കോഴാ ഫാം ഫെസ്റ്റ് ശനിയാഴ്ച മുതൽ

കുറവിലങ്ങാട്: കാർഷിക വിജ്ഞാന-വിനോദ-വിപണന പ്രദർശനവും ചർച്ചകളും മത്സരങ്ങളുമായി കോഴാ ഫാം ഫെസ്റ്റ് -‘ഹരിതാരവം 27 മുതൽ 30 വരെ കുറവിലങ്ങാട് കോഴായിൽ നടക്കും. കാർഷിക വികസന കർഷക ക്ഷേമ വകുപ്പും ജില്ലാ പഞ്ചായത്തും സംയുക്തമായാണ് പരിപാടി സംഘടിപ്പിക്കുന്നത്. സെപ്റ്റംബർ 27 ശനിയാഴ്ച വൈകിട്ട് നാലു മണിയ്ക്ക് സഹകരണം-ദേവസ്വം-തുറമുഖ വകുപ്പ് മന്ത്രി വി.എൻ. വാസവൻ ഫാം ഫെസ്റ്റ് ഉദ്ഘാടനം ചെയ്യും. മോൻസ് ജോസഫ് എം.എൽ.എ. ചടങ്ങിൽ അധ്യക്ഷനായിരിക്കും. അഡ്വ. കെ. ഫ്രാൻസിസ് ജോർജ് എം.പി. മുഖ്യപ്രഭാഷണം നടത്തും.

കോഴായിലെ ജില്ലാ കൃഷിത്തോട്ടം, സംസ്ഥാന വിത്ത് ഉത്പാദന കേന്ദ്രം, പ്രാദേശിക കാർഷിക പരിശീലന കേന്ദ്രം, ഉഴവൂർ ബ്ലോക്ക് പഞ്ചായത്ത് ഓപ്പൺ ഓഡിറ്റോറിയം എന്നിവിടങ്ങളിലായാണ് പരിപാടികൾ നടക്കുന്നത്
കാർഷികാനുബന്ധ പ്രദർശന സ്റ്റാളുകൾ, നെല്ല്, തെങ്ങ്, പച്ചക്കറി കൃഷികളിലെ നൂതന വിഷയങ്ങളിലുള്ള സെമിനാറുകൾ, ഭക്ഷ്യമേള, കലാസന്ധ്യ, നെൽകൃഷിയിലെ അനുഭവ പരിചയം, കുട്ടികർഷക സംഗമം, രുചിക്കൂട്ട് സംഗമം, ഫാം തൊഴിലാളി ജീവനക്കാരുടെ സംഗമം, പെറ്റ് ഷോ എന്നിവ ഫെസ്റ്റിന്റെ ഭാഗമായി നടക്കും. നാലുദിവസവും കാർഷിക യന്ത്രങ്ങളുടെ സർവീസ് ക്യാമ്പും സൗജന്യ മണ്ണ് പരിശോധനാ സൗകര്യവും ലഭ്യമാകും. കൃഷിവകുപ്പിന്റെ അഗ്രോ ക്ലിനിക് ഓൺലൈൻ സേവനങ്ങൾക്ക് പ്രത്യേക കൗണ്ടറും സജ്ജമാകും
സാംസ്‌കാരിക ഘോഷയാത്ര, കലാസന്ധ്യ, സൗഹൃദ സദസുകൾ, ഫൺ ഗെയിംസ്, ലക്കി ഡ്രോ, സെൽഫി പോയിന്റുകൾ, കർഷകർക്കും വിദ്യാർഥികൾക്കുമുള്ള ക്വിസ്, നാടൻ പാട്ട്, ഉപന്യാസ രചന, പെൻസിൽ ഡ്രോയിങ്, മഡ് ഗെയിംസ്, തുടങ്ങിയവയും മേളയുടെ ഭാഗമായി നടക്കും.

കാർഷിക പ്രദർശനങ്ങളുടെ ഉദ്ഘാടനം സെപ്റ്റംബർ 27ന് രാവിലെ 10 മണിക്ക് ജില്ലാ പഞ്ചായത്ത് പ്രസിഡന്റ് ഹേമലത പ്രേം സാഗർ നിർവഹിക്കും. തുടർന്നു സെമിനാർ, കപ്പ പൊളിക്കൽ, കാർഷിക പ്രശ്‌നോത്തരി, പാചക മത്സരങ്ങളും, രുചിക്കൂട്ട് സംഗമവും വിവിധ വേദികളിലായി നടക്കും. വൈകിട്ട് മൂന്ന് മണിയ്ക്ക് കുറവിലങ്ങാട് പള്ളിക്കവലയിൽ നിന്ന് ഘോഷയാത്ര ജില്ലാ പഞ്ചായത്ത് പ്രസിഡന്റ് ഹേമലത പ്രേം സാഗർ ഫ്‌ളാഗ് ഓഫ് ചെയ്യും.

സെപ്തംബർ 28ന് ഫാം തൊഴിലാളി-ഫാം ഓഫീസർ സംഗമം ജോസ് കെ.മാണി എം.പി. ഉദ്ഘാടനം ചെയ്യും. സി.കെ. ആശ എം.എൽ.എ. അധ്യക്ഷത വഹിക്കും.

സെപ്തംബർ 29ന് ചേറ്റിലോട്ടം, മുതിർന്നവർക്കായുള്ള ചേറിലെ ഫുട്‌ബോൾ മത്സരം, കുട്ടികർഷക സംഗമം എന്നിവ നടക്കും.
സമാപന സമ്മേളനം സെപ്തംബർ 30 വൈകിട്ട് നാലു മണിയ്ക്ക് കാർഷിക വികസന കർഷക ക്ഷേമ വകുപ്പ് മന്ത്രി പി. പ്രസാദ് ഉദ്ഘാടനം നിർവഹിക്കും.

സർക്കാർ ചീഫ് വിപ്പ് ഡോ. എൻ. ജയരാജ് അധ്യക്ഷത വഹിക്കും. മോൻസ് ജോസഫ് എം.എൽ.എ. മുഖ്യപ്രഭാഷണം നടത്തുമെന്ന് ഭാരവാഹികൾ ആയ ജില്ലാ പഞ്ചായത്ത് വൈസ് പ്രസിഡൻ്റ് ജോസ് പുത്തൻ കാലാ ബ്ലോക് പഞ്ചായത്ത് പ്രസിഡൻ്റ് രാജ്യജോൺ ചിറ്റേത്ത് നിർമ്മല ജിമ്മി ‘ മിനി മത്തായി പി എം മാത്യു. പി സി കുര്യൻ ‘പ്രിൻസിപ്പൽ കൃഷി ഓഫീസർ സി ജോ ജോസ് ‘ കൃഷി ഡെപ്യൂട്ടി ഡയറക്ടർ വി ജി റെജി . ഫാം സുപ്രണ്ട് ഹണി ലിസ ചാക്കോ തുടങ്ങിയവർ കുറവിലങ്ങാട് നടന്ന പത്രസമ്മേളനത്തിൽ അറിയിച്ചു.