ലോആഞ്ചലസ്: വിമാനത്തിനുള്ളില് വച്ച് യാത്രക്കാരൻ കൊടുത്ത കഞ്ചാവ് ഉപയോഗിച്ച് ഉണ്ടാക്കിയ മധുരം കഴിച്ച് ജീവനക്കാർക്ക് അസ്വസ്ഥത. ബ്രിട്ടീഷ് എയർവേസിലെ മൂന്ന് ക്രൂ അംഗങ്ങളെ ആശുപത്രിയില് പ്രവേശിപ്പിച്ചു. ലഹരിയടങ്ങിയതെന്ന് അറിയാതെയാണ് ഇവർ ഇത് കഴിച്ചത്. ഹീത്രൂവില് നിന്ന് പുറപ്പെട്ട വിമാനം ലോസ് ആഞ്ചലസില് ഇറങ്ങിയ ശേഷമായിരുന്നു സംഭവം.
യാത്രക്കാരിലൊരാള് നല്കിയ മിഠായി, യാത്രക്കാരെല്ലാം മടങ്ങിയ ശേഷം ക്രൂ അംഗങ്ങള്ക്കുള്ള ബസില് ഹോട്ടലിലേക്ക് പോകും വഴിയാണ് ജീവനക്കാർ കഴിച്ചത്. ഹോട്ടലിലെത്തിയപ്പോഴേക്കും ഇവർക്ക് അസ്വസ്ഥത നേരിടാൻ തുടങ്ങി. അപായമെന്തോ സംഭവിക്കാൻ പോകുന്നുവെന്ന് ഭയന്ന ജീവനക്കാർ ഹോട്ടല് അധികൃതരോട് വിവരം പറഞ്ഞു. പിന്നാലെ ഇവരെ ആശുപത്രിയിലേക്ക് മാറ്റുകയായിരുന്നു. ഇതിന് പിന്നാലെ ഈ വിമാനത്തിൻ്റെ മടക്ക സർവീസില് മറ്റ് മൂന്ന് ജീവനക്കാരെ ഉള്പ്പെടുത്തി ബ്രിട്ടീഷ് എയർവേസ് പ്രശ്നം പരിഹരിച്ചു. ജീവനക്കാരെ ലഹരി നല്കി കുടുക്കിയ യാത്രക്കാരനെ കണ്ടെത്താൻ ആഭ്യന്തര അന്വേഷണം ആരംഭിച്ചിട്ടുണ്ട്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
വിമാനം സുരക്ഷിതമായി ലാൻ്റ് ചെയ്താല് നന്ദിസൂചകമായി യാത്രക്കാർ ജീവനക്കാർക്ക് മധുരം നല്കാറുണ്ട്. ഇത്തരത്തിലുള്ള സ്നേഹസമ്മാനമെന്ന് കരുതിയാണ് ജീവനക്കാർ ഇത് കഴിച്ചതെന്നാണ് വിവരം. ജീവനക്കാരെ വഞ്ചിച്ച് ലഹരി കഴിപ്പിച്ചത് ഗുരുതര കുറ്റമായതിനാല് പ്രതിയായ യാത്രക്കാരൻ പിടിക്കപ്പെട്ടാല് അഴിയെണ്ണുമെന്ന് ഉറപ്പാണ്.