തിരുവനന്തപുരം:കിഫ്ബി മസാല ബോണ്ട് ഇടപാടിൽ ഗുരുതരമായ അഴിമതി നടന്നുവെന്നാരോപിച്ച് പ്രതിപക്ഷ നേതാവ് വി.ഡി. സതീശൻ സംസ്ഥാന സർക്കാരിനെതിരെ ശക്തമായ വിമർശനം ഉന്നയിച്ചു. തിരഞ്ഞെടുപ്പ് അടുത്തുവരുന്നതിനോടനുബന്ധിച്ച് ഭയമുണ്ടാക്കാനായാണ് എൻഫോഴ്സ്മെന്റ് ഡയറക്ടറേറ്റ് (ഇഡി) നോട്ടീസ് അയച്ചതെന്ന് അദ്ദേഹം ആരോപിച്ചു.മസാല ബോണ്ട് വഴി സംസ്ഥാനത്തിന് വൻ ധനനഷ്ടമുണ്ടായതായും മുൻ സംസ്ഥാന ധനമന്ത്രി തോമസ് ഐസക്കിന്റെ വിശദീകരണം ശരിയല്ലെന്നും സതീശൻ വ്യക്തമാക്കി. “ഒന്നര ശതമാനം പലിശയ്ക്ക് പണം ലഭിച്ചിരിക്കെ അതിലും കൂടുതലായ പലിശ നിരക്കിൽ കടം എടുത്തത് ശരിയായ തീരുമാനം അല്ല. ഇത് സാമ്പത്തിക ഉത്തരവാദിത്വത്തിന്റെ ലംഘനമാണ്,” അദ്ദേഹം പറഞ്ഞു.
ലണ്ടൻ സ്റ്റോക്ക് എക്സ്ചേഞ്ചിൽ മുഖ്യമന്ത്രിയുടെ മണിയടിക്കൽ ചടങ്ങും സതീശൻ വിമർശിച്ചു. “ലണ്ടനിൽ മണിയടിക്കാൻ മാത്രം മുഖ്യമന്ത്രിക്ക് പോകേണ്ട അവസ്ഥയുണ്ടായിരുന്നോ? പണം നിക്ഷേപിക്കുന്ന ആർക്കും മണിയടിക്കാം. നടന്നത് വെറും പിആർ സ്റ്റണ്ടാണ്. സർക്കാർ നൽകിയ സോവറിംഗ് ഗ്യാരന്റിയുടെ പശ്ചാത്തലത്തിൽ ഇത്തരം ആഘോഷങ്ങൾ ആവശ്യമായിരുന്നോ?” സതീശൻ ചോദിച്ചു.കിഫ്ബിയുമായി ബന്ധപ്പെട്ട വിശദീകരണങ്ങളിൽ നിന്നും മുഖ്യമന്ത്രി ഒഴിഞ്ഞുമാറരുതെന്നും, കരുവന്നൂർ സഹകരണ ബാങ്ക് വിവാദത്തെപ്പോലെ ഇതിലും വ്യക്തത വേണമെന്നും അദ്ദേഹം ശ്രദ്ധിപ്പിച്ചു.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
തിരഞ്ഞെടുപ്പിനെ മുൻനിർത്തി സിപിഎമ്മിനെയും മുഖ്യമന്ത്രിയെയും ഭയപ്പെടുത്താനാണ് ഇഡി നോട്ടീസ് അയച്ചതെന്നും, യാതൊരു കാര്യാത്മക നടപടിയും ഇഡി കൈക്കൊള്ളില്ലെന്നും സതീശൻ ആരോപിച്ചു. “കേരളത്തിൽ ബിജെപിക്കുള്ള സഹായമായാണ് ഈ നീക്കങ്ങളൊക്കെ നടക്കുന്നത്,” അദ്ദേഹം പറഞ്ഞു.