രണ്ടുവയസ്സുകാരിയെ കിണറ്റിൽ എറിഞ്ഞ് കൊലപ്പെടുത്തിയ കേസ്; അമ്മ ശ്രീതുവിനെ ജയിലിന് പുറത്തിറക്കിയത് സെക്സ് റാക്കറ്റ്;

ബാലരാമപുരം: രണ്ടുവയസ്സുകാരിയെ കിണറ്റിൽ എറിഞ്ഞ് കൊലപ്പെടുത്തിയ കേസിൽ രണ്ടാം പ്രതിയായ അമ്മ ശ്രീതുവിനെ ജയിലിൽ നിന്നു പുറത്തിറക്കിയത് ലഹരി, മോഷണം, സെക്സ് റാക്കറ്റ് എന്നീ കുറ്റകൃത്യങ്ങളിൽ ഏർപ്പെട്ട മാഫിയ സംഘമാണെന്ന് പൊലീസ് കണ്ടെത്തി.റിമാൻഡ് കാലാവധി കഴിഞ്ഞിട്ടും ബന്ധുക്കളോ അടുത്ത ബന്ധങ്ങളോ ജാമ്യത്തിനായി എത്തിയില്ലാത്തതിനാൽ ഏഴുമാസത്തിലധികം ജയിലിൽ കഴിഞ്ഞ ശ്രീതുവിനെ പുറത്തിറക്കിയത് തമിഴ്നാട് സ്വദേശിയായ ഇളയരാജ എന്നറിയപ്പെടുന്ന വ്യക്തിയും ഭാര്യയും ചേർന്നാണ്. ഇവർ വഞ്ചിയൂർ പൊലീസ് സ്റ്റേഷൻ പരിധിയിൽ മോഷണക്കേസിൽ അറസ്റ്റിലായവരാണ്. ജയിലിൽ നിന്നിറങ്ങിയ ശേഷം ശ്രീതുവിനെ പാലക്കാട് അതിർത്തിയോട് ചേർന്ന കൊഴിഞ്ഞാമ്പാറയിലേക്കാണ് ഇവർ എത്തിച്ചത്.

പോലീസിന്റെ അന്വേഷണപ്രകാരം, തമിഴ്നാട്ടിൽ നിന്ന് ആഡംബര കാറുകളിൽ കേരളത്തിലെത്തുന്ന ഈ സംഘം മോഷണവും ലഹരിക്കച്ചവടവും നടത്തുകയും തുടർന്ന് വാഹനങ്ങൾ മാറ്റി തമിഴ്നാട്ടിലേക്കു മടങ്ങുകയും ചെയ്യുന്നു. കഴക്കൂട്ടം, തുമ്പ തുടങ്ങിയ സ്ഥലങ്ങളാണ് ഇവരുടെ പ്രധാന പ്രവർത്തന കേന്ദ്രങ്ങൾ.ശ്രീതുവിനെ ഉപയോഗിച്ച് തുമ്പ പൊലീസ് സ്റ്റേഷൻ പരിധിയിലെ ചിലരുമായി ഇവർ ബന്ധപ്പെട്ടു തുടങ്ങിയതായി പൊലീസ് വിവരങ്ങൾ സൂചിപ്പിക്കുന്നു. ശ്രീതുവിനെ അറസ്റ്റ് ചെയ്ത് കൊണ്ടുപോകുന്നതിനിടെ അവരെ ആരോ തട്ടിക്കൊണ്ടുപോയെന്ന പ്രചാരണം മാഫിയ സംഘമാണ് നടത്തിയതെന്നും പൊലീസ് പറയുന്നു.

ഇതുസംബന്ധിച്ച വിവരങ്ങൾ പാലക്കാട് പൊലീസ് അന്വേഷിച്ചു വരികയാണ്.ഈ വർഷം ജനുവരി 30-ന് പുലർച്ചെയായിരുന്നു കുട്ടിയെ ഇവർ താമസിച്ചിരുന്ന വാടകവീട്ടിലെ കിണറ്റിൽ മരിച്ച നിലയിൽ കണ്ടെത്തിയത്. ശ്രീതുവിന്റെ ബന്ധുവായ ഹരികുമാറും (പ്രഥമ പ്രതി) ശ്രീതുവും തമ്മിൽ വഴിതെറ്റിയ ബന്ധമുണ്ടായിരുന്നതായി പൊലീസ് പറയുന്നു. ഹരികുമാറിന് കുട്ടിയെ ഇഷ്ടമില്ലായ്മയാണ് കൊലപാതകത്തിലേക്കു നയിച്ചത്.

കൊലപാതകത്തിൽ ശ്രീതുവിന് പങ്കുണ്ടെന്ന് അറസ്റ്റിലായ ദിനംതന്നെ ഹരികുമാർ പൊലീസിനോട് സമ്മതിച്ചിരുന്നു. തുടർന്ന് നടത്തിയ നുണപരിശോധനയിൽ ഹരികുമാർ വിവരങ്ങൾ വെളിപ്പെടുത്തിയപ്പോൾ, ശ്രീതു നുണപരിശോധനയ്ക്ക് വിസമ്മതിച്ചിരുന്നു. ശേഖരിച്ച തെളിവുകളുടെയും അന്വേഷണഫലങ്ങളുടെയും അടിസ്ഥാനത്തിലാണ് ശ്രീതുവിനെ അറസ്റ്റു ചെയ്തത്.