കോഴിക്കോട്: ആവയവദാനം നിര്‍വ്വഹിച്ചവരുടെ ഓര്‍മ്മപുതുക്കാനും അവരോടുള്ള ആദരവ് സമര്‍പ്പിക്കുവാനുമായി ദേശീയ അവയവദാന ദിനത്തില്‍ കോഴിക്കോട് ആസ്റ്റര്‍ മിംസ് ട്രീ ഓഫ് ലൈഫ് എന്ന പദ്ധതി അവതരിപ്പിച്ചു. ആസ്റ്റര്‍ മിംസില്‍ സജ്ജീകരിച്ചിരിക്കുന്ന ട്രീ ഓഫ് ലൈഫില്‍ അവയവദാനം നിര്‍വ്വഹിച്ചവരുടെ ഓര്‍മ്മകളാണ് സ്ഥാനം പിടിച്ചിരിക്കുന്നത്. ആസ്റ്റര്‍ ഡി എം ഹെല്‍ത്ത് കെയര്‍ സ്ഥാപക ചെയര്‍മാനും എം ഡി യുമായ ഡോ. ആസാദ് മൂപ്പന്‍ ഉദ്ഘാടനം നിര്‍വ്വഹിച്ചു.
‘ ഒരു മനുഷ്യായുസ്സില്‍ ചെയ്യാന്‍ സാധിക്കുന്ന ഏറ്റവും വലിയ നന്മയാണ് അവയവദാനം. അതിന് തയ്യാറാകുന്ന വ്യക്തികളെ നമ്മള്‍ എന്നും ആദരിക്കണം. എന്ന് മാത്രമല്ല, ഇത്തരത്തില്‍ അവയവദാനം നിര്‍വ്വഹിച്ച വ്യക്തിയുടെ കുടുംബത്തെയും നമ്മള്‍ അംഗീകരിക്കുകയും ബഹുമാനിക്കുകയും ചെയ്യണം. ഇവരുടെ ആരോഗ്യ സംരക്ഷണത്തിലും പ്രത്യേകം താല്‍പര്യമെടുക്കേണ്ടതായിട്ടുണ്ട്. ഇത്തരത്തില്‍ അവയവദാനം നിര്‍വ്വഹിച്ചവരുടെ കുടുംബാംഗങ്ങളുടെ ആരോഗ്യ പരിരക്ഷ ഉറപ്പ് വരുത്താന്‍ പ്രത്യേക പ്രിവിലേജ് കാര്‍ഡ് നല്‍കുന്ന കാര്യം ആസ്റ്ററിന്റെ പരിഗണനയിലുണ്ട്’ ഉദ്ഘാടനം നിര്‍വ്വഹിച്ചുകൊണ്ട് ഡോ. ആസാദ് മൂപ്പന്‍ പറഞ്ഞു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
‘മരണ ശേഷവും ഈ ഭൂമിയില്‍ സാന്നിദ്ധ്യമായി നില്‍ക്കുവാന്‍ സാധിക്കുന്നു എന്നത് അവയവദാനത്തിന്റെ മാത്രം സവിശേഷതയാണ്. സ്വന്തം ജീവിത ശേഷവും മറ്റൊരാള്‍ക്ക് ജീവന്‍ നല്‍കാന്‍ സാധിക്കുന്നതിന്റെ പുണ്യം മറ്റൊന്നിനുമില്ല. അവയവദാനത്തിന് കൂടുതല്‍ പേര്‍ സ്വയം തയ്യാറായി വരുന്ന സാമൂഹിക സാഹചര്യം സൃഷ്ടിക്കുവാനായി നമുക്ക് ഒരുമിച്ച് ചേര്‍ന്ന് പ്രവര്‍ത്തിക്കണം’ പരിപാടിയുടെ അദ്ധ്യക്ഷത വഹിച്ചുകൊണ്ട് ആസ്റ്റര്‍ കേരള & ഒമാന്‍ റീജ്യണല്‍ ഡയറക്ടര്‍ ഫര്‍ഹാന്‍ യാസിന്‍ പറഞ്ഞു.