വാഷിംഗ്ടണ്: ലോകത്തെ മുൻനിര ടെക് കമ്പനികളെയും സാമ്പത്തിക സ്ഥാപനങ്ങളെയും മുള്മുനയില് നിർത്തി വമ്പൻ സൈബർ ആക്രമണം റിപ്പോർട്ട് ചെയ്തു.ആയിരക്കണക്കിന് അമേരിക്കൻ കമ്പനികള് ഉപയോഗിക്കുന്ന ‘ആക്സിയോസ്’ എന്ന ജനപ്രിയ സോഫ്റ്റ്വെയർ പാക്കേജില് ഉത്തരകൊറിയൻ ഹാക്കർമാർ നുഴഞ്ഞുകയറിയതായാണ് സുരക്ഷാ വിദഗ്ധർ നല്കുന്ന മുന്നറിയിപ്പ്. മാസങ്ങള് നീണ്ടുനിന്നേക്കാവുന്ന ഈ സപ്ലൈ-ചെയിൻ ആക്രമണത്തിലൂടെ കോടിക്കണക്കിന് ഡോളറിന്റെ ക്രിപ്റ്റോ കറൻസി മോഷ്ടിക്കാനാണ് പ്യോങ്യാങ് ലക്ഷ്യമിടുന്നത്.
ചൊവ്വാഴ്ച രാവിലെ വെറും മൂന്ന് മണിക്കൂർ നേരത്തേക്ക് ആക്സിയോസ് സോഫ്റ്റ്വെയർ ഡെവലപ്പറുടെ അക്കൗണ്ട് ഹാക്കർമാർ കൈക്കലാക്കുകയായിരുന്നു. ഈ ചുരുങ്ങിയ സമയത്തിനുള്ളില് സോഫ്റ്റ്വെയർ അപ്ഡേറ്റ് ചെയ്ത എല്ലാ സ്ഥാപനങ്ങളിലേക്കും മാരകമായ വൈറസുകള് പടർന്നുപിടിച്ചു. ആരോഗ്യ മേഖല മുതല് ധനകാര്യ സ്ഥാപനങ്ങള് വരെ വെബ്സൈറ്റ് മാനേജ്മെന്റിനായി ആക്സിയോസിനെ ആശ്രയിക്കുന്നതിനാല് നാശനഷ്ടങ്ങളുടെ വ്യാപ്തി പ്രവചനാതീതമാണ്. ഗൂഗിളിന്റെ ഉടമസ്ഥതയിലുള്ള സൈബർ ഇന്റലിജൻസ് സ്ഥാപനമായ മാൻഡിയന്റ് (Mandiant), ഈ ആക്രമണത്തിന് പിന്നില് ഉത്തരകൊറിയൻ ഹാക്കിംഗ് ഗ്രൂപ്പാണെന്ന് സ്ഥിരീകരിച്ചു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
മിസൈല് പരീക്ഷണങ്ങള്ക്ക് പണം കണ്ടെത്തുക ലക്ഷ്യം
ഉത്തരകൊറിയയുടെ ആണവായുധ-മിസൈല് പരീക്ഷണങ്ങള്ക്കായി പണം കണ്ടെത്താനാണ് ഇത്തരം ഡിജിറ്റല് കവർച്ചകള് നടത്തുന്നതെന്ന് വിദഗ്ധർ ചൂണ്ടിക്കാട്ടുന്നു. കഴിഞ്ഞ വർഷം മാത്രം ഒറ്റ ആക്രമണത്തിലൂടെ 1.5 ബില്യണ് ഡോളറിന്റെ ക്രിപ്റ്റോ കറൻസിയാണ് ഇവർ തട്ടിയെടുത്തത്. ഉത്തരകൊറിയയുടെ മിസൈല് പദ്ധതിയുടെ പകുതിയോളം ഫണ്ടും ഇത്തരം സൈബർ തട്ടിപ്പുകളിലൂടെയാണ് സമാഹരിക്കുന്നതെന്ന് വൈറ്റ് ഹൗസ് നേരത്തെ വെളിപ്പെടുത്തിയിരുന്നു. രാജ്യാന്തര ഉപരോധങ്ങള്ക്കിടയിലും സൈബർ ലോകത്തെ ഈ കള്ളപ്പണം പ്യോങ്യാങ്ങിന് വലിയ കരുത്താണ് നല്കുന്നത്.
ആധുനിക കാലത്ത് ആർട്ടിഫിഷ്യല് ഇന്റലിജൻസ് ഉപയോഗിച്ച് സോഫ്റ്റ്വെയറുകള് നിർമ്മിക്കുമ്പോള് ആവശ്യമായ പരിശോധനകള് നടക്കാത്തതാണ് ഇത്തരം ആക്രമണങ്ങള് എളുപ്പമാക്കുന്നതെന്ന് സുരക്ഷാ ഗവേഷകർ പറയുന്നു. സോഫ്റ്റ്വെയർ വിതരണ ശൃംഖലയിലെ ഈ വിള്ളല് വഴി കടന്നുകൂടിയ ഹാക്കർമാർ പല വൻകിട കമ്പനികളുടെയും രഹസ്യ വിവരങ്ങളിലേക്ക് പ്രവേശനം നേടിയിരിക്കുകയാണ്. എത്രത്തോളം ഡാറ്റ ചോർത്തപ്പെട്ടു എന്ന് കണ്ടെത്താൻ ഇനിയും മാസങ്ങള് എടുത്തേക്കുമെന്നാണ് നിലവിലെ റിപ്പോർട്ടുകള് സൂചിപ്പിക്കുന്നത്.