“മോഖ” ഇന്ന് ഉച്ചയോടെ തീരം തൊടും ; കേരളത്തിൽ ഒറ്റപ്പെട്ട ഇടങ്ങളിൽ മഴയ്ക്ക് സാധ്യത; ബുധനാഴ്ചയോടെ കേരളത്തിൽ മഴ സജീവമായേക്കും

തിരുവനന്തപുരം: ബംഗാള്‍ ഉള്‍ക്കടലില്‍ രൂപം കൊണ്ട മോഖ ചുഴലിക്കാറ്റ് തീരത്തേക്ക് അടുക്കുന്നു. ഇന്ന് ഉച്ചയോടെ തീരംതൊടുമെന്നാണ് കേന്ദ്രകാലാവസ്ഥാ വകുപ്പിന്റെ മുന്നറിയിപ്പ് നൽകിയിരിക്കുന്നത്. അതീതീവ്ര ചുഴലിക്കാറ്റ് തെക്ക്-കിഴക്കൻ ബംഗ്ലാദേശിനും വടക്കൻ മ്യാൻമാറിനുമിടയിലായാണ് കരയിൽ പ്രവേശിക്കുന്നത്.

സംസ്ഥാനത്ത് ഒറ്റപ്പെട്ടയിടങ്ങളിൽ മഴയ്ക്ക് സാധ്യതയുണ്ട്. ഇന്ന് ജില്ലകൾക്ക് പ്രത്യേക മുന്നറിയിപ്പുകളില്ല. ബുധനാഴ്ചയോടെ കേരളത്തിൽ മഴ സജീവമാകുമെന്നാണ് അറിയിപ്പ്.മത്സ്യതൊഴിലാളികൾക്ക് കടലിൽ പോകാനും തടസ്സമില്ല.

വടക്കുപടിഞ്ഞാറൻ ബംഗാൾ ഉൾക്കടലിൽ മണിക്കൂറിൽ 55-65 കി.മീ ചില അവസരങ്ങളിൽ 75 കിലോമീറ്റർ വേഗതയിലും ശക്തമായ കാറ്റിനും മോശം കാലാവസ്ഥക്കും സാധ്യത. മധ്യകിഴക്കൻ ബംഗാൾ ഉൾക്കടലിൽ രാവിലെ മണിക്കൂറിൽ 100-110 കി.മീ വേഗതയിലും ചില സമയങ്ങളിൽ 120 കി.മീ. വരെയായിരിക്കും ചുഴലിക്കാറ്റിൻ്റെ വേഗത.

വടക്കുകിഴക്കൻ ബംഗാൾ ഉൾക്കടലിൽ ഉച്ചയ്ക്ക് മുമ്പ് മണിക്കൂറിൽ 125-135 കിലോമീറ്റർ വേഗതയിലും ചില മണിക്കൂറിൽ150 വരെയാണ്.