കൊല്ലം: എരൂരിൽ പൊതുനിരയിൽ വടിവാൾ വീശി ഭീഷണി മുഴക്കി ഭീകരാന്തരീക്ഷം സൃഷ്ടിച്ച ബ്ലോഗറെയും കൂട്ടരെയും പോലീസ് പിടികൂടി. ശ്രീബ്ലോഗ് എന്ന പേരിൽ സോഷ്യൽ മീഡിയയിൽ സജീവമായിരുന്ന ക്ലാപ്പന സ്വദേശി ശ്രീജിത്ത്, അയിലറ സ്വദേശി ബിറ്റോ വർഗീസ്, നേടിയറ സ്വദേശി ഗോപൻ എന്നിവരാണ് പോലീസ് പിടിയിലായത്.കഴിഞ്ഞദിവസം വൈകുന്നേരം ചണ്ണപ്പെട്ട ജംഗ്ഷനിൽ ഈ സംഘം മാരകായുധങ്ങളുമായി വെട്ടുമെന്ന് ഭീഷണി മുഴക്കിയതോടെ പ്രദേശത്ത് അശാന്തി പടർന്നു. സമീപത്തെ ആളുകൾ പൊലീസിനെ വിവരം അറിയിച്ചതിനെ തുടർന്ന് പോലീസ് വേഗപ്രവർത്തനം നടത്തി.
ശ്രീജിത്ത് സോഷ്യൽ മീഡിയയിലൂടെ പലരെയും ലക്ഷ്യംവെച്ച് അധിക്ഷേപപരമായ പരാമർശങ്ങൾ നടത്തിയെന്ന പരാതിയും പൊലീസിന് ലഭിച്ചിരുന്നു. സംഭവദിവസം ഇവർ സഞ്ചരിച്ചിരുന്ന വാഹനം പിന്തുടർന്ന് ആലഞ്ചേരിയിൽ പൊലീസ് തടഞ്ഞ് പിടിച്ചെടുത്തപ്പോഴാണ് അറസ്റ്റ് നടന്നത്.വാഹനത്തിൽ നിന്നും വടിവാളും മറ്റും പോലീസ് കണ്ടെത്തി. പ്രതികൾക്കെതിരെ അനുയോജ്യമായ വകുപ്പുകൾ പ്രകാരം കേസെടുത്ത് അന്വേഷണം ആരംഭിച്ചതായി പൊലീസ് അറിയിച്ചു.