മുണ്ടത്താനം ലിറ്റിൽ ഫ്ലവർ വിദ്യാനികേതനിൽ പന്ത്രണ്ടാം ക്ലാസ്സിൽ ഉന്നത വിജയം നേടിയവർക്ക് അനുമോദന ചടങ്ങ്, മെറിറ്റ് മോൺ – 2026 ശ്രദ്ധേയമായി

കങ്ങഴ : മുണ്ടത്താനം ലിറ്റിൽ ഫ്ലവർ വിദ്യാനികേതൻ ആന്റ് ജൂനിയർ കോളജിൽ നിന്ന് ഈ വർഷത്തെ പന്ത്രണ്ടാം ക്ലാസ്സ് സി. ബി. എസ്. ഇ. ബോർഡ് പരീക്ഷയിൽ ഉന്നത വിജയം നേടിയവർക്കായി പ്രത്യേക അനുമോദന സമ്മേളനം നടന്നു. ‘മെറിറ്റ് മോൺ – 2026’ എന്ന പേരിൽ സ്കൂൾ ഓഡിറ്റോറിയത്തിൽ സംഘടിപ്പിച്ച ചടങ്ങുകൾ പ്രൗഢഗംഭീരമായിരുന്നു.

സ്കൂൾ പ്രിൻസിപ്പൽ റവ. സിസ്റ്റർ ആൻസി മാത്യു അധ്യക്ഷത വഹിച്ചു. നെടുംകുന്നം ഡി പോൾ ലിംഗ്വിസ്റ്റിക് കോച്ചിംഗ് സെന്റർ ഡയറക്ടർ റവ. ഫാ. തോമസ് പാണനാൽ വി. സി. മുഖ്യാതിഥിയായിരുന്നു. അധ്യാപക പ്രതിനിധി റെജി വി. ആർ., പി.ടി.എ. പ്രസിഡന്റ് സംഗീത ജോസ് എന്നിവർ ആശംസകൾ അറിയിച്ചു സംസാരിച്ചു.

ഈ വർഷത്തെ പന്ത്രണ്ടാം ക്ലാസ്സ് സി. ബി. എസ്. ഇ. ബോർഡ് പരീക്ഷയിൽ സ്കൂളിൽ പ്രഥമ സ്ഥാനം നേടിയ ജേക്കബ് ജോസഫ്, മെറിൻ തോമസ് എന്നിവരെ സ്കൂൾ മാനേജ്‌മെന്റ് ക്യാഷ് അവാർഡും മൊമെന്റോയും നൽകി ആദരിച്ചു. വിവിധ വിഷയങ്ങളിൽ ഒന്നാം സ്ഥാനം നേടിയ റോസ്മേരി ജോസഫ്, ആൽഫാ എ. ഫൈസൽ, ജെസ്സ് വർഗീസ് ഷിബു എന്നിവരെ കൂടാതെ സ്കൂളിൽ നിന്ന് ഈ വർഷം ഉന്നതവിജയം നേടിയ മറ്റ്‌ വിദ്യാർത്ഥികളും ഉപഹാരങ്ങൾ ഏറ്റുവാങ്ങി.

ലോക്കൽ മാനേജർ റവ. സിസ്റ്റർ അഖില ജോസഫ്, വൈസ് പ്രിൻസിപ്പൽ വർഗീസ് ദേവസി, അധ്യാപകർ തുടങ്ങിയവർ ക്രമീകരണങ്ങൾക്ക് നേതൃത്വം നൽകി. ചടങ്ങിൽ ഗൗരിനന്ദ സുരേഷ് സ്വാഗതം ആശംസിക്കുകയും അഭിനവ് ബി. കൃതജ്ഞത പ്രകാശിപ്പിക്കുകയും ചെയ്തു.

വിവിധ ക്ലാസ്സു‌കളിലെ കുട്ടികളുടെ നേതൃത്വത്തിൽ നടന്ന വ്യത്യസ്ത കലാപരിപാടികൾ ചടങ്ങിനെ കൂടുതൽ ആകർഷകമാക്കി.