മുഖത്ത് നീലനിറം,ഹൃദയം നിലച്ചുപോയി; തൃശ്ശൂരിലെ ഫിറ്റ്നസ് ട്രെയിനറേ മരണത്തിലേക്ക് നയിച്ചത് പ്രോട്ടീൻ പൗഡറുകളോ?

തൃശ്ശൂർ: ആരോഗ്യം സംരക്ഷിക്കാനും ശരീരസൗന്ദര്യം നിലനിർത്താനുമുള്ള ആകാംക്ഷയിൽ മലയാളികൾ കൂടുതൽ ശ്രദ്ധ പുലർത്തുന്ന സമയത്ത്, യുവ ഫിറ്റ്നസ് പരിശീലകൻ മാധവിന്റെ അപ്രതീക്ഷിത മരണം ആശങ്ക ഉയർത്തുകയാണ്.മസിലുകൾ പെരുപ്പിക്കാനായി അനധികൃതമായി ഉപയോഗിക്കുന്ന മരുന്നുകളും പ്രോട്ടീൻ പൗഡറുകളും കാരണമായി യുവാക്കൾക്ക് നേരത്തെ തന്നെ ജീവൻ നഷ്ടമായ സംഭവങ്ങൾ മുൻപ് റിപ്പോർട്ട് ചെയ്തിട്ടുള്ള സാഹചര്യത്തിലാണ് ഈ മരണം.

മുറി അകത്ത് നിന്ന് പൂട്ടിയ നിലയിൽ കണ്ടെത്തൽ

വടക്കാഞ്ചേരി സമീപം ഒന്നാംകല്ലിലെ വീട്ടിൽ മാധവിനെ മുറിയ്ക്കുള്ളിൽ മരിച്ച നിലയിൽ കണ്ടെത്തുകയായിരുന്നു. മുറി അകത്ത് നിന്ന് പൂട്ടിയ നിലയിലായിരുന്നു. കട്ടിലിന് താഴെ കമഴ്ന്ന നിലയിലായിരുന്നു ശരീരം. ശാരീരിക അസ്വാസ്ഥ്യം അനുഭവപ്പെട്ടതിനെ തുടർന്നാണ് വീണതാകാമെന്ന് പൊലീസ് പ്രാഥമികമായി നിഗമനം ചെയ്യുന്നു.

പാമ്പുകടി സംശയം തെറ്റി

ആദ്യം പാമ്പുകടിയാണോ കാരണം എന്ന സംശയമുണ്ടായിരുന്നെങ്കിലും, അതിന് യാതൊരു തെളിവുകളും കണ്ടെത്താനായില്ല. ശരീരത്തിൽ പുറംപരുക്കുകളൊന്നും ഉണ്ടായിരുന്നില്ല.

മുഖത്ത് നീലനിറം, ഹൃദയത്തിൽ ബ്ലോക്കില്ല

പോസ്റ്റ്മോർട്ടം നടത്തിയപ്പോൾ മാധവിന്റെ മുഖത്ത് നീലനിറം കാണപ്പെട്ടിരുന്നു. രക്തം ഒരു ഭാഗത്ത് കെട്ടികിടന്നതാകാമെന്നാണ് ഡോക്ടർമാർ പറയുന്നത്.ഹൃദയധമനികളിൽ ബ്ലോക്ക് ഒന്നും കണ്ടെത്തിയില്ലെങ്കിലും, ഹൃദയം നിലച്ചതാണ് മരണകാരണമെന്ന് റിപ്പോർട്ടിൽ പറയുന്നുണ്ട്.

രാസപരിശോധനയ്ക്കായി ആന്തരാവയവങ്ങൾ അയച്ചു

പോസ്റ്റ്മോർട്ടം റിപ്പോർട്ടിൽ നിന്ന് വ്യക്തമായ മരണകാരണം കണ്ടെത്താനായിട്ടില്ല. അതിനാൽ ആന്തരാവയവങ്ങൾ രാസപരിശോധനയ്ക്കായി അയച്ചിരിക്കുകയാണ്.

മരുന്ന് ദുരുപയോഗമോ പിന്നിലെ കാരണം?

മസിലുകൾക്ക് കരുത്തു ലഭിക്കാൻ മാധവ് വിദേശ നിർമ്മിത മരുന്നുകളും ഇൻജക്ഷനുകളും ഉപയോഗിച്ചിരുന്നുവെന്ന സൂചന പൊലീസിന് ലഭിച്ചു. ഇവയും സിറിഞ്ചുകളും കിടപ്പുമുറിയിൽ നിന്ന് പൊലീസ് കണ്ടെടുത്തു.ജനുവരിയിൽ നടക്കുന്ന ശരീരസൗന്ദര്യ മത്സരത്തിനായി കഠിനമായ പരിശീലനത്തിലായിരുന്ന മാധവ് ഇത്തരം മരുന്നുകൾ അമിതമായി ഉപയോഗിച്ചിട്ടുണ്ടാകാമെന്നതാണ് അന്വേഷണസംഘത്തിന്റെ പ്രാഥമിക നിഗമനം.

എന്നാൽ, മരുന്ന് ഉപയോഗമാണ് മരണത്തിന് കാരണമായതോ എന്നതിൽ വ്യക്തത വരിക ആന്തരാവയവങ്ങളുടെ പരിശോധനാഫലം ലഭിച്ച ശേഷമേ സാധിക്കൂ.