കോട്ടയം : ഒഡീഷയിൽ നിന്നും വില്പനയ്ക്കായി കൊണ്ട് വന്ന കഞ്ചാവുമായി ചങ്ങനാശ്ശേരി സ്വദേശി പിടിയിൽ. ചങ്ങനാശ്ശേരി കച്ചേരി റോഡിൽ ചിത്രക്കുളം ഭാഗത്ത് പേൾ റസിഡൻസി ലോഡ്ജിൽ താമസിച്ചു വന്നിരുന്ന ദിലീപ് കുമാർ സി എല്ലിനെ (55) യാണ് ചങ്ങനാശ്ശേരി ഡിവൈ എസ് പി തോംസൺ കെ.പിയുടെ നേതൃത്വത്തിലുള്ള സംഘം അറസ്റ്റ് ചെയ്തത്.
ജൂലൈ ആറിന് രാവിലെ ലോഡ്ജ് മുറിയിൽ നിന്നുമാണ് ഇയാൾ 1.110 കിലോ കഞ്ചാവുമായി ചങ്ങനാശ്ശേരി പോലീസിന്റെ പിടിയിലായത്. കോട്ടയം ജില്ലാ പോലീസ് മേധാവി ഷാഹുൽ ഹമീദിന് ലഭിച്ച രഹസ്യ വിവരത്തെ തുടർന്നാണ് പരിശോധന നടത്തിയത്. ചങ്ങനാശ്ശേരി പോലീസ് ഇൻസ്പെക്ടർ ബി വിനോദ് കുമാറിന്റെ നേതൃത്വത്തിൽ എസ് ഐ ജയകൃഷ്ണൻ, എസ് ഐ ആന്റണി മൈക്കിൾ, എ എസ് ഐ ജസ്റ്റിൻ, സീനിയർ സിവിൽ പൊലീസ് ഓഫിസർ ക്രിസ്റ്റഫർ, അജേഷ്, വിനീഷ് സിവിൽ പൊലീസ് ഓഫിസർ അരുൺ, സതീഷ് എന്നിവരടങ്ങുന്ന പോലീസ് സംഘവും കോട്ടയം ജില്ലാ പോലീസ് മേധാവിയുടെ ലഹരി വിരുദ്ധ സ്ക്വാഡും ചേർന്ന് നടത്തിയ പരിശോധനയിലാണ് ഒറീസയിൽ നിന്നും വില്പനയ്ക്കായി കൊണ്ടു വന്ന ഗഞ്ചാവ് പിടി കൂടിയത്. കോടതിയിൽ ഹാജരാക്കിയ പ്രതിയെ റിമാന്റ് ചെയ്തു.