തിരുവോണസദ്യ ബുക്ക് ചെയ്തവരെ പട്ടിണിക്കിട്ട് കുടുംബശ്രീ യൂണിറ്റ്; പാത്രങ്ങളുമായി ചെന്നവർക്കും സദ്യ കിട്ടിയില്ല

വയനാട്:തിരുവോണനാളിൽ ഇലയിട്ടു സദ്യയുണ്ണാൻ കാത്തിരുന്നവരെ പട്ടിണിക്കിട്ട് കുടുംബശ്രീ യൂണിറ്റ്.നെൻമേനി പഞ്ചായത്തിൽ രജിസ്റ്റർ ചെയ്ത് പ്രവർത്തിക്കുന്ന ഒരു കുടുംബശ്രീ കേറ്ററിംഗ് യൂണിറ്റാണ് ബുക്കിംഗ് സ്വീകരിച്ചിട്ടും സദ്യ നൽകാതിരുന്നതെന്ന് പരാതി.ജില്ലയിൽ കുടുംബശ്രീ മിഷൻ വഴിയുള്ള ഓണസദ്യയെക്കുറിച്ച് മുൻപ് തന്നെ പ്രഖ്യാപിച്ചിരുന്നു. 28 വിഭവങ്ങൾ ഉൾപ്പെടുന്ന 300 രൂപ മുതൽ 16 വിഭവങ്ങൾ ഉൾപ്പെടുന്ന 180 രൂപ വരെയുള്ള നാലു തരത്തിലായിരുന്നു നിരക്ക്.

കല്പറ്റ, മാനന്തവാടി, ബത്തേരി, പനമരം ബ്ലോക്കുകളിലെ യൂണിറ്റുകൾ വഴിയാണ് വിതരണം നടത്തിയത്.ബത്തേരി ബ്ലോക്കിൽ ഓണസദ്യയുടെ ചുമതല ഏറ്റെടുത്ത യൂണിറ്റുകളിൽ ഒന്നായിരുന്നു നെൻമേനി പഞ്ചായത്തിലെ മഞ്ഞാടി കേന്ദ്രമായി പ്രവർത്തിക്കുന്ന യൂണിറ്റ്. വിവിധ പഞ്ചായത്തുകളിലും നഗരസഭയിലും നിന്ന് വൻതോതിൽ ഓർഡറുകൾ ലഭിച്ചിരുന്നു.

പ്രത്യേകിച്ച് ബത്തേരി നഗരസഭയിൽ നിന്ന് യൂണിറ്റുകൾ ചുമതല ഏറ്റെടുക്കാതിരുന്നതോടെ കൂടുതൽ ഓർഡറുകൾ മഞ്ഞാടിയിലേക്ക് എത്തുകയായിരുന്നു.എന്നാൽ തിരുവോണദിവസം രാവിലെ മുതൽ പലരും സദ്യയെക്കുറിച്ച് ചോദിച്ചപ്പോൾ “ഉടൻ എത്തിക്കും” എന്നായിരുന്നു മറുപടി. ഉച്ചയോടെ ചിലരെ പാത്രങ്ങളുമായി എത്താൻ നിർദേശിക്കുകയും ചെയ്തു. പക്ഷേ എത്തിച്ചേരുമ്പോഴും പലർക്കും സദ്യ കിട്ടിയില്ല. ലഭിച്ച ചിലർക്കു വിഭവങ്ങൾ അപൂർണ്ണമായിരുന്നു. വീടുകളിൽ എത്തിയ അതിഥികളുടെ മുന്നിൽ പലരും നാണംകെട്ട അവസ്ഥയിലായി.

പിന്നീട് ഹോട്ടലുകളിലും ആരാധനാലയങ്ങളിലും ഭക്ഷണം തേടിയാണ് പലരും തിരുവോണ വിശപ്പടി നിറച്ചത്.യൂണിറ്റുമായി ബന്ധപ്പെടാൻ ശ്രമിച്ചവരുടെ ഫോൺ കോളുകൾക്ക് മറുപടി ലഭിക്കാതിരുന്നതും ആരോപണം ശക്തമാക്കി. “ഒരു യൂണിറ്റിലെ വീഴ്ച കുടുംബശ്രീയുടെ പ്രതിഷ്ഠയ്ക്കു തന്നെ കേടു വരുത്തി. 10 ഓർഡറിൽ താഴെ സ്വീകരിക്കരുതെന്ന നിർദേശം നൽകിയിരുന്നു. എന്നാൽ അത് പാലിച്ചില്ല. സംഭവത്തെക്കുറിച്ച് അന്വേഷിക്കും,” എന്ന് ബത്തേരി ബ്ലോക്ക് കോ-ഓർഡിനേറ്റർ വ്യക്തമാക്കി.ബത്തേരി സ്വദേശികളായ നൂറനാൽ ജോർജ്, ശ്രീഹരി, ഹരികുമാർ, മാത്യൂസ് എന്നിവർ സദ്യ ബുക്ക് ചെയ്തിട്ടും കിട്ടാതെ വിഷമിച്ചവരിൽ ഉൾപ്പെടുന്നു. “ഒരിക്കൽ പോലും ഫോൺ വിളിച്ചപ്പോൾ ‘വന്നുകൊണ്ടിരിക്കുന്നു’ എന്നാണ് പറഞ്ഞിരുന്നത്. എന്നാൽ പിന്നീട് വിളിച്ചപ്പോൾ ഫോൺ എടുക്കാതെയായി. ഒടുവിൽ ഹോട്ടലുകളിൽ നിന്ന് ഭക്ഷണം വാങ്ങേണ്ടി വന്നു,” എന്നാണ് ഇവരുടെ പ്രതികരണം.