കോട്ടയം വൈക്കത്ത് നിയന്ത്രണം നഷ്ടമായ കാർ കനാലിൽ വീണ് ഒരാൾ മരിച്ചു; മരിച്ചയാളെ തിരിച്ചറിഞ്ഞില്ല; മരിച്ചത് ഡോക്ടറെന്ന് സംശയം

വൈക്കം: കോട്ടയം വൈക്കത്ത് നിയന്ത്രണം നഷ്ടമായ കാർ കനാലിൽ മറിഞ്ഞ് ഒരാൾ മരിച്ചു. കാർ യാത്രക്കാരനായ ഒറ്റപ്പാലം സ്വദേശിയാണ് മരിച്ചതെന്നാണ് സംശയം. മരിച്ചയാളെ തിരിച്ചറിഞ്ഞില്ല. ഇയാൾ ഡോക്ടറാണ് എന്നാണ് സംശയിക്കുന്നത്. ഇന്നലെ രാത്രിയിലാണ് സംഭവം ഉണ്ടായത്. വെച്ചൂർ ഭാഗത്ത് നിന്നും വൈക്കം ഭാഗത്തേയ്ക്ക് വരികയായിരുന്നു കാർ. കാർ നിയന്ത്രണം നഷ്ടമായി വൈക്കം തോട്ടുവക്കത്ത് കെ.വി കനാലിലേയ്ക്ക് മറിയുകയായിരുന്നു. ഒറ്റപ്പാലം രജിസ്‌ട്രേഷനിലുള്ള കാറാണ് അപകടത്തിൽപ്പെട്ടത്. കാറിൽ ഡോക്ടറുടെ സ്റ്റിക്കറുണ്ടായിരുന്നു. കാറിനുള്ളിലെ ഫ്രിഡ്ജിൽ മരുന്നുകളും സൂക്ഷിച്ചിരുന്നു. വൈക്കത്ത് നിന്നുള്ള അഗ്നിരക്ഷാസേനയും പൊലീസ് സംഘവും ചേർന്ന് നടത്തിയ തിരച്ചിലിനൊടുവിലാണ് മൃതദേഹം കണ്ടെത്തിയത്. മൃതദേഹം വൈക്കം താലൂക്ക് ആശുപത്രി മോർച്ചറിയിൽ.