കോട്ടയം : കേരള നിയമസഭാ തെരഞ്ഞെടുപ്പില് ബി ജെ പി വൻ മുന്നേറ്റം നടത്തുമെന്ന് കേന്ദ്ര മന്ത്രി സുരേഷ് ഗോപി. കേരളത്തില് സർപ്രൈസ് റിസള്ട്ട് ഉണ്ടാകുമെന്ന ഐ ബി റിപ്പോർട്ട് ചൂണ്ടിക്കാട്ടിയായിരുന്നു സുരേഷ് ഗോപിയുടെ അവകാശവാദം. കടിച്ച് പറിക്കുന്ന പുലികളെപ്പോലെ ബി ജെ പി അംഗങ്ങള് ഇക്കുറി നിയമസഭയിലെത്തുമെന്നും അദ്ദേഹം ഏഷ്യാനെറ്റ് ന്യൂസിനോട് പറഞ്ഞു. കേരളം ഇനി ഭരിക്കുന്നവർക്ക് ഉറക്കമില്ലാത്ത രാത്രികളായിരിക്കുമെന്നും സുരേഷ് ഗോപി പറഞ്ഞു. സ്വർണ്ണം മോഷ്ടിച്ചവരോട് അത് തിരികെ കൊണ്ടുവന്ന് വയ്ക്കടാ എന്ന് നേരിട്ട് പറയാൻ കെല്പ്പുള്ളവർ നിയമസഭയില് ഉണ്ടാകുമെന്നും സുരേഷ് ഗോപി കൂട്ടിച്ചേർത്തു. ഏക സിവില് കോഡിലേക്കാണ് രാജ്യത്തിന്റെ യാത്രയെന്നും അദ്ദേഹം വ്യക്തമാക്കി. എഫ് സി ആർ എ നിയന്ത്രണങ്ങളില് ആശങ്കയുള്ളവർ കള്ളന്മാരാണെന്നും കണക്കുകള് കൃത്യമാണെങ്കില് ആർക്കും ഭയപ്പെടാനില്ലെന്നും സുരേഷ് ഗോപി പറഞ്ഞു. ബിനാമി ഇടപാടുകള് ഇല്ലാത്തവർക്ക് എന്തിനാണ് ആശങ്കയെന്നും അദ്ദേഹം ചോദിച്ചു.
പാലായില് ഷോണ് ജോർജിന്റെ തെരഞ്ഞെടുപ്പ് റാലിയില് പങ്കെടുത്തുകൊണ്ട് സംസാരിക്കവെ, ‘പാലാക്കാർ കൊടുക്കൂ, ഷോണ് എടുക്കട്ടെ അവന്റെ അപ്പൻ പൂഞ്ഞാറും എടുക്കട്ടെ’ എന്നും അദ്ദേഹം അഭിപ്രായപ്പെട്ടു. ബി ജെ പിയുടെ കരുത്തുറ്റ സാന്നിധ്യം കേരള രാഷ്ട്രീയത്തില് വലിയ മാറ്റങ്ങള് കൊണ്ടുവരുമെന്നും സുരേഷ് ഗോപി ആത്മവിശ്വാസം പ്രകടിപ്പിച്ചു.