കണ്ണൂർ : കെ സുധാകരൻ ചെയ്‌തത്‌ ഗുരുതരമായ കുറ്റമെന്ന് എല്‍ഡിഎഫ് കണ്‍വീനര്‍ ഇ പി ജയരാജൻ. കെപിസിസി പ്രസിഡന്റ് സ്ഥാനത്ത് നിന്നും മാറി അന്വേഷണം നേരിടാൻ സുധാകരൻ തയ്യാറാവണം.അപകടകരമായ അഴിമതിയില്‍ ന്യായീകരണം നടത്താനുള്ള ശ്രമമാണ് നടത്തുന്നത്. തെറ്റുകള്‍ ന്യായികരിക്കാൻ ശ്രമിക്കുന്നത് അപലപനീയമെന്നും ജയരാജൻ വ്യക്തമാക്കി.
അതേസമയം ദേശാഭിമാനി മുന്‍ അസോസിയേറ്റ് എഡിറ്റര്‍ ജി.ശക്തിധരന്‍ ഫേസ്ബുക്കിലൂടെ ഉന്നയിച്ച ആരോപണങ്ങള്‍ ഇ പി ജയരാജന്‍ തള്ളി.കൈതോലപ്പായയില്‍ പണം പൊതിഞ്ഞു കൊണ്ടുപോയെന്ന ആരോപണം അടിസ്ഥാന രഹിതമാണ്.
കോണ്‍ഗ്രസ്‌ ഇത് പ്രചരിപ്പിക്കുന്നത് നേതാക്കള്‍ക്കെതിരായ കുറ്റങ്ങള്‍ മറച്ചുവെക്കാനാണ്. അഴിമതി ആരോപണങ്ങളെ ഇതുകൊണ്ട് മായ്ച്ചു കളയാൻ ആകില്ലെന്നും അദ്ദേഹം പറഞ്ഞു.മണിപ്പൂര്‍ കലാപം രാജ്യം ഭരിക്കുന്ന പാര്‍ട്ടി ആസൂത്രണം ചെയ്‌തതെന്ന്‌ ഇ പി ജയരാജൻ വ്യക്തമാക്കി. അങ്ങേയറ്റം ഹീനമായ പ്രവര്‍ത്തനങ്ങളാണ് മണിപ്പൂരില്‍ നടക്കുന്നതെന്നും ജയരാജൻ കൂട്ടിച്ചേര്‍ത്തു.