വംശഹത്യ തടയാനാകാതെ യുഎൻ: ലോകം ചോദിക്കുന്നു- എന്തിനാണ് ഇങ്ങനെയൊരു സംഘടന…

ന്യൂയോർക്ക്:മനുഷ്യാവകാശ സംരക്ഷണത്തിന്റെ നെടുംതൂണായി കരുതപ്പെട്ടിരുന്ന ഐക്യരാഷ്ട്രസഭ (യുഎൻ) തന്റെ കരുത്തും വിശ്വാസ്യതയും നഷ്ടപ്പെടുത്തി വരികയാണോ എന്ന ചോദ്യമാണ് ആഗോളതലത്തിൽ ഉയരുന്നത്. ഗസ്സയിൽ ഇസ്രായേൽ നടത്തുന്ന ആക്രമണം യുഎന്റെ അന്വേഷണ കമ്മീഷൻ തന്നെ വംശഹത്യയാണെന്ന് രേഖപ്പെടുത്തിയിട്ടും, ആക്രമണം അവസാനിപ്പിക്കാൻ യുഎന്നിന് കഴിയാത്തത് സംഘടനയുടെ ശക്തിയെപ്പറ്റി വലിയ സംശയങ്ങൾ ഉയർത്തുകയാണ്.72 പേജുകളുള്ള ഏറ്റവും പുതിയ റിപ്പോർട്ടിൽ, 1948ലെ വംശഹത്യ കൺവെൻഷനിലെ അഞ്ച് മാനദണ്ഡങ്ങളിൽ നാലെണ്ണം ഇസ്രായേൽ പാലസ്തീനികളോട് നടപ്പാക്കിയിട്ടുണ്ടെന്ന് യുഎൻ വ്യക്തമാക്കുന്നു. എങ്കിലും, ഗസ്സയിൽ നടക്കുന്ന യുദ്ധത്തെയും ഉപരോധത്തെയും അവസാനിപ്പിക്കണമെന്ന യുഎന്റെ ആവർത്തിച്ച ആഹ്വാനങ്ങൾ വാക്കുകളിലൊതുങ്ങി പോകുകയാണ്.

ഐക്യരാഷ്ട്രസഭയുടെ പ്രധാന ദൗർബല്യം സുരക്ഷാ കൗൺസിലിന്റെ ഘടനയിലാണ്. അമേരിക്ക, റഷ്യ, ചൈന, ബ്രിട്ടൻ, ഫ്രാൻസ് എന്നീ സ്ഥിരാംഗങ്ങൾക്ക് (പി5) ഉള്ള വീറ്റോ അധികാരം പല നിർണായക പ്രമേയങ്ങളും തള്ളപ്പെടാൻ കാരണമായിട്ടുണ്ട്. ഗസ്സയെ സംബന്ധിച്ച പ്രമേയങ്ങൾ 2023 മുതൽ ആറുതവണ യുഎസ് വീറ്റോ ചെയ്തതും ഇസ്രായേലിന്റെ പ്രധാന സഖ്യകക്ഷിയായി യുഎസ് തുറന്ന പിന്തുണ നൽകിയതും യുഎന്റെ പ്രവർത്തനങ്ങളെ ശക്തമായി ബാധിച്ചു.ജനറൽ അസംബ്ലിയിൽ ഭൂരിപക്ഷ വോട്ടോടെ പ്രമേയം പാസാകുന്നുണ്ടെങ്കിലും അതിന് നിയമപരമായ ബാധ്യത ഇല്ല. യുഎൻ സെക്രട്ടറി ജനറൽ ആർട്ടിക്കിള്‍ 99 പ്രകാരം പ്രത്യേക ഇടപെടലിന് ശ്രമിച്ചെങ്കിലും, യുഎസ് വീറ്റോ മൂലം അവിടെയും പരാജയം സംഭവിച്ചു.

1945ൽ രണ്ടാം ലോകമഹായുദ്ധത്തിന് ശേഷം ലോകസമാധാനം സംരക്ഷിക്കാനായിരുന്നു യുഎന്റെ രൂപീകരണം. എന്നാൽ സുഡാൻ, കോംഗോ, റുവാണ്ട, ബോസ്‌നിയ, ഡാർഫൂർ തുടങ്ങിയ സ്ഥലങ്ങളിലെ വംശഹത്യ തടയാനാകാതെ വന്നത് പോലെ തന്നെ, ഗസ്സയിലും യുഎന്റെ പരാജയം തുറന്നു കാട്ടുകയാണ്.സംഘടനയുടെ ശക്തി വീണ്ടെടുക്കണമെങ്കിൽ സുരക്ഷാ കൗൺസിലിന്റെ സ്ഥിരാംഗങ്ങളുടെ വീറ്റോ അധികാരം പുനർവിചിന്തനം ചെയ്യണമെന്നും സ്ഥിരാംഗങ്ങളുടെ എണ്ണം കൂട്ടണമെന്നും ലോക നേതാക്കൾ ആവശ്യപ്പെടുന്നു. വൈകാതെ മാറ്റം വരുത്തിയില്ലെങ്കിൽ, മുൻഗാമിയായ ലീഗ് ഓഫ് നേഷൻസിന്റെ വിധി തന്നെയാകും യുഎനെയും കാത്തിരിക്കുന്നതെന്നാണ് മുന്നറിയിപ്പ്.