അഹമ്മദാബാദ്: ഐപിഎല് ഫൈനലില് ഗുജറാത്ത് ടൈറ്റൻസിനെ വീഴ്ത്തി റോയല് ചലഞ്ചേഴ്സ് ബെംഗളൂരു കിരീടം നിലനിർത്തിയതോടെ മറ്റൊരു ഐപിഎല് സീസണിന് കൂടി കൊടിയിറങ്ങി. വമ്പൻ പ്രതീക്ഷകളുമായി വന്ന് കളിമറന്ന സൂപ്പർ താരങ്ങളെ ഉള്പ്പെടുത്തി ഐപിഎല് 2026-ലെ ‘ഫ്ലോപ്പ് ഇലവൻ’ തെരഞ്ഞെടുത്താല് അതില് ആരൊക്കെ ഇടം നേടുമെന്ന് നോക്കാം.
ചെന്നൈ സൂപ്പര് കിംഗ്സ് നായകന്റെ ഭാരവും ചുമന്ന് ക്രീസിലിറങ്ങിയ റുതുരാജ് ഗെയ്ക്വാദാണ് ഫ്ലോപ്പ് ഇലവന്റെ ഓപ്പണര്. കൊല്ക്കത്ത നായകനായ അജിങ്ക്യ രഹാനെ റുതുരാജിനൊപ്പം ഫ്ലോപ്പ് ഇലവനിലെ സഹ ഓപ്പണറാകുക. ചെന്നൈ സൂപ്പർ കിങ്സിനായി14 ഇന്നിങ്സുകളില് നിന്ന് 28.08 ശരാശരിയില് 337 റണ്സ് മാത്രമാണ് ഈ സീസണില് റുതുരാജ് നേടിയത്. കൊല്ക്കത്ത നൈറ്റ് റൈഡേഴ്സ് നായകൻ രഹാനെയാകട്ടെ 14 ഇന്നിങ്സുകളില് നിന്ന് 335 റണ്സ് മാത്രമെടുത്ത് പൂർണ്ണമായി നിരാശപ്പെടുത്തി.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
ലക്നൗ സൂപ്പർ ജയന്റ്സിന്റെ വെടിക്കെട്ട് ബാറ്റര് നിക്കോളാസ് പുരാനാണ് മൂന്നാം നമ്പറില്.14 ഇന്നിങ്സുകളില് നിന്ന് 234 റണ്സ് മാത്രമാണ് പുരാൻ നേടിയത്. 127.86 സ്ട്രൈക്ക് റേറ്റിലായിരുന്നു പുരാന്റെ ബാറ്റിംഗ്. ഫ്ലോപ്പ് ഇലവന്റെ നായകനാവുന്നത് സീസണില് അവസാന സ്ഥാനത്ത് ഫിനിഷ് ചെയ്ത ലക്നൗ നായകന് റിഷഭ് പന്ത് ആണ്. സൂര്യകുമാർ യാദവ്, ഹാർദിക് പാണ്ഡ്യ, കാമറൂണ് ഗ്രീൻ, അക്ഷർ പട്ടേല് എന്നിവരാണ് ഐപിഎല് ഫ്ലോപ്പ് ഇലവന്റെ മധ്യനിരയിലുള്ളത്.
13 ഇന്നിങ്സുകളില് നിന്ന് 312 റണ്സ് മാത്രമാണ് ഈ സീസണില് റിഷഭ് പന്ത് നേടിയത്. പന്തിന്റെ ക്യാപ്റ്റൻസിയില് 14 മത്സരങ്ങളില് നാലെണ്ണത്തില് മാത്രമാണ് ലക്നൗവിന് ജയിക്കാനായത്. മുംബൈ ഇന്ത്യൻസിന്റെ വിശ്വസ്തരായ സൂര്യകുമാർ യാദവും ഹാർദിക് പാണ്ഡ്യയും ഇത്തവണ ബാറ്റിങ് മറന്നവരുടെ കൂട്ടത്തിലുണ്ട്. സൂര്യകുമാർ 13 ഇന്നിങ്സുകളില് നിന്ന് 270 റണ്സ് മാത്രമെടുത്തപ്പോള്, ഹാർദിക് പാണ്ഡ്യ 10 ഇന്നിങ്സുകളില് നിന്ന് 206 റണ്സാണ് നേടിയത്. ബൗളിംഗില് പാണ്ഡ്യ വെറും 4 വിക്കറ്റുകള് മാത്രമാണ് വീഴ്ത്തിയത്.
