അമേരിക്കൻ പ്രസിഡന്റ് ഡോണള്ഡ് ട്രംപിന്റെ മൂത്ത മകനും ട്രംപ് ഓർഗനൈസേഷൻ എക്സിക്യൂട്ടീവുമായ ഡോണള്ഡ് ട്രംപ് ജൂനിയറും, പ്രശസ്ത മോഡലും ഇൻഫ്ലുവൻസറുമായ ബെറ്റിന ആൻഡേഴ്സണും വിവാഹിതരായി. വ്യാഴാഴ്ച ഫ്ലോറിഡയിലെ വെസ്റ്റ് പാം ബീച്ചില് വെച്ച് ലളിതമായ ചടങ്ങുകളോടെയായിരുന്നു നിയമപരമായ വിവാഹം. തുടർന്ന് ശനിയാഴ്ച ബഹാമാസിലെ ഒരു സ്വകാര്യ ദ്വീപില് അടുത്ത ബന്ധുക്കളും സുഹൃത്തുക്കളും പങ്കെടുത്ത വിപുലമായ ആഘോഷങ്ങളും നടന്നു. ഇറാനുമായുള്ള യുദ്ധ പശ്ചാത്തലവും ഔദ്യോഗിക തിരക്കുകളും കാരണം പ്രസിഡന്റ് ഡോണള്ഡ് ട്രംപ് വിവാഹ ചടങ്ങുകളില് പങ്കെടുത്തിരുന്നില്ല. ദമ്പതികളുടെ വിവാഹ വാർത്ത പുറത്തുവന്നതോടെ ഇവരുടെ വൻ ആസ്തിയെക്കുറിച്ചുള്ള ചർച്ചകളും സജീവമായിരിക്കുകയാണ്.
ആസ്തിയും ക്രിപ്റ്റോ നിക്ഷേപവും
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ഫോർബ്സ് മാഗസിന്റെ കണക്കുകള് പ്രകാരം 2024 നവംബറില് ഏകദേശം 50 മില്യണ് ഡോളർ (അഞ്ച് കോടി ഡോളർ) മാത്രമായിരുന്ന ഡോണള്ഡ് ട്രംപ് ജൂനിയറിന്റെ ആസ്തി വലിയ കുതിച്ചുചാട്ടമാണ് നടത്തിയത്. നിലവില് 300 മില്യണ് ഡോളറിലധികം (30 കോടി ഡോളർ) ആണ് അദ്ദേഹത്തിന്റെ ആസ്തി. അതായത് വെറും ഒരു വർഷം കൊണ്ട് ആസ്തിയില് ആറിരട്ടി വർദ്ധനവുണ്ടായി. ക്രിപ്റ്റോ കറൻസി വിപണിയിലെ നിക്ഷേപങ്ങളാണ് തന്റെ ആസ്തി ഇത്രയധികം ഉയരാൻ കാരണമെന്ന് ഡോണ് ജൂനിയർ വ്യക്തമാക്കിയിരുന്നു.
അമേരിക്കൻ ബിറ്റ്കോയിൻ (American Bitcoin): ട്രംപ് ജൂനിയറും സഹോദരൻ എറിക്കും ചേർന്ന് ആരംഭിച്ച ഈ ക്രിപ്റ്റോ മൈനിംഗ് ബിസിനസിലെ ഓഹരികളാണ് അദ്ദേഹത്തിന്റെ ഏറ്റവും വലിയ സമ്പാദ്യം. കമ്പനിയുടെ 1% മുതല് 5% വരെ ഓഹരികള് അദ്ദേഹത്തിന്റെ പക്കലുണ്ടെന്നാണ് വിവരം.
വേള്ഡ് ലിബർട്ടി ഫിനാൻഷ്യല് (World Liberty Financial): ട്രംപ് കുടുംബത്തിന്റെ ഉടമസ്ഥതയിലുള്ള ഈ ക്രിപ്റ്റോ ബിസിനസ് വഴി 1.4 ബില്യണ് ഡോളറിന്റെ ടോക്കണുകളാണ് വിറ്റഴിച്ചത്. ഇതിന്റെ വരുമാനത്തില് വലിയൊരു പങ്ക് ട്രംപിന്റെ മക്കളായ എറിക്, ഡോണ് ജൂനിയർ, ബാരണ് എന്നിവർക്കാണ് ലഭിക്കുന്നത്.
ട്രംപ് കുടുംബത്തിന്റെ പരമ്പരാഗത റിയല് എസ്റ്റേറ്റ് ബിസിനസ് സാമ്രാജ്യമായ ‘ട്രംപ് ഓർഗനൈസേഷന്റെ’ ഉയർന്ന പദവികളില് നിന്നും രാഷ്ട്രീയ ഫണ്ട് ശേഖരണങ്ങളില് നിന്നും വലിയൊരു വരുമാനവും ഇദ്ദേഹത്തിനുണ്ട്.
ആരാണ് ബെറ്റിന ആൻഡേഴ്സണ്?
ഫ്ലോറിഡയിലെ പ്രശസ്തമായ പാം ബീച്ച് സോഷ്യലിലും ജീവകാരുണ്യ പ്രവർത്തനങ്ങളിലും സജീവ സാന്നിധ്യമാണ് ബെറ്റിന ആൻഡേഴ്സണ്. അന്തരിച്ച പ്രശസ്ത ബാങ്കറും, ജീവകാരുണ്യ പ്രവർത്തകനുമായ ഹാരി ലോയ് ആൻഡേഴ്സണിന്റെ മകളാണ് ബെറ്റിന. ലക്ഷ്വറി റിയല് എസ്റ്റേറ്റ് രംഗത്തും ജീവകാരുണ്യ മേഖലയിലും വലിയ സ്വാധീനമുള്ള കുടുംബമാണ് ബെറ്റിനയുടേത്. ഫാഷൻ രംഗത്തും സോഷ്യല് മീഡിയയിലും സജീവമായ ബെറ്റിനയുടെ വ്യക്തിഗത ആസ്തി 5,00,000 ഡോളറിനും 6,00,000 ഡോളറിനും ഇടയിലാണെന്നാണ് അനൌദ്യോഗിക കണക്കുകള്.
ഡോണള്ഡ് ട്രംപ് ജൂനിയറിന്റെ രണ്ടാം വിവാഹമാണിത്. ആദ്യ ഭാര്യ വനേസ ട്രംപില് ട്രംപ് ജൂനിയറിന് അഞ്ച് കുട്ടികളുണ്ട്. അതിനുശേഷം മുൻ ഫോക്സ് ന്യൂസ് അവതാരക കിംബർലി ഗില്ഫോയിലുമായി അദ്ദേഹം പ്രണയത്തിലായിരുന്നെങ്കിലും 2024-ല് ആ ബന്ധം വേർപിരിഞ്ഞു. തുടർന്നാണ് ബെറ്റിനയുമായി അടുത്തതും ഇപ്പോള് വിവാഹിതരായതും. ബെറ്റിനയുടെ ആദ്യ വിവാഹമാണിത്.