ മേഖലാ സമ്മേളനം 2019 ൽ യുഎഇയിൽ നടന്നിരുന്നു.