‘കണ്ണീരോർമ്മയായ’ ജന്മദിനം:ജന്മദിനത്തിൽ അച്ഛന്റെ വിയോഗം താങ്ങാനാവുന്നതിലും അപ്പുറം;ഇത്‌ കണ്ണിരിന്റെ പിറന്നാൾ

കൊച്ചി:മലയാള സിനിമയിലെ അതുല്യ പ്രതിഭയായ നടനും സംവിധായകനുമായ ശ്രീനിവാസന്റെ വിയോഗം സിനിമ ലോകത്തെയും ആരാധകരെയും ഒരുപോലെ ദുഃഖത്തിലാഴ്ത്തുമ്പോൾ, ആ വേർപാട് അദ്ദേഹത്തിന്റെ കുടുംബത്തിന് ഇരട്ടിയാകുന്ന വേദനയായി മാറുകയാണ്. അച്ഛൻ വിടവാങ്ങിയ അതേ ദിവസം തന്നെ മകൻ ധ്യാൻ ശ്രീനിവാസന്റെ മുപ്പത്തിയേഴാം ജന്മദിനമായിരുന്നു എന്ന യാദൃശ്ചികത ഈ ദുഃഖത്തിന് കൂടുതൽ കനത്ത ഭാരം ചേർത്തിരിക്കുകയാണ്.

1988 ഡിസംബർ 20-നാണ് ധ്യാൻ ശ്രീനിവാസൻ ജനിച്ചത്. ആഘോഷമാകേണ്ടിയിരുന്ന ജന്മദിനം ജീവിതത്തിലെ ഏറ്റവും വലിയ തണലായ പിതാവിനെ നഷ്ടപ്പെട്ട ദിനമായി മാറിയതോടെ, ധ്യാനിന് അത് കണ്ണീരിന്റെ പിറന്നാളായി മാറി. ജീവിതത്തിലും കലാരംഗത്തും അച്ഛൻ നൽകിയ കരുത്തും പ്രചോദനവുമാണ് തന്നെ മുന്നോട്ട് നയിച്ചതെന്ന് ധ്യാൻ പല അഭിമുഖങ്ങളിലും തുറന്നുപറഞ്ഞിട്ടുണ്ട്.ശ്രീനിവാസനെക്കുറിച്ച്‌ തമാശയോടെയും സ്നേഹത്തോടെയും സംസാരിക്കാറുള്ള ധ്യാൻ, അച്ഛനുമായുള്ള ആത്മബന്ധം എപ്പോഴും പൊതുവേദികളിൽ പങ്കുവെച്ചിരുന്നു.

“അച്ഛന്റെ ശകാരവും തമാശകളുമാണ് എന്നെ ഞാനാക്കിയത്” എന്ന ധ്യാനിന്റെ വാക്കുകൾ ഇരുവരുടെയും അടുപ്പത്തിന്റെ തെളിവായിരുന്നു. അടുത്തകാലത്ത് ശ്രീനിവാസന്റെ ആരോഗ്യനില മോശമായപ്പോൾ, ധ്യാൻ നൽകിയ പിന്തുണയും കരുതലും ഏറെ ശ്രദ്ധേയമായിരുന്നു.അറുപത്തിയൊൻപതാം വയസ്സിൽ തൃപ്പൂണിത്തുറ താലൂക്ക് ആശുപത്രിയിൽ വെച്ചായിരുന്നു ശ്രീനിവാസന്റെ അന്ത്യം. ദീർഘകാലമായി ചികിത്സയിലായിരുന്ന അദ്ദേഹം വിടവാങ്ങിയത്, മലയാളികൾക്ക് ചിരിയും ചിന്തയും ഒരുപോലെ സമ്മാനിച്ച ഒരു വലിയ സിനിമായുഗത്തിന് വിരാമം കുറിച്ചുകൊണ്ടാണ്. ധ്യാനിന്റെ ജന്മദിനത്തിൽ തന്നെ സംഭവിച്ച ഈ വിയോഗം സിനിമാ ലോകത്തെ മുഴുവൻ ഞെട്ടിച്ചിരിക്കുകയാണ്.