കാൻസർ ബാധിത മകളെ രക്ഷിക്കാനായി അമ്മയുടെ നിലവിളി:യുദ്ധത്തിൽ മൂന്ന് മക്കളെയും നഷ്ടപ്പെടുത്തി;ഗാസയിലെ വേദനയുടെ പ്രതീകങ്ങൾ

ഗാസ :രണ്ടുവർഷമായി തുടരുന്ന യുദ്ധം ഗാസയിലെ ജനജീവിതം തകർത്തെറിഞ്ഞിരിക്കുകയാണ്. രോഗങ്ങളും പലായനവും ചികിത്സാ സൗകര്യങ്ങളുടെ അഭാവവും പോഷകാഹാരക്കുറവും ചേർന്ന ഭീകരാവസ്ഥയിൽ ആയിരക്കണക്കിന് കുടുംബങ്ങൾ ദുരിതം സഹിക്കുകയാണ്. ഈ യുദ്ധത്തിന്റെ നടുവിൽ, സ്വന്തം മൂന്ന് മക്കളെ ഇതിനോടകം നഷ്ടപ്പെട്ട 22കാരി പലസ്തീൻ യുവതി നാൻസി അബു മത്രൂദ്, തന്റെ രണ്ടുവയസുകാരി കാൻസർ രോഗിയായ മകളെ രക്ഷിക്കാനുള്ള പോരാട്ടത്തിലാണ്.കഴിഞ്ഞ മാസം ഗാസ സിറ്റിയിലെ ഇസ്രായേലി ഷെല്ലാക്രമണത്തിൽ നിന്ന് രക്ഷപ്പെടാനായി ഭർത്താവിനും രണ്ടുവയസുകാരി മകൾ എത്രയ്ക്കും ഒപ്പം, ആറുമാസം ഗർഭിണിയായ മത്രൂദ് മൂന്നു ദിവസം നടന്ന് മദ്ധ്യഗാസയിലെ മുനമ്പിലേക്കെത്തി. വഴിയാത്രയിൽ പ്രസവ വേദന അനുഭവപ്പെട്ടതിനെ തുടർന്ന്, അവിടെ ഇരട്ടക്കുട്ടികൾക്ക് ജന്മം നൽകി. പക്ഷേ, ദിവസങ്ങൾക്കുള്ളിൽ ഇരുവരും മരണമടഞ്ഞു.

ഇതിനു മുൻപ്, യുദ്ധം ആരംഭിക്കുമ്പോൾ മുൻ വിവാഹത്തിൽ ഉണ്ടായിരുന്ന നാല് വയസുകാരൻ കാണാതാകുകയും ചെയ്തിരുന്നു.”ഇനി ശേഷിക്കുന്ന മകളെ പോലും നഷ്ടപ്പെടാൻ വയ്യ. ഞങ്ങൾക്ക് ഒരു അഭയം മാത്രം വേണം,” മത്രൂദ് വേദനപൂർവ്വം പറയുന്നു.എത്രയെ ചികിത്സിച്ചിരുന്ന ഗാസയിലെ കുട്ടികളുടെ ആശുപത്രി കഴിഞ്ഞ മാസം ഇസ്രായേൽ ആക്രമണത്തിൽ പൂർണ്ണമായി അടച്ചുപൂട്ടപ്പെട്ടതോടെ, ചികിത്സ തടസപ്പെട്ടു.

“ഞങ്ങളെന്താണ് തെറ്റ് ചെയ്തിരിക്കുന്നത്? ഞങ്ങളുടെ കുഞ്ഞുങ്ങൾ എന്താണ് തെറ്റ് ചെയ്തത്?” മകൾക്കായി തീക്കരിവെച്ച് കടല വേവിക്കുമ്പോൾ എത്രയുടെ പിതാവ് ഫറാജ് അൽ ഗാലയിനി (53) കരഞ്ഞു.യൂണിസെഫിന്റെ വിവരങ്ങൾ പ്രകാരം, ഗാസയിൽ ജനിക്കുന്ന കുഞ്ഞുങ്ങൾ യുദ്ധസമ്മർദ്ദത്തിൽ അതീവ ദുർബലരാണ്. ഇൻക്യൂബേറ്ററുകളും വെന്റിലേറ്ററുകളും ആവശ്യത്തിന് ലഭ്യമല്ല. 35 ആശുപത്രികളിൽ 14 എണ്ണം മാത്രമാണ് ഭാഗികമായി പ്രവർത്തിക്കുന്നത്. തുടർച്ചയായ ഷെല്ലാക്രമണവും വിഭവക്കുറവും കാരണം നിരവധി ആശുപത്രികൾ അടച്ചുപൂട്ടേണ്ടിവന്നു.പലായനം, പോഷകാഹാരക്കുറവ്, ചികിത്സാ സൗകര്യങ്ങളുടെ അഭാവം എന്നിവ മൂലം സ്ത്രീകൾക്ക് അകാല പ്രസവത്തിനും കുട്ടികൾക്ക് രോഗങ്ങളും പോഷകാഹാരക്കുറവും വല്ലാതെ ബാധിക്കുന്നു.

ഓഗസ്റ്റിൽ മാത്രം അഞ്ച് വയസിന് താഴെയുള്ള 13,000 കുട്ടികൾക്ക് പോഷകാഹാരക്കുറവിന് ചികിത്സ നൽകി.”ഞങ്ങളുടെ ജീവിതത്തെക്കുറിച്ച് ആരും ചോദിച്ചറിയുന്നില്ല. ഒരു രാജ്യവും, ഞങ്ങളുടെ സ്വന്തം ആളുകളും പോലും,” മകളുടെ ഭാവിയെ കുറിച്ച് ആശങ്കയോടെ ഗാലയിനി കൂട്ടിച്ചേർത്തു.