പാലാ : ഓട്ടത്തിനിടെ തീ പിടിച്ച് മാരുതി കാർ കത്തി നശിച്ചു. പാലാ പൊൻകുന്നം റോഡിൽ സിവിൽ സപ്ലൈസ് വെയർഹൗസിന് സമീപം വാഴയിൽ മഠം റോഡിലാണ് സംഭവം. ആളപായം ഒന്നുമില്ല. വാഹനം പൂർണമായി കത്തി നശിച്ചു. വാഴയിൽ മഠത്തിൽ, വലിയ കാപ്പിൽ വി എം തോമസിന്റെ വാഹനത്തിനാണ് തീ പിടിച്ചത്. വാഹനത്തിൽ ഇന്ധനം നിറച്ചതിനു ശേഷം തിരികെ വീട്ടിലേക്ക് വരുന്ന വഴി പെട്രോളിന്റെ മണം അനുഭവപ്പെട്ടതായി വാഹന ഉടമ പറഞ്ഞു. വാഹനം ഗട്ടറിൽ ചാടിയപ്പോൾ സ്പാർക്ക് ഉണ്ടായതാണ് തീപിടുത്തത്തിന് കാരണമെന്നാണ് പ്രാഥമിക നിഗമനം. പുക ഉയരുന്നത് കണ്ട് വാഹനം സൈഡിൽ പാർക്ക് ചെയ്യുകയായിരുന്നു.
വാഹനത്തിൽ രണ്ടുപേരാണ് ഉണ്ടായിരുന്നത്. പുക ഉയരുന്നത് കണ്ട് വാഹനത്തിലുണ്ടായിരുന്നവർ പെട്ടെന്ന് ഇറങ്ങിയതിനാൽ യാത്രക്കാർക്ക് പരിക്കുകളില്ല. വാഹനത്തിനുള്ളിൽ ഉണ്ടായിരുന്ന ബാഗും മറ്റ് സാമഗ്രികളും കത്തി നശിച്ചു. ഉടൻതന്നെ പാല ഫയർഫോഴ്സ് എത്തി തീ അണച്ചു. വാഹനം പാർക്ക് ചെയ്തതിന്റെ സമീപത്തുതന്നെ ഒരു സ്കൂട്ടർ കൂടി ഉണ്ടായിരുന്നു. വാഹന ഉടമയുടെ വീടിന് മുമ്പിലുള്ള റോഡ് സൈഡിൽ തന്നെയാണ് അപകടം ഉണ്ടായത്. പാല പോലീസും സ്ഥലത്തെത്തിയിരുന്നു. ഫയർ ഓഫീസർ ബിജുമോൻ നേതൃത്വം നല്കി.