ചെന്നൈ:തമിഴ്നാട്ടില് നിയമസഭാ തിരഞ്ഞെടുപ്പിന് മാസങ്ങള് മാത്രം ശേഷിക്കെ, സൂപ്പര്താരം വിജയ് നേതൃത്വം നല്കുന്ന തമിഴക വെട്രി കഴകം (ടിവികെ) ശക്തമായ രാഷ്ട്രീയ നീക്കങ്ങളുമായി മുന്നേറുന്നു. എൻഡിഎയില് നിലനില്ക്കുന്ന അസന്തോഷത്തിന്റെ പശ്ചാത്തലത്തില് മുന് മുഖ്യമന്ത്രി ഒ. പനീർസെല്വവും എഎംഎംകെ നേതാവ് ടിടിവി ദിനകരനും ടിവികെയുമായി അടുക്കുന്നതായി റിപ്പോര്ട്ടുകള് പുറത്തുവരുന്നു.വരാനിരിക്കുന്ന നിയമസഭാ തിരഞ്ഞെടുപ്പില് എൻഡിഎയുടെ മുഖ്യമന്ത്രി സ്ഥാനാര്ത്ഥിയായി എടപ്പാടി കെ. പളനിസ്വാമിയെ അംഗീകരിക്കില്ലെന്ന് ടിടിവി ദിനകരനും ഒപിഎസ് പക്ഷവും പരസ്യമായി നിലപാട് വ്യക്തമാക്കിയതിന് പിന്നാലെയാണ് പുതിയ രാഷ്ട്രീയ ചലനങ്ങള്. ഇതോടെ ഡിഎംകെ സഖ്യത്തിലോ അല്ലെങ്കില് വിജയ്യുടെ ടിവികെ സഖ്യത്തിലോ ചേരണമെന്ന കാര്യത്തില് ഒപിഎസ് പക്ഷം ആലോചന ആരംഭിച്ചതായാണ് സൂചന.
ടിടിവി ദിനകരന് നടന് വിജയുമായി അടുത്ത ബന്ധം സ്ഥാപിക്കുന്നതായും റിപ്പോര്ട്ടുകളുണ്ട്. ടിവികെ നേതൃത്വവുമായി ദിനകരനും പനീർസെല്വവും തിരഞ്ഞെടുപ്പ് ധാരണകള്ക്കായി ചര്ച്ച നടത്തിയതായി ടിവികെ ആദ്യമായി സ്ഥിരീകരിച്ചു. ചര്ച്ചകള് പ്രതീക്ഷിച്ച ദിശയില് മുന്നോട്ടു പോകുമെന്ന ആത്മവിശ്വാസവും പാര്ട്ടി നേതൃത്വം അറിയിച്ചു.മുൻ എഐഎഡിഎംകെ നേതാവും നിലവിൽ ടിവികെയുടെ മുഖ്യ കോർഡിനേറ്ററുമായ കെ.എ. സെൻഗോട്ടയ്യനാണ് ഈ ചര്ച്ചകള്ക്ക് നേതൃത്വം നല്കുന്നതെന്ന് രാഷ്ട്രീയ വൃത്തങ്ങള് പറയുന്നു. “ടിടിവിയുമായി ഞങ്ങള് സംസാരിക്കുന്നുണ്ട്. അവര് ആഭ്യന്തര ചര്ച്ചകളിലാണ്. മറുപടി എപ്പോള് വരുമെന്നത് വ്യക്തമല്ല” എന്നാണ് സെൻഗോട്ടയ്യന് പ്രതികരിച്ചത്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
പരിചയസമ്പന്നരായ നേതാക്കളുടെ അഭാവം നേരിട്ടിരുന്ന ടിവികെയ്ക്ക് സെൻഗോട്ടയ്യന്റെ കടന്നുവരവ് പുതിയ ആത്മവിശ്വാസമാണ് നല്കിയിരിക്കുന്നത്. ടിടിവിയും ഒപിഎസും എൻഡിഎ സഖ്യം വിട്ടാല്, അത് എഐഎഡിഎംകെ നയിക്കുന്ന മുന്നണിക്ക് വലിയ തിരിച്ചടിയാകുമെന്നാണ് വിലയിരുത്തല്.പ്രത്യേകിച്ച് തമിഴ്നാടിന്റെ തെക്കും മധ്യ മേഖലയിലുമുള്ള പ്രബല സമുദായമായ മുകുലത്തോറുകളുടെ പിന്തുണ ടിവികെയിലേക്ക് വഴിമാറാന് സാധ്യതയുണ്ടെന്നതാണ് വിജയ് ക്യാമ്പിന് വലിയ പ്രതീക്ഷ നല്കുന്നത്. 2024 ലോക്സഭാ തിരഞ്ഞെടുപ്പില് ടിടിവിയുടെയും ഒപിഎസിന്റെയും സാന്നിധ്യം എൻഡിഎയ്ക്ക് പല മണ്ഡലങ്ങളിലും തിരിച്ചടിയായിരുന്നുവെന്നും രാഷ്ട്രീയ നിരീക്ഷകര് ചൂണ്ടിക്കാട്ടുന്നു.
1972ല് രൂപീകരിച്ച എഐഎഡിഎംകെയുടെ പ്രധാന വോട്ട് ബാങ്കായിരുന്നു മുകുലത്തോറുകള്. എന്നാല് 2016ല് ജെ. ജയലളിതയുടെ മരണത്തിന് ശേഷം ഈ വിഭാഗം പാര്ട്ടിയില് നിന്ന് അകന്നിരുന്നു. പളനിസ്വാമി ടിടിവിയെയും ഒപിഎസിനെയും പുറത്താക്കിയതോടെ ആ അകലം കൂടുതല് വര്ധിച്ചു.പളനിസ്വാമിയെ മുഖ്യമന്ത്രി സ്ഥാനാര്ത്ഥിയായി അംഗീകരിക്കില്ലെന്ന നിലപാട് ടിടിവിയും ഒപിഎസും കടുപ്പിച്ചതോടെ, എൻഡിഎ സഖ്യത്തില് തുടരാന് താല്പ്പര്യമില്ലെന്ന സൂചനയാണ് ഇതെന്ന് ബിജെപി വൃത്തങ്ങള് വിലയിരുത്തുന്നു. എഐഎഡിഎംകെയുമായുള്ള അഭിപ്രായ ഭിന്നത തിരഞ്ഞെടുപ്പില് തിരിച്ചടിയാകുമെന്ന ആശങ്കയും ബിജെപിക്കുണ്ട്.അതേസമയം, ഒപിഎസ് പക്ഷത്തിനുള്ളില് ഭിന്നാഭിപ്രായങ്ങളും ശക്തമാണ്. ഡിഎംകെ സഖ്യത്തിലേക്ക് നീങ്ങണമെന്ന് ചിലര് വാദിക്കുമ്പോള്, വിജയ്യുടെ ടിവികെയുമായി കൈകോർക്കുന്നതാണ് രാഷ്ട്രീയമായി ഗുണകരമെന്ന നിലപാടും ഉയരുന്നുണ്ട്. എന്തായാലും വരും ദിവസങ്ങളില് നിര്ണായക പ്രഖ്യാപനം ഉണ്ടാകുമെന്നാണ് സൂചന.