കോട്ടയം: വേളൂർ ഇല്ലിക്കൽ റോഡിൽ ബൈക്കും സ്‌കൂട്ടറും കൂട്ടിയിടിച്ച് സ്‌കൂട്ടർ യാത്രക്കാരായ ദമ്പതിമാർക്ക് പരിക്ക്. അപകടത്തിൽ ഗുരുതരമായി പരിക്കേറ്റ ദമ്പതിമാരെ കാരിത്താസ് ആശുപത്രിയിൽ പ്രവേശിപ്പിച്ചു. വേളൂർ ചെമ്പോടിയിൽ ഷാനുമൻസിലിൽ റോഡിൽ ഷനൂജ് മൻസിലിൽ ഷംസുദീൻ, ഭാര്യ ഐഷ ഷംസുദീൻ എന്നിവർക്കാണ് അപകടത്തിൽ പരിക്കേറ്റത്. പരിക്കേറ്റ രണ്ടു പേരെയും കോട്ടയം തെള്ളകം കാരിത്താസ് ആശുപത്രിയിൽ പ്രവേശിപ്പിച്ചു.
ഞായറാഴ്ച വൈകിട്ട് ആറു മണിയോടെയായിരുന്നു അപകടം. വേളൂർ – ഇല്ലിക്കൽ റോഡിലേയ്ക്കു പ്രവേശിച്ച സ്‌കൂട്ടറിൽ എതിർ വശത്തു നിന്നും വന്ന ബൈക്ക് ഇടിയ്ക്കുകയായിരുന്നു. ഇടിയുടെ ആഘാതത്തിൽ മൂന്നു പേരും റോഡിൽ വീണു. സ്‌കൂട്ടർ യാത്രക്കാരായ ദമ്പതിമാർക്ക് ഹെൽമറ്റ് ഉണ്ടായിരുന്നെങ്കിലും ഇത് തെറിച്ചു പോയിരുന്നു. ഇതേ തുടർന്നാണ് രണ്ട് പേർക്കും ഗുരുതരമായി പരിക്കേറ്റത്. രണ്ടു പേരെയും നാട്ടുകാർ ചേർന്നാണ് ആശുപത്രിയിൽ പ്രവേശിപ്പിച്ചത്.