അതിരുവിട്ട തിരക്കിനെ തുടർന്ന് ശബരിമലയിൽ കർശന നിയന്ത്രണങ്ങൾ:ശബരിമലയിൽ മരണം സംഭവിച്ചാൽ സ്ട്രെച്ചർ നിരോധനം; ആംബുലൻസിൽ മാത്രം താഴെ ഇറക്കണമെന്ന് ഹൈക്കോടതി

പത്തനംതിട്ട:ശബരിമലയിൽ തീർത്ഥാടകർക്ക് മരണപ്പെടുന്ന സാഹചര്യത്തിൽ മൃതദേഹങ്ങൾ താഴെയിറക്കാൻ ഇനി മുതൽ ആംബുലൻസുകൾ മാത്രമേ ഉപയോഗിക്കാവുയെന്ന് ഹൈക്കോടതി പുതിയ നിർദ്ദേശത്തിൽ വ്യക്തമാക്കി. സ്ട്രെച്ചറിൽ ചുമന്നിറക്കുന്നത് തീർത്ഥാടകർക്കും ജീവനക്കാരിക്കും അപകടസാധ്യത ഉണ്ടാക്കുന്നുവെന്ന പ്രത്യേക കമ്മിഷണറുടെ റിപ്പോർട്ടിന്റെ അടിസ്ഥാനത്തിലാണ് ദേവസ്വം ബെഞ്ച് ഉത്തരവിട്ടത്.മണ്ഡല–മകരവിളക്ക് സീസണിൽ ശബരിമലയിൽ ഓരോ വർഷവും ഏകദേശം 150ഓളം പേർക്ക് ഹൃദയാഘാതം പോലുള്ള അസുഖങ്ങൾ ഉണ്ടാകാറുണ്ട്. ശരാശരിയായി നാല്‍പതോളം തീർത്ഥാടകർക്ക് ജീവൻ നഷ്ടപ്പെടുന്ന സാഹചര്യത്തിൽ, ഇതുവരെ സന്നിധാനത്തെ സർക്കാർ ആശുപത്രിയിൽ നിന്ന് മൃതദേഹങ്ങളെ സ്ട്രെച്ചറിൽ ചുമന്നിറക്കുന്നതായിരുന്നു പതിവ്.

ഇനി ഈ രീതി പൂർണമായും നിരോധിച്ച്‌ ആംബുലൻസ് മാർഗം മാത്രമേ താഴെയിറക്കാവൂ എന്ന് കോടതി വ്യക്തമാക്കി.അസുഖബാധിതരെ താഴേക്ക് എത്തിക്കുന്നതിന് ആവശ്യമായ ആംബുലൻസ് സൗകര്യങ്ങൾ ഇതിനകം ശബരിമലയിൽ പ്രവർത്തനക്ഷമമാണെന്നും, അവയെ കൂടുതൽ ഫലപ്രദമായി ഉപയോഗിക്കണമെന്നും കോടതി നിർദേശിച്ചു.അതേസമയം, ഇന്ന് ശബരിമലയിൽ ദർശനത്തിനെത്തിയ തീർത്ഥാടകർക്ക് ആശ്വാസകരമായ സാഹചര്യമാണെന്ന് അധികൃതർ അറിയിച്ചു.

നേരിയ മഴ ഉണ്ടായിട്ടും സന്നിധാനത്ത് എവിടെയും നീണ്ട ക്യൂ കണ്ടില്ല. തിരക്ക് നിയന്ത്രണ വിധേയമായതോടെയാണ് ഭക്തർക്കു സുഖകരമായി ദർശനം നടത്താൻ കഴിഞ്ഞത്.ഇന്നും സ്പോട്ട് ബുക്കിംഗ് പരിധി 5000 ആയി തുടരുന്നു. ദിവസേനയുള്ള തിരക്കനുസരിച്ച് സ്പോട്ട് ബുക്കിംഗ് നിയന്ത്രിക്കുമെന്ന് കഴിഞ്ഞ ദിവസം തന്നെ ഭരണസമിതി വ്യക്തമാക്കിയിരുന്നു.കഴിഞ്ഞ 18-ാം തീയതി സന്നിധാനത്ത് ഉണ്ടായ അതിരുവിട്ട തിരക്കാണ് ഹൈക്കോടതി കർശന നിയന്ത്രണങ്ങൾ ഏർപ്പെടുത്താൻ കാരണമായത്. അന്ന് വെർച്വൽ ക്യൂ വഴി 70,000 തീർത്ഥാടകർക്കും സ്പോട്ട് ബുക്കിംഗിലൂടെ 20,000 പേർക്കും — മൊത്തം 90,000 ഭക്താക്കൾക്കുമായിരുന്നു ദർശനാനുമതി. എന്നാൽ വെർച്വൽ ക്യൂ ബുക്ക് ചെയ്തവർ സമയക്രമം പാലിക്കാതെ എത്തിയത്‌,

സ്പോട്ട് ബുക്കിംഗ് തിരക്ക് കൂടിയത്‌, പൊലീസ് നിയന്ത്രണത്തിൽ പിഴവുകൾ ഉണ്ടായത് എന്നിവയാണ് തിരക്ക് നിയന്ത്രണാതീതമാകാൻ കാരണമായത്.സംഭവത്തിന് പിന്നാലെ ഹൈക്കോടതി സ്പോട്ട് ബുക്കിംഗ് പരിധി 5000 ആയി കുറയ്ക്കാനും പമ്പയിലെ കൗണ്ടറുകൾ താൽക്കാലികമായി നിര്‍ത്താനും നിർദ്ദേശിച്ചു. നിലവിൽ വെർച്വൽ ക്യൂ ഇല്ലാതെ എത്തുന്ന തീർത്ഥാടകർക്ക് നിലയ്ക്കലിൽ ഒരുക്കിയിട്ടുള്ള ഏഴ് കൗണ്ടറുകളിലൂടെയാണ് സ്പോട്ട് ബുക്കിംഗ് നൽകുന്നത്.