തിരുവനന്തപുരം :ശബരിമല ദ്വാരപാലക ശിൽപങ്ങളിലെ സ്വർണപ്പാളി കവർന്ന കേസിൽ അന്വേഷണം നിർണായക ഘട്ടത്തിലെത്തി. കേസിൽ മൂന്നാമത്തെ പ്രതിയായ മുൻ എക്സിക്യൂട്ടീവ് ഓഫീസർ ഡി. സുധീഷ്കുമാറിനെ പ്രത്യേക അന്വേഷണസംഘം (എസ്ഐടി) അറസ്റ്റുചെയ്തു.സുധീഷിനെ ഇന്നലെ ഈഞ്ചക്കലിലെ ക്രൈംബ്രാഞ്ച് ഓഫിസിൽ എത്തിച്ച ശേഷം മണിക്കൂറുകളോളം ചോദ്യം ചെയ്തതിന്റെ തുടർച്ചയായാണ് അറസ്റ്റിനായി രേഖപ്പെടുത്തിയത്. ഇന്ന് അദ്ദേഹത്തെ റാന്നി കോടതിയിൽ ഹാജരാക്കും.2019ൽ ദ്വാരപാലക ശിൽപത്തിലെ സ്വർണപ്പാളി “ചെമ്പുപാളി” ആണെന്ന് രേഖപ്പെടുത്തിയ റിപ്പോർട്ടിനാണ് ഇപ്പോൾ അന്വേഷണം കെട്ടിപ്പിടുന്നത്. അന്ന് എക്സിക്യൂട്ടീവ് ഓഫീസർ ആയിരുന്നത് സുധീഷ്കുമാറായിരുന്നു.കേസിലെ രണ്ടാം പ്രതിയായ മുരാരി ബാബുവിന്റെ മൊഴി അടിസ്ഥാനമാക്കി സുധീഷിനെ ചോദ്യം ചെയ്യുകയും പിന്നീട് അറസ്റ്റുചെയ്യുകയും ചെയ്തു.
അന്ന് അഡ്മിനിസ്ട്രേറ്റീവ് ഓഫീസർ ആയിരുന്ന മുരാരി ബാബു, “ഉന്നത ഉദ്യോഗസ്ഥരുടെ നിർദ്ദേശപ്രകാരം തന്നെയാണ് പ്രവർത്തിച്ചത്” എന്നതും “ഫയൽ തിരുത്താനുള്ള അധികാരം ദേവസ്വം ബോർഡ് ഉൾപ്പെടെ അഞ്ച് പേരിനുണ്ടായിരുന്നു” എന്നതും അന്വേഷണ സംഘത്തോട് വ്യക്തമാക്കിയിരുന്നു.സ്വർണം കവരാൻ ഉണ്ണികൃഷ്ണൻ പോറ്റിക്ക് അവസരം ഒരുക്കിയതിൽ സുധീഷിനും പങ്കുണ്ടെന്നാണ് എസ്ഐടിയുടെ നിഗമനം. 1998ൽ ദ്വാരപാലക ശിൽപങ്ങൾ സ്വർണപ്പാളിയാൽ മൂടിയതായ വിവരം സുധീഷിന് വ്യക്തമായിട്ടുണ്ടായിരുന്നുവെന്നും, എന്നിട്ടും 2019ൽ “ചെമ്പുപാളി” എന്ന് രേഖപ്പെടുത്തിയ റിപ്പോർട്ട് തിരുത്താതിരുന്നതിൽ ദുരൂഹതയുണ്ടെന്നാണ് അന്വേഷണ സംഘം വിലയിരുത്തുന്നത്.
നിങ്ങളുടെ വാട്സപ്പിൽ അതിവേഗം വാർത്തകളറിയാൻ ജാഗ്രതാ ലൈവിനെ പിൻതുടരൂ Whatsapp Group | Telegram Group | Google News | Youtube
അതേസമയം, ഉണ്ണിക്കൃഷ്ണൻ പോറ്റിയുടെ സുഹൃത്തും ഇടനിലക്കാരനുമായ വാസുദേവനെ ചോദ്യം ചെയ്ത് പിന്നീട് വിട്ടയച്ചു. വാസുദേവനും സുധീഷും ഒരുമിച്ചാണ് ഇന്നലെ ക്രൈംബ്രാഞ്ച് ഓഫിസിൽ എത്തിയതെന്ന് അറിയുന്നു. ചോദ്യം ചെയ്യലിനുശേഷം വാസുദേവനെ വിട്ടയച്ച സംഘമാണ് സുധീഷിന്റെ അറസ്റ്റും രേഖപ്പെടുത്തിയത്.