കൊച്ചി : ഈസ്റ്റ് ബംഗാള്‍ എഫ്‌സിക്കെതിരെ ഇന്ന് നടക്കുന്ന ഐഎസ്‌എല്‍ മത്സരവും ക്യാപ്റ്റൻ അഡ്രിയാൻ ലൂണയ്ക്ക് അസുഖം കാരണം നഷ്ടമാകുമെന്ന് കേരള ബ്ലാസ്റ്റേഴ്സ് ഹെഡ് കോച്ച്‌ മൈക്കല്‍ സ്റ്റാഹ്രെ സ്ഥിരീകരിച്ചു.പഞ്ചാബ് എഫ്‌സിക്കെതിരായ സീസണ്‍ ഓപ്പണറും ലൂണയ്ക്ക് നഷ്ടമായിരുന്നു.
“ലൂണ ഇതുവരെ പൂർണ്ണമായി സുഖം പ്രാപിച്ചിട്ടില്ല, അതിനാല്‍ അവൻ ഞായറാഴ്ച കളിക്കില്ല. അടുത്ത മത്സരത്തില്‍ അവനെ കാണുമെന്ന് ഞങ്ങള്‍ പ്രതീക്ഷിക്കുന്നു,” സ്റ്റാഹ്രെ പറഞ്ഞു. ലൂണയില്ലെങ്കിലും ടീമിന് മികച്ച പ്രകടനം നടത്താനാകുമെന്ന് ഇടക്കാല ക്യാപ്റ്റൻ മിലോസ് ഡ്രിഞ്ചിച് ആത്മവിശ്വാസം പ്രകടിപ്പിച്ചു. “ഞങ്ങള്‍ക്ക് ലൂണയെ വേണം, എന്നാല്‍ മറ്റുള്ളവർ മുന്നോട്ട് വരണം. കഴിഞ്ഞ വർഷം, അവനില്ലാതെ പോലും, ഞങ്ങള്‍ക്ക് ചില വലിയ വിജയങ്ങള്‍ ഉണ്ടായിരുന്നു,” അദ്ദേഹം കൂട്ടിച്ചേർത്തു. പഞ്ചാബ് എഫ്‌സിയോട് 2-1ന് തോറ്റ ബ്ലാസ്റ്റേഴ്സ് സീസണിലെ ആദ്യ ജയമാണ് ഇന്ന് ലക്ഷ്യമിടുന്നത്.