ആലപ്പുഴ ആര്യാട് കൊലപാതകം: പ്രതികളെ പോലീസ് ചോദ്യം ചെയ്തു: കൊലപാതകം നടത്തിയത് ഒളിവിൽ കഴിയാൻ അഭയം നൽകാത്തതിന്റെ പേരിൽ എന്ന് കുറ്റസമ്മത മൊഴി

ആലപ്പുഴ: മറ്റ്​ കേസുകളിൽ ഉൾപ്പെട്ടതോടെ​ ഒളിവിൽകഴിയാൻ അഭയംനൽകാത്തതിന്‍റെയും പലതവണ​ഫോൺ വിളിച്ചിട്ട്​ എടുക്കാതിരുന്നതിന്‍റെ വൈരാഗ്യത്തിലാണ്​ യുവാവിനെ വീട്ടിൽകയറി കുത്തികൊന്നതെന്ന് പ്രതികൾ പൊലീസിനോട്​ സമ്മതിച്ചു. ആര്യാട്​ പഞ്ചായത്ത്​ എട്ടാംവാർഡ്​ മുരിയംവെളിയിൽ അജിയുടെ മകൻ അഖിലിനെ (അച്ചു-24) കൊന്നകേസിലെ ഒന്നാംപ്രതി ആദിക്കാട്ടുകുളങ്ങര കണ്ടിനേത്ത്​ വീട്ടിൽ ഷെൽജൂഖ്​ (34), രണ്ടാംപ്രതി ഓച്ചിറ ഞക്കനാൽ അനന്തുഭവൻ അനന്തു (29) എന്നിവ​​​​​​രെ ചോദ്യംചെയ്​​ത​​​​പ്പോഴാണ്​ നാടി​നെ നടുക്കിയ യുവാവിന്‍റെ കൊലപാതകത്തിന്‍റെ ചുരുളഴിഞ്ഞത്​.
കഴിഞ്ഞ വെള്ളിയാഴ്ച വൈകീട്ടായിരുന്നു സംഭവം.
ഹരിപ്പാടുനിന്ന്​ ഓട്ടോയിൽ ആലപ്പുഴയിലെത്തിയ ഇവർ പുന്നമട ഫിനിഷിങ്​ പോയന്‍റിന്​ സമീപത്തുള്ള ഹോട്ടലിൽ കയറി മദ്യപിച്ചു. ഇതിനിടെ മറ്റൊരു സുഹൃത്തിനെ കണ്ടുമുട്ടിയതോടെയാണ്​ നേരത്തെ പരിചയക്കാരനും സുഹൃത്തുമായ അഖിലിന്‍റെ വീട്​ കാണിച്ചുകൊടുക്കാൻ നിർബന്ധിച്ചത്​. അവിടെനിന്ന്​ ഓട്ടോക്കാരനെ ഭീഷണിപെടുത്തിയാണ്​ ആര്യാടുള്ള​ അഖിലിന്‍റെ വീട്ടിലെത്തിയത്​. പിന്നീട്​ വാക്കുതർക്കത്തിലേർപെടുകയും കൈയിൽകരുതിയ കത്തി ഉപയോഗിച്ച്​ കുത്തുകയായിരുന്നു.
അതിനുശേഷം മറ്റൊരു ഓട്ടോയിൽ ആലപ്പുഴ റെയിൽവേ സ്​റ്റേഷനിലെത്തിയ പ്രതികൾ പൊലീസിനെ തെറ്റിദ്ധരിപ്പിക്കാൻ ട്രെയിനിൽ കയറിയെങ്കിലും സി.സി.ടി.വി ഇല്ലാത്തസ്ഥലംനോക്കി പുറത്തുകടന്ന്​ കോഴിക്കോട്​ ബസിൽകയറി കുന്നംകുളത്ത്​ ലോഡ്ജിൽ മുറിയെടുത്തു. പൊലീസ്​ പിന്തുടരുന്നുവെന്ന്​ തിരിച്ചറിഞ്ഞ്​ പ്രതികൾ അവിടെനിന്ന്​ രക്ഷപ്പെട്ടു. ലോറിയിൽ മംഗലപുരം-മൈസൂർ വഴി ബാംഗ്ലുരുവിൽ എത്തിയെങ്കിലും അവിടെ തങ്ങിയില്ല. ആലപ്പുഴ നോർത്ത് പൊലീസിന്‍റെ അന്വേഷണം ബംഗളുരുവിൽ പുരോഗമിക്കുന്നത് മനസ്സിലാക്കി ട്രെയിൻമാർഗം വീണ്ടും കേരളത്തിലേക്ക്​ വന്നു. കരുനാഗപ്പള്ളി സ്​റ്റേഷനിൽ വന്നിറങ്ങിയശേഷം ഓച്ചിറയിലെ രണ്ടാംപ്രതി ഒളിസ​ങ്കേതത്തിൽ പോകുന്നവഴിയാണ്​ പൊലീസ്​ പിടികൂടിയത്​. പ്രതികളെ കോടതിയിൽ ഹാജരാക്കി റിമാൻഡ്​ ചെയ്തു. ഇവരെ കൂടുതൽ അന്വേഷണത്തിനായും ആയുധം കണ്ടെത്തുന്നതിനും പൊലീസ്​ കസ്റ്റഡിയിൽ വാങ്ങും. ജില്ല പൊലീസ്​ മേധാവി വിഷ്ണു പ്രദീപിന്റെയും ഡിവൈ.എസ്.പി. ജി.ബി മുകേഷിന്റെയും മേൽനോട്ടത്തിലായിരുന്നു അന്വേഷണം. നോർത്ത് സി.ഐ. എം.ജെ.അരുൺ, എസ്.ഐ.മാരായ എസ്.ദേവിക, ബാലു കെ. അജിത്ത്, ജി.എസ്.ഐ. യു.ഉല്ലാസ്, സി.പി.ഒ. ബിനോയ് ജോർജ്, എസ്.സി.പി.ഒ. ബിപിൻ ദാസ്, കെ.എസ്.ഷൈജു എന്നിവരടങ്ങുന്ന സംഘമാണ് പ്രതികളെ പിടികൂടിയത്.