ഉത്തർപ്രദേശിലെ വ്യവസായി അഭിഷേക് ഗുപ്തയുടെ കൊലപാതകം:സാമ്പത്തിക തർക്കമോ, പ്രണയ വിരോധമോ എന്നത് സംശയം ;സാധ്വി അന്നപൂർണ്ണ ലേഡി ഗോഡ്സെ പൂജാ ശകുൻ പാണ്ഡെ അറസ്റ്റിൽ

ഉത്തർപ്രദേശ്: ഹിന്ദു മഹാസഭ ദേശീയ ജനറൽ സെക്രട്ടറി പൂജാ ശകുൻ പാണ്ഡെ കൊലക്കേസിൽ പൊലീസ് കസ്റ്റഡിയിൽ. ബൈക്ക് ഷോറൂം ഉടമയായ അഭിഷേക് ഗുപ്തയെ വാടകക്കൊലയാളികളെ ഉപയോഗിച്ച് കൊലപ്പെടുത്തിയ കേസിലാണ് പൂജാ അറസ്റ്റിലായത്.രാജസ്ഥാനിലെ ഭരത്പൂരിൽ ഒളിവിലായിരിക്കെയാണ് ഇവരെ പൊലീസ് പിടികൂടിയത്. അഖില ഭാരതീയ ഹിന്ദു മഹാസഭ (എ.ബി.എച്ച്.എം.) വക്താവും ഭർത്താവുമായ അശോക് പാണ്ഡെ നേരത്തേ തന്നെ ഈ കേസിൽ അറസ്റ്റിലായിരുന്നു.സെപ്റ്റംബർ 23-ന് അലിഗഡിൽ വെച്ചാണ് 30 വയസ്സുകാരനായ അഭിഷേക് ഗുപ്ത കൊല്ലപ്പെട്ടത്. രാത്രി ഒമ്പതരയോടെയാണ് ബസ് കാത്തുനിന്ന അഭിഷേകിനെ ബൈക്കിലെത്തിയ രണ്ട് പേർ വെടിവെച്ച് കൊലപ്പെടുത്തുകയായിരുന്നു. സിസിടിവി ദൃശ്യങ്ങൾ പരിശോധിച്ച് പൊലീസ് വാടകക്കൊലയാളികളായ മുഹമ്മദ് ഫസൽ ഉൾപ്പെടെ രണ്ടുപേരെ പിടികൂടി.

അന്വേഷണത്തിൽ പണമിടപാടുമായി ബന്ധപ്പെട്ട തർക്കമാണ് കൊലപാതകത്തിന് പിന്നിൽ എന്നാണ് പൊലീസ് നിഗമനം. എന്നാൽ, പൂജയ്ക്ക് അഭിഷേകുമായി അടുത്ത ബന്ധമുണ്ടായിരുന്നുവെന്നും അവനെ വിവാഹം കഴിക്കാൻ ആഗ്രഹിച്ചിരുന്നതായും അഭിഷേകിന്റെ കുടുംബം ആരോപിക്കുന്നു. അഭിഷേകിനെ തന്റെ ബിസിനസിൽ പങ്കാളിയാക്കണമെന്ന പൂജയുടെ ആവശ്യം യുവാവ് നിരസിച്ചതിനെ തുടർന്നാണ് കൊലപാതകം ആസൂത്രണം ചെയ്തത് എന്നാണ് ആരോപണം.മുഹമ്മദ് ഫസലിന്റെ മൊഴിപ്രകാരം, പൂജയും ഭർത്താവും ചേർന്നാണ് കൊലപാതകം ആസൂത്രണം ചെയ്തത്. തനിക്ക് മൂന്നു ലക്ഷം രൂപ വാഗ്ദാനം ചെയ്തുവെന്നും ഫസൽ പൊലീസിനോട് പറഞ്ഞു.‘സാധ്വി അന്നപൂർണ്ണ’ എന്നും ‘ലേഡി ഗോഡ്സെ’ എന്നും അറിയപ്പെടുന്ന പൂജാ ശകുൻ പാണ്ഡെ, ന്യൂനപക്ഷങ്ങളെതിരായ വിദ്വേഷ പ്രസംഗങ്ങളിലൂടെ വിവാദനായികയായി മാറിയിരുന്നു.

2019-ൽ മഹാത്മാ ഗാന്ധിയുടെ രക്തസാക്ഷിത്വ ദിനത്തിൽ ഗാന്ധിയുടെ ചിത്രത്തിലേക്ക് വെടിയുതിർത്ത് “ഗോഡ്സെയെ മഹാനായി” ആക്ഷേപഹാസ്യമായി പ്രഖ്യാപിച്ചതിനെ തുടർന്ന് അവർ ദേശീയ ശ്രദ്ധ പിടിച്ചു പറ്റിയിരുന്നു.2021-ൽ ഹരിദ്വാറിൽ നടന്ന ‘ധർം സൻസദിൽ’ മുസ്ലിം സമൂഹത്തിനെതിരായ കൂട്ടക്കൊലക്ക് ആഹ്വാനം ചെയ്തതും ഇവരെ ശക്തമായ വിമർശനങ്ങൾക്കിരയാക്കി. നിരവധി വിദ്വേഷ പ്രസംഗങ്ങൾ നടത്തിയിട്ടും, പൂജാ ശകുൻ പാണ്ഡെക്കെതിരെ ഗൗരവമായ നിയമനടപടികൾ ഉണ്ടായിരുന്നില്ല എന്നതും ഇപ്പോൾ വീണ്ടും ചർച്ചയായിരിക്കുകയാണ്