തിരുവനന്തപുരം: സംസ്ഥാനത്തെ ഐഎഎസ് തലപ്പത്ത് വൻ അഴിച്ചുപണി നടത്തിക്കൊണ്ട് സർക്കാർ ഉത്തരവിറങ്ങി. കണ്ണൂർ ഉള്പ്പെടെ ആറ് ജില്ലകളിലെ കളക്ടർമാരെയാണ് മാറ്റിയത്. പി.ബി. നൂഹിനെ ജിഎസ്ടി കമ്മീഷണറായും, ചീഫ് ഇലക്ട്രല് ഓഫീസറായ രത്തൻ ഖേല്ക്കറെ മുഖ്യമന്ത്രിയുടെ പ്രിൻസിപ്പല് സെക്രട്ടറിയായും നിയമിച്ചിട്ടുണ്ട്. വളരെ തന്ത്രപ്രധാനമായ തസ്തികകളിലിരിക്കുന്ന ഉദ്യോഗസ്ഥരെയാണ് ഈ പുതിയ ഉത്തരവിലൂടെ സ്ഥലം മാറ്റിയിരിക്കുന്നത്.
ധനവകുപ്പ് സെക്രട്ടറിയായി പാട്ടീല് അജിത് ഭഗവത് റാവുവിനെ നിയമിച്ചു; ഇദ്ദേഹം നേരത്തെ ജിഎസ്ടി കമ്മീഷണറായിരുന്നു. ഗതാഗത വകുപ്പിലെ സ്പെഷല് സെക്രട്ടറിയായ പി.ബി. നൂഹാണ് പുതിയ ജിഎസ്ടി കമ്മീഷണർ. ആലപ്പുഴ കളക്ടറായിരുന്ന കെ. ഇമ്പശേഖറിനെ വാട്ടർ അതോറിറ്റി എംഡിയാക്കി. കൊച്ചിൻ സ്മാർട്ട് മിഷൻ ചീഫ് എക്സിക്യൂട്ടീവ് ഓഫിസറായ ഷാജി വി. നായരാണ് ആലപ്പുഴയിലെ പുതിയ കളക്ടർ.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
കണ്ണൂർ കളക്ടറായ അരുണ് കെ. വിജയനെ കെഎസ്ഐഡിസി മാനേജിങ് ഡയറക്ടറുടെ അധിക ചുമതലയോടെ വ്യവസായ വകുപ്പ് ഡയറക്ടറായി മാറ്റിയിട്ടുണ്ട്. വ്യവസായ വകുപ്പ് ഡയറക്ടറായിരുന്ന പി. വിഷ്ണുരാജാണ് കണ്ണൂരിലെ പുതിയ കളക്ടർ. കോഴിക്കോട് കളക്ടർ സ്നേഹില് കുമാർ സിങ്ങിനെ എൻട്രൻസ് കമ്മീഷണറായി നിയമിച്ചു. പാലക്കാട് കളക്ടറായിരുന്ന എം.എസ്. മാധവിക്കുട്ടിയാണ് പുതിയ കോഴിക്കോട് കളക്ടർ. കോളീജിയറ്റ് എജുക്കേഷൻ ഡയറക്ടർ കെ. സുധീറിനെ പാലക്കാട് കളക്ടറായും നിയമിച്ചു. പത്തനംതിട്ട കളക്ടർ എസ്. പ്രേം കൃഷ്ണനെ ആരോഗ്യവകുപ്പിലെ ജോയിന്റ് സെക്രട്ടറിയാക്കിയപ്പോള്, പകരം കില ഡയറക്ടർ എ നിസാമുദ്ദീനെ പത്തനംതിട്ട കളക്ടറായി നിയമിച്ചു.
കൊല്ലം കളക്ടർ എൻ. ദേവിദാസിനെ കില ഡയറക്ടറായും, വ്യവസായ വകുപ്പ് ജോയിന്റ് സെക്രട്ടറി ആനി ജൂല തോമസിനെ കൊല്ലം കളക്ടറായും നിയമിച്ചു. ആലപ്പുഴ സബ് കളക്ടർ സമീർ കിഷനാണ് വ്യവസായ വകുപ്പിലെ പുതിയ ഡപ്യൂട്ടി സെക്രട്ടറി. ഈ മാറ്റങ്ങളില് പാലക്കാട് കളക്ടറായിരുന്ന എം.എസ്. മാധവിക്കുട്ടിയെ മാത്രമാണ് മറ്റൊരു ജില്ലയിലേക്ക് കളക്ടറായി മാറ്റിയത്. ബാക്കി അഞ്ച് കളക്ടർമാർക്കും മറ്റ് വിവിധ വകുപ്പുകളിലാണ് പുതിയ നിയമനം നല്കിയിരിക്കുന്നത്.
ആകെ 14 സിവില് സർവീസ് ഉദ്യോഗസ്ഥരെയാണ് ഇത്തരത്തില് ഒറ്റയടിക്ക് സ്ഥലം മാറ്റിയിട്ടുള്ളത്. പാട്ടീല് അജിത് ഭഗവത് റാവു, പി.ബി. നൂഹ്, കെ. ഇമ്പശേഖർ, എൻ. ദേവിദാസ്, അരുണ് കെ. വിജയൻ, സ്നേഹില് കുമാർ സിങ്, എസ്. പ്രേം കൃഷ്ണ, എ. നിസാമുദ്ദീൻ, ആനി ജൂല തോമസ്, കെ. സുധീർ, ഷാജി വി. നായർ, പി. വിഷ്ണുരാജ്, അരുണ് എസ്. നായർ, സമീർ കിഷൻ എന്നിവരാണ് ഈ പട്ടികയിലുള്ളത്. സ്ഥലംമാറ്റം ലഭിച്ച എല്ലാ ഉദ്യോഗസ്ഥരും വരുന്ന തിങ്കളാഴ്ച (25.05.26) തന്നെ പുതിയ ചുമതലകള് ഏറ്റെടുക്കണമെന്നും ഉത്തരവില് നിർദ്ദേശിച്ചിട്ടുണ്ട്.