ഐപിഎല് 2026 ലേലത്തില് റെക്കോർഡ് തുകയായ 25.20 കോടി രൂപയ്ക്ക് കൊല്ക്കത്ത സ്വന്തമാക്കിയ ഓസ്ട്രേലിയൻ ഓള്റൗണ്ടർ കാമറൂണ് ഗ്രീൻ ആണ് ഫ്ലോപ്പ് ഇലവന്റെ ഓള് റൗണ്ടര്. ബാറ്റിംഗില് 322 റണ്സ് നേടിയെങ്കിലും ബൗളിംഗില് 10-ന് മുകളില് ഇക്കോണമി വഴങ്ങി വെറും 7 വിക്കറ്റുകള് മാത്രമാണ് ഗ്രീന് വീഴ്ത്തിയത്. ഡല്ഹി ക്യാപിറ്റല്സ് നായകൻ അക്ഷർ പട്ടേലാണ് ഫ്ലോപ്പ് ഇലവനിലെ സ്പിന് ഓള് റൗണ്ടര്. 13 ഇന്നിങ്സുകളില് നിന്ന് 11 വിക്കറ്റുകള് മാത്രമാണ് അക്ഷറിന് നേടാനായത്. ബാറ്റിംഗില് 11 ഇന്നിങ്സുകളില് നിന്ന് 173 റണ്സ് മാത്രമായിരുന്നു സമ്പാദ്യം.
മുംബൈ ഇന്ത്യൻസിന്റെ ബൗളിംഗ് കുന്തമുനയായ ജസ്പ്രീത് ബുംറയും ഫ്ലോപ്പ് ഇലവനിലുണ്ട്. 13 മത്സരങ്ങളില് നിന്ന് വെറും 4 വിക്കറ്റുകള് മാത്രമാണ് ബുമ്രയ്ക്ക് ഈ സീസണില് നേടാനായത്. 102.50 എന്ന മോശം ശരാശരിയിലായിരുന്നു ബുമ്രയുടെ ഇത്തവണത്തെ പ്രകടനം. മുംബൈയുടെ മറ്റൊരു ലോകോത്തര പേസറായ ട്രെന്റ് ബോള്ട്ടും പവർപ്ലേകളില് വിക്കറ്റെടുക്കാൻ ബുദ്ധിമുട്ടി. 5 മത്സരങ്ങളില് നിന്ന് വെറും 2 വിക്കറ്റുകള് മാത്രമാണ് ബോള്ട്ട് നേടിയത്. 10 മത്സരങ്ങളില് നിന്ന് 5 വിക്കറ്റുകള് മാത്രം വീഴ്ത്തിയ ലക്നൗവിന്റെ ലെഗ് സ്പിന്നർ ദിഗ്വേഷ് റാതിയും ഫ്ലോപ്പ് ഇലവന്റെ പ്ലേയിംഗ് ഇലവനിലുണ്ട്.
ഇംപാക്ട് പ്ലെയർ ഓപ്ഷനുകള്
സൂപ്പർ താരങ്ങളായ രോഹിത് ശർമ്മ (283 റണ്സ്), വിക്കറ്റ് കീപ്പർ ജിതേഷ് ശർമ്മ (116 റണ്സ്), ദക്ഷിണാഫ്രിക്കൻ താരം ഡെവാള്ഡ് ബ്രെവിസ് (151 റണ്സ്), ഒരു വിക്കറ്റ് പോലും നേടാനാകാത്ത പേസർ ഹർഷല് പട്ടേല്, സ്പിന്നർ കുല്ദീപ് യാദവ് (10 വിക്കറ്റ്) എന്നിവരാണ് ഫ്ലോപ്പ് ലിസ്റ്റിലെ ഇംപാക്ട് പ്ലെയർമാർ